10 thoughts on “తెలంగాణ డిమాండ్‌పై అంతర్జాతీయ పెట్టుబడుల దృక్పధం ఎలా ఉంది?”

1. హైదరాబాద్ రాజధాని కాబట్టే, తెలుగు సమాజం లో ని క్రీమీ లేయర్ అక్కడికి చేరుకుంది. ఈ మానవ వనరుల వలననే ప్రభుత్వాలు పెట్టుబడులను ఆకర్షించాయి. తెలంగాణా ఖనిజ వనరుల వలన ఆంధ్ర పెట్టుబడి దారులు ఎంత బాగుపడ్డరో సంఖ్యలతో సహా చెబితే బాగుండేది. ఖనిజ వనరులు సీమ లోనూ, కొన్ని కోస్తా జిల్లాలలోనూ కూడా బాగానే ఉన్నాయి.
   పెట్టుబడి అంటేనే, దోపిడీ..ఈ దోపిడీ కి బై ప్రొడక్ట్ గా కొన్ని ఉద్యోగాలు వస్తాయి. పెట్టుబడి దారులలో మీ పెట్టుబడిదారులూ, మా పెట్టుబడిదారులు ఉండరు. మీ/మా మన మనసులోనే ఉంటుంది. తెలంగాన పెట్టుబడి దారులు తెలంగాణ ను ఉధ్ధరించాలి అనుకోరు.
   పెట్టుబడి దారులు కూడా ప్రజలే. తెలంగాన పెట్టుబడి దారులు తెలంగాన వారి కి ముద్దైతే ఆంధ్ర పెట్టుబడిదారులు ఆంధ్ర వారికి ముద్దు. మామూలు జనాలలోనె కొంతమంది సంపాదించి పెట్టుబడిదారులౌతారు. కాబట్టీ ఆంధ్ర పెట్టుబడి దారులను ఆంధ్ర ప్రజలనుంచీ వేరు గా చూడనవసరం లేదు. ఆంధ్ర పెట్టుబడి దారులకు మీరు వ్యతిరేకమైతే ఆంధ్ర ప్రజలకు కూడా వ్యతిరేకమే! అలానే ఆంధ్ర రాజకీయ నాయకులను కూడా ఆంధ్ర ప్రజలు వోట్లు వేసి గెలిపించుకొన్నారు. ఆంధ్ర పాలకులను తిట్టినట్లైతే మొత్తం ఆంధ్ర ప్రజలను తిట్టినట్లే!
   సమైక్యాంధ్ర నినాదం ఏ కొందరు పెట్టుబడిదారుల వలనో వచ్చిందనుకొంటే మీరు ఊహలలో బతుకుతున్నారు. దిసెంబర్ తొమ్మిది ప్రకటన తరువాత, ఆంధ్ర లో ఆటో వారి నుంచీ, కూలి వారినుంచీ అన్ని వర్గాలప్రజలూ ఈ ఉద్యమం లో పాల్గొన్నారు. దీనికి ముఖ్య కారణం, ఆంధ్ర ప్రజలకు కొత్తగా హైదరాబాద్ తో ఏర్పడిన అనుబంధం. దాదాపు ప్రతి కుటుంబం నుంచీ ఒకరన్నా హైదరాబాద్ లో ఉంటున్నారు. అలాంటి హైదరాబాద్ ని కోల్పోవటం అనే దానికి ప్రతిస్పందన గా ఉద్యమం జరిగింది..మళ్ళీ జరుగుతుంది.
   “ఎడతెగని సమస్యకు సీమాంధ్ర ప్రజల సానుకూలత ఖచ్చితంగా పరిష్కారం చూపెడుతుంది.”
   పెట్టుబడిదారులూ, నాయకులూ కూడా ప్రజలలో భాగమే! నాయకులు ప్రజల ప్రతినిధులు. వారిని మీరు దోపిడీ దారులూ, దొంగలూ అని ఉద్యమం మొదలుపెట్టారు. ఇప్పుడు వారి సానుకూలత మీకు ఎందుకు కావలసి వచ్చింది?

   ఆంధ్ర పెట్టుబదీ దారులు పెట్టిన అనేక కంపెనీ ల లో తెలంగాణ వారు మంచి స్థాయి లో ఉద్యోగలు చేస్తుండటం నాకు తెలుసు. ప్రైవేట్ సెక్టార్ లో టాలెంట్ ఉన్నవాడిని కుల మతాలకు అతీతం గా ఆదరిస్తారనే విషయం తెలిసినదే! ఈ ఆదరించటం మన మీద ప్రేమ తో కాక, వారి లాభాలమీది ఆసక్తి తో! సత్యం కంప్యూటర్స్, రెడ్డీ లాబ్స్ వంటి వాటిలో ఉన్న తెలంగాన ఉద్యోగుల సంఖ్య తక్కువేమీ కాదు.

   ఆంధ్ర పెట్టుబదీ దారులు పెట్టిన అనేక కంపెనీ ల లో తెలంగాణ వారు మంచి స్థాయి లో ఉద్యోగలు చేస్తుండటం నాకు తెలుసు. ప్రైవేట్ సెక్టార్ లో టాలెంట్ ఉన్నవాడిని కుల మతాలకు అతీతం గా ఆదరిస్తారనే విషయం తెలిసినదే! ఈ ఆదరించటం మన మీద ప్రేమ తో కాక, వారి లాభాలమీది ఆసక్తి తో! సత్యం కంప్యూటర్స్, రెడ్డీ లాబ్స్ వంటి వాటిలో ఉన్న తెలంగాన ఉద్యోగుల సంఖ్య తక్కువేమీ కాదు.
2. బొందలపాటి గారూ, నేరుగా మీ అభిప్రాయం చెప్పినందుకు అభినందనీయులు.

   ఓం ప్రధమం, మీరు తెలుసుకోవలసింది నేను తెలంగాణవాడిని కాదు, ఆంధ్ర వాడినే.

   తెలుగు సమాజం క్రీమీ లేయర్ అంతా హైద్రాబాద్ చేరుకుందనీ, ప్రతీ కుటుంబనుండి ఒకరు హైద్రాబాద్ లో ఉన్నారనీ మీ అభిప్రాయం సరైంది కాదని నా అభిప్రాయం. మీరీ అంచనాకి ఎలా రాగలిగారు? ఎందుకంటే మా గ్రామంలోని (తాడికొండ, గుంటూరు) మూడు వేల కుటుంబాలు గల ఒక పేటలో తొంభై తొమ్మిది శాతం ఎవర్నీ హైద్రాబాద్ పంపలేదు. కనీసం నలభై కి.మీ దూరంలో గల విజయవాడకి కూడా వారు వెళ్లలేదు. వారంత కూలి నాలి జనం. తలా ఒక ఎకరం, అరెకరం పొలం ఉన్నా, వంద సంవత్సరాలకు పైగా సాగు చేస్తున్నా, సాగర్ కాలవ పక్కనే పారుతున్నా, అగ్ర కులాల వారికి కూలీలు లేకుండా పోతారన్న ఒకే ఒక్క కారణంతో తమ భూములకి పట్టాలు పొందలేని జనం. భారత దేశంలోని ఏ ఊళ్ళోనైనా వీళ్ళే ఎక్కువ. అణవివేతకు గురవుతున్న వివిధ కులాల కింద ఉన్న వీరు నగరాలకి చేరుకున్నా అక్కడా కూలీలుగానో, కార్మికులు గానో బతకాల్సిందే. మా తమ్ముడు హైద్రాబాద్ లో పదేళ్ళు బతికి నెలకు నాలుగువేల కంటే ఎక్కువ సంపాదించలేక గ్రామానికి తిరిగొచ్చి ఆ కూలి పని గ్రామంలోనే చేసుకుంటున్నాడు.

   మీ వ్యాఖ్యలో ఒక వైరుధ్యాన్ని గమనించారా? పెట్టుబడి అంటేనే దోపిడి అని కరెక్టుగా రాశారు. కాని తెలంగాణ పెట్టుబడిదారులు తెలంగాణవారికి, ఆంధ్ర పెట్టుబడిదారులు ఆంధ్ర వారికి ముద్దు అని జనరలైజ్ చేశారు. దోపిడిదారులని గుర్తించాక వారు ప్రజల్లో ఒకరిగా పరిగణింపబడటానికి అర్హులేనా? వాళ్ళు తమ ప్రయోజనాల కోసం అనేక మందిని దోపిడీ చేస్తున్నపుడు, అంటే వారు దోపిడీ చేస్తున్న వారి ప్రయోజనాలు, వారి ప్రయోజనాలు పరస్పర విరుద్ధంగా ఉన్నాయని అర్ధం అయ్యాక దోపిడీ పీడితులనీ, దోపిడి చేసే వారిని ‘అందరూ ప్రజలే”నని ఒకే గాటన కట్టడం సబబేనా?

   “మామూలు జనంలోనే కొంతమంది ఎక్కువ సంపాదించి పెట్టుబడుదారులు అవుతారు” అనడం కరెక్టయితే మిగతావారి కంటే వారెక్కువ ఎలా సంపాదిస్తారు? అది అందరికీ అందుబాటులో ఉంటే మిగతా వారి ఎక్కువ ఎందుకు సంపాదించలేకపోతారు? పెట్టుబడిదారులు అనడం అంటే వారి వద్ద తమ అవసరాలన్నీ తీర్చుకున్నాక ఇంకా పెట్టుబడి పెట్టగల డబ్బు మిగిలిందని అర్ధం. పెట్టుబడి పెట్టగల డబ్బంటే అది కోట్లలోనే ఉంటుంది. లక్షల మిగులు పెట్టుబడిగా పనికి రాదు. అది చిన్న షాపులు పెట్టుకుని కుటుంబ అవసరాలు గడుపుకోవడానికి పనికోస్తుందేమో గాని పెట్టుబడి అని పిలవడానికి సరిపోయిన మొత్తం కాదు. ఈ రోజుల్లో కొన్ని కోట్లు కూడా సరిపోదన్నది పక్కన బెడదాం.

   చిన్న షాపులవారు కూడా పెట్టుబడి అనే అంటారు. ఆ పెట్టుబడి గురించి కాకుండా, ఆంధ్ర, తెలంగాణ పెట్టుబడిదారులు అని సంభోధించగల పెట్టుబడి గురించి ఇక్కడ ప్రస్తావించుకుంటున్నామని గమనించగలరు.

   ఆంధ్ర, తెలంగాణ అనే కాదు. ఈ దేశంలో పెట్టుబడిదారులంతా ఒకే వర్గం. ఎందుకంటే వారు ఏ ప్రాంతంలో ఉన్నా వారి ప్రయోజనాలు ఒక్కటే ప్రభుత్వాలు అనుసరించే విధానాల ద్వారా లబ్ది పొందుతున్నది వీరే. మీరన్నట్లు బై ప్రొడక్టుగా వచ్చే ఉద్యోగాలు ఇతరులు పొందుతున్నారు. ఎగువ మధ్య తరగతి నుండి కూలీల వరకూ వీరు ఎంతో కొంత పెట్టుబడి దారుల శ్రమదోపిడీకి గురవుతున్నారు. అందువలన శ్రమ చేస్తున్న వారంతా వారి ఉమ్మడి ప్రయోజనాల రీత్యా ఒకే వర్గం. వీరి కోసం ప్రభుత్వాలు ప్రత్యేకంగా విధానాలు రూపొందించరు. రూపొందిస్తే అవి వారికి వ్యతిరేకంగా వారి శ్రమల్ని పెట్టుబడిదారులు కొల్లగొట్టే విధానాల్నే రూపొందిస్తాయి. ఏ రాష్ట్రానికి వెళ్ళినా ఇదే తంతు.

   రేపు తెలంగాణ వచ్చినా ఇదే తంతు. అదే నా పోస్ట్ లో కూడా రాశాను. తెలంగాణ ఒక రాష్ట్రం గా ఉండటం, తెలుగు ఎ.పి గా ఏర్పడకముందు తెలంగాణ ప్రాంత ప్రయోజనాల రక్షణ కోసం కొన్ని ఒప్పందాలు కుదుర్చుకోవడం ఒక వాస్తవం. వాటిని అమలు చేయలేదన్నది కూడా వాస్తవమే. ఇలా కొన్ని కారణాల వలన, భాషలో ఉన్న కొన్ని తేడాల వలన, రెండొందలేళ్ళూ ఉర్దూ ఆధిపత్యంలో జీవించి తెలుగూ-ఉర్దూల సమ్మిళిత భాష యాసగా ఏర్పడి ఆ విధంగా భాషలో తేడాలు రావడం వలనా తెలంగాణ ప్రాంతం వారికి ఒక ప్రత్యేక అస్తిత్వం ఏర్పడింది. అంతే కాక స్వాతంత్ర్యం రాకముందు రెండొందలేళ్ళు ముస్లిం పాలనలో ప్రత్యేక దేశంగా ఉన్న ప్రాంతం అది. నా ఆర్టికల్ లో రాసినట్లు ఆర్ధిక అభివృద్ధిలో కూడా తేడాలుండటంతో కలిశాక కూడా ఏకీభావం రావడానికి అవన్నీ అడ్డంగా పనిచేశాయి. రెండొందలేళ్ళు వేరువేరుగా ఉన్న స్ధితి, తద్వారా తలెత్తిన సంస్కృతీ తేడాలు, ఆర్ధిక వృద్ధిలొ తేడాలు ఇవన్నీ తెలంగాణ వారిని వేరుగా నిలిపాయి. ఇది జీవన విధానంలోనే సంభవించిన తేడా. వివిధ తెగలు, జాతులు మధ్య తేడాల్లో జీవన విధానం, సంస్కృతి, భాష ప్రధాన పాత్ర పోషిస్తాయి. వీటిల్లోనే తెలంగాణ, ఇతర ఎ.పి లో తేడాలొచ్చినందున ఆ వేరుతనం అలా నిలబడింది.

   ఎ.పిగా కలిశాక, ఒప్పందాలను అమలు చేయడంలో శ్రద్ధ చూపినట్లయితే తేడాలు అంతా కాకున్నా, కొంతయినా సమసిపోయి ఉండేవి. అలా జరగలేదు. చెన్నారెడ్డి ఉద్యమం తర్వాతైనా జాగ్రత్త పడి ఉన్నట్లయితే కొంత కృషి జరిగినట్లయితే తేడాలన్ని పోకపోయినా, ఆ క్రమం మొదలై ఉండేది. అది చూపించి ఇంకా కృషి కొనసాగనివ్వండి అని చెప్పగల అవకాశం దొరికేది. కాని జరగలేదు. తెలంగాణలో నీటి పారుదల అభివృద్ధి కాలేదు. అది బాగా ప్రభావితం చేసిన తేడా. ఎత్తులో ఉందని చెప్పి వాయిదా వేశారు గానీ ఎత్తిపోతల ప్రాచుర్యంలోకి వచ్చాకయినా శ్రద్ధ చూపలేదు. సీమాంధ్రలో గోదావరి, కృష్ణలపై కట్టిన ప్రాజెక్టూలతో పోటీ చేసేవి తెలంగాణలో లేవు. శ్రీశైలం కూడా సగం ఆంధ్రం ప్రయోజనాలనే నెరవేరుస్తుంది. కొత్తగా కట్టనున్న పోలవరం గోదావరి ఎక్కువగా ప్రవహించే తెలంగాణకు కాకుండా తక్కువ ప్రవహించే కోస్తాంధ్ర ప్రయొజనాలు నెరవేర్చడానికే ఊపయోగపడుతుంది. కోస్తాంధ్ర వెంట హైడ్రో కార్బన్ పరిశ్రమలతో వాన్-పిక్ అనే కోస్తా కారిడార్ నిర్మించి దానికి నీటి సరఫరా కోసం పోలవరం రూపొందించారు. దాని వలన తెలంగాణకి ప్రయోజనం జరగదు. ప్రయోజనం జరిగే ప్రాజెక్టులు ఎ.పి ప్రభుత్వ దృష్టిలో లేవు. ఉన్నాయని చెప్పినా వాటికి నిధులు ఇవ్వడం లేదు. ఇవన్నీ తెలంగాణ వారికి మరింత అపనమ్మకం కలగడానికే దారి తీస్తున్నాయి.

   పెట్టుబడిదారుల ప్రయోజనాలన్ని ఒకటే అయినా వారిలో కూడా అవసరాన్ని బట్టి, అవకాశాన్ని బట్టి గ్రూపులు ఏర్పడతాయి. ప్రస్తుతం తెలంగాణ ఉద్యమానికి ప్రధానంగా నాయకత్వం వహిస్తున్నది తెలంగాణ పెట్టుబడిదారులే. వీరు అవకాశాలు రాక నిజాం పాలనలో ఉండటం వలన బ్రిటిష్ కాలంలో ఆంధ్ర పెట్టుబడీదారుల్లా అభివృద్ధి చెందలేకపోయారు. ఇది అందరూ అంగీకరిస్తున్న వాస్తవం. తెలంగాణ సామాజిక ఆర్ధిక చరిత్రే దానికి సాక్ష్యం. స్వతంత్రం వచ్చాక అప్పటికే ఆంధ్ర పెట్టుబడిదారులు (ఆంధ్ర పెట్టుబడిదారులంటే ప్రత్యేకంగా ప్రస్తావించడం కాదిక్కడ. ఆంధ్ర ప్రాంతంలో బ్రిటిష్ వారి ప్రయోజనాల కోసం నిర్మించిన నీటి ప్రాజెక్టుల వలన అక్కడ ఉన్న భూస్వాములు లాంటి పెత్తందారులు సంపన్నులయ్యారు. బ్రిటిష్ వాడి విధానల ఫలితం అది. అలా సంపన్నులయిన భూస్వాములే పెట్టుబడిదారులుగా రూపాంతరం చెందారు.) బ్రిటిష్ వాడు వచ్చి ఇండియాలో ఉన్న భూస్వామ్య వ్యవస్ధని అలానే ఉంచి తన ప్రయోజనాల కోసం పైపైన కొన్ని మార్పులు చేశాడు. అలా భూస్వామ్య వ్యవస్ధ ప్రధానంగా అలానే కొనసాగి భూస్వాములు తమ సంపదని పట్నాల్లో పెట్టుబడిగా పెట్టి పెట్టుబడిదారులుగా కూడా వ్యవరించగలిగారు. ఇప్పటికీ దాదాపు ఎ.పి అంతా అదే పరిస్ధితి కొనసాగడం గమనించొచ్చు. పై పై మార్పులు మాత్రమే కాక ప్రజల మద్య ఉత్పత్తి సంబంధాలు ఎలా మారాయి, ఉత్పత్తి సాధనాలైన భూమి, పరిశ్రమలపైన ఎవరి ఆధిపత్యం ఉన్నదీ ఇవన్నీ లోతుగా పరిశీలిస్తే సమాజంలో జరిగిన మార్పులపై సరైన అవగాహనకి రాగలుగుతాం.

   తెలంగాణ నిజాం భూస్వామ్య పాలనలో ఉండటం వలన, అంద్ర ప్రాంతంలో భూస్వాములు, పెట్టుబడుదారులుగా అభివృద్ధి చెందిన పరిణామం తెలంగాణలో జరగడానికి అవకాశం రాలేదు. వారు ఎంతో కొంత అభివృద్ధి చెందేనాటికి ఇతర ప్రాంతాల్లోని పెట్టుబడిదారులు భూస్వాములు అప్పటికే ఎ.పి ప్రభుత్వ వ్యవస్ధలో పలుకుబడి సంపాదించారు. పలుకుబడి అంటే… రాజకీయ పార్టీలకి వారే ఆధారం. రాజకీయ పార్టీలు వారి నిధులు అందుకుని ఆ డబ్బు ఖర్చు చేసి అధికారంలోకి వచ్చాక వారి ప్రయోజనాల కోసమే విధానాలు రూపొందిస్తాయి. గ్రామాలు ఎక్కువగా ఉన్న ఇండియాలో భూస్వాములు కూడా రాజకీయ పార్టీలకి ఫైనాన్సింగ్ అందించారు. సో, ప్రభుత్వాలు భూస్వాములకీ, పెట్టుబడిదారులకీ అనుకూల విధానలనే ప్రధానంగా రూపొందిస్తాయి. ప్రభుత్వంలో నాయకులుగా మెలిగే వారు కూడా భూస్వాములూ, పెట్టుబడుదారులే. వారు తమ వర్గం వారికి కాక ఎవరికి అనుకూలంగా ఉంటారు? ఆ విధంగా ప్రభుత్వంలోని అన్ని ప్రధాన అంగాల్లోన పలుకుబడి సంపాదించిన వాళ్ళు కొత్తగా పెట్టుబడుదారులను అభివృద్ధి కానివ్వరు. ఎందుకంటే వారు అభివృద్ధి ఐతే తమ వ్యాపారాలకే పోటీకి వస్తారు. ఎ.పి బడ్జెట్ లో వాళ్ళు వాటా కోసం ప్రయత్నిస్తారు. అంటే అప్పటికే ఉన్నవారు ప్రభుత్వం నుండి తమకు అందే బడ్జెట్ సపోర్ట్ లో కొంత కోల్పోవలసి వస్తుంది. కనుక సహజంగానే కొత్తవారిని వారు అడ్డు కుంటారు.

   ఇక్కడ ఏమైంది చూడండి. అప్పటికే అభివృద్ధి చెంది పలుకుబడి పొందిన పెట్టుబడుదారుల్లో దాదాపు అంతా సీమాంధ్ర వారే ఉన్నారు. బ్రిటిస్ పాలనలో అందిన కొన్ని ఫలితాలు ఆ ప్రాంతం వారికి అలా కలిసి వచ్చినందున వారు ముందు వరసలో ఉండగలిగారు. దానితోపాటు కొత్తగా పెట్టుబడిదారులుగా ముందుకు వస్తున్నవారు కొత్తగా అవకాశాలు అంది పుచ్చుకున్న తెలంగాణ వారే అధికంగా ఉన్నారు. ఇప్పటికే అభివృద్ధి సాధించిన వారు, సీమాంధ్ర నుండి కొత్తగా అభివృద్ధి చెందుతున్నవారిని కూడా అడ్డుకుంటారని ఇక్కడ ముఖ్యంగా గమనించాలి. వారికి ప్రాంతాల తేడాలు ఉండవు. కానీ కొత్తగా అభివృద్ధి చెందిన పెట్టుబడుదారులు అధికంగా తెలంగాణ వారు కావడంతో, వారి ఎదుగుదలకు అడ్డుపడుతున్న వారు ప్రధానంగా సీమాంధ్ర వారు కావడంతో ఈ ప్రాంతీయ తేడాను తెలంగాణ వారు వినియోగించదలిచారు. నేనిక్కడ చెప్పదలుచుకున్నదేమంటే తెలంగాణ పెట్టుబడిదారులు కొత్తగా అభివృద్ధి చెందుతూ, తమ అభివృద్ధికి ఆటంకంగా కనిపిస్తున్న ఇతర ప్రాంతాల పెట్టుబడిదారుల అడ్డు తొలగించుకోవడానికి ప్రాంతీయ తేడాలను వినియోగించుకోదలిచారు. అంటే ఇక్కడ ప్రాంతాల వెనుకబాటుతనమే ప్రధానం కాదు. ప్రధానమైనది కొత్తగా అభివృద్ధిలోకి వస్తున్న పెట్టుబడుదారులకు ఎదురవుతున్న ఆటంకాలు ప్రధానం. ఆ ఆటంకాలను తొలగించడానికి వాళ్ళు ప్రాంతీయ విభేధాలను ఉపయోగించుకుంటున్నారు. ఆవిధంగా తెలంగాణ సమస్య ముందుకొచ్చింది. తెలంగాణ కేవలం ప్రజల సమస్యే అయితే దానికి తెలంగాణ ప్రజాప్రతినిధుల మద్దతు ఉండేది కాదు. ఆ సమస్య తమ అభివృద్ధికి కూడా ఆటంకంగా ఉంటూ, తమ ఆటంకాలు తోలగడానికి ఒక గొప్ప మార్గంగా కనిపిస్తున్నందున దాన్లోకి వారు కూడా దుమికి తమ చేతుల్లోకి తీసుకున్నారు.

   అయితే సంస్కృతి తేడాలు, నిజాం పాలన వలన ఏర్పడిన వెనుకబాటుతనం, భాషలో కొంత తేడా… ఇవన్నీ తెలంగాణ ప్రాంత ప్రజలకు కూడా తెలంగాణ రాష్ట్రం ఒక సమస్యగా మారింది. పెట్టుబడిదారి వర్గాలు ప్రచారం ఏమని చేస్తున్నాయి? తెలంగాణ వస్తే కంపెనీల్లో ఉద్యోగాలన్నీ మనవే అని. రాజధానిలో ఉద్యోగాలన్ని మనవే అని. ఆ ప్రచారం పూర్తి వాస్తవం కాదు. వారు తమ ప్రయోజనాలయిన ప్రత్యేక బడ్జెట్, ఆ బడ్జెట్ లో కేవలం తెలంగాణ సంపన్నులు మాత్రమే (సీమాంధ్ర సంపన్నుల బెడద లేకుండా) సింహ భాగం కొట్టేయగల అవకాశాలు మొదలైనవి మాత్రమే వారికి అనుకూలమైనవి. వాటి బైప్రొడక్టయిన ఉద్యోగాలు కూడా తెలంగాణ పెట్టుబదిదారుల చేతుల్లో ఉంటాయి గనక మేము తెలంగాణోళ్ళకే ఉద్యోగాలిస్తామని హామీ ఇస్తున్నారు. అందులో నిజమెంతో ఆచరణే చెప్పాలి. కానీ ప్రత్యేక రాష్ట్రం వచ్చాక అక్కడి పెట్టుబడుదారుల ప్రయోజనాల కోసం ప్రభుత్వం చేసే ఏర్పాట్లలో అక్కడి ప్రజలు కూడా ప్రయోజనం పొందుతారు. అది అనివార్యం. ప్రధాన ఉత్పత్తిని తీసేటప్పుడు ఉప ఉత్పత్తులను మనం ఆపాలనుకున్నా ఆపలేము. ఆ విధంగా తెలంగాణ ప్రజలకు లబ్ది చేకూరుతుంది. తెలంగాణ రావడంవలన ప్రజల ప్రధాన సమస్యలేవీ పరిష్కారం కావని అవగాహన ఉండి, ఆ విధంగా వాదిస్తున్నవారు కూడా తెలంగాణ కు మద్దతు ఇవ్వడానికి ప్రధాన కారణం ఇదే.

   అంతర్జాతీయ కంపెనీలు (స్వదేశీ, విదేశీ రెండూ) ఎలాగూ అన్ని ప్రాంతాలవారిని ఆదరిస్తాయి, వారి అవసరాన్ని బట్టి. కనుక తెలంగాణలో ఉద్యోగాలు దొరకవు అదొస్తే, అని సీమాంధ్రులు భావించడంలో వాస్తవం లేదు.

   తెలంగాణ ప్రత్యేక రాష్ట్రంలో సంపన్న పెట్టుబడిదారులకు కాంట్రాక్టులు, బడ్జెట్ కేటాయింపులు, తమ కంపెనీలకి విద్యుత్, నీరు, రోడ్లు తదితర మౌలిక సొకర్యాలు తదితరాలు లభిస్తాయి. తెలంగాణ ప్రజలకు నీటి సౌకర్యాలు, స్ధానిక కోటాలో లభించే ఉద్యోగాలు, తెలంగాణ ఉద్యమ ఫలితంగా ప్రాంతీయ అభిమానంతో వచ్చే ఉద్యోగాలు, బడ్జెట్ కేటాయింపుల్లో అతి తక్కువ భాగం, ఉద్యమ నేపధ్యంలో పజా ప్రతినిధుల్ని డిమాండ్ చేయగల అవకాశం ఇవన్నీ లభిస్తాయి. కానీ ఇరు వైపులా సామాన్యప్రజానికి మౌలిక సమస్యలైన కూడు, గుడ్డ, నీడ అలానే కొనసాగుతాయి.

   పోతే ఓట్లు వేసి గెలిపించుకుంటే వారు నిజంగా ప్రజల కోసం పనిచేస్తున్నారా? అసలు ప్రజా ప్రతినిధులు నిజంగా ప్రజాభిమానంతో గెలుస్తున్నవారెందరు? డబ్బులివ్వకుండా, తాగబోయకుండా, కులాల వారీగా ప్రభావితం చేయకుండా, రిగ్గింగ్ చేయకుండా ఒక్క ప్రజాప్రతినిధి ఐనా గెలుస్తాడంటారా? గెలిచిన వాడెవడైనా ఎన్నికల్లొ ఖర్చు చేసినదానికి అనేక రెట్లు సంపాదించకుండా ఉంటున్నారా? రాజకీయ పదవి అనేది ఈరోజుల్లో అక్రమ సంపాదనకు దగ్గరి మార్గం అందుకే పోటీ చేస్తున్నారు. గెలవడానికి ఏదైనా ఛేయడానికి సిద్ధపడుతున్నారు. ఈ నేపధ్యంలో ప్రజా ప్రతినిధులని తమవారుగా సొంతం చేసుకోగల పరిస్ధితి ఇప్పుడు లేదు. గెలిచినవారు కేవలం పెట్టుబడిదారులు, భూస్వాముల కోసమే పని చేస్తున్నపుడు వారిక ప్రజల ప్రతినిధులుగా మిగలరు. ప్రజల్లో ఉన్న అనేక బలహీనతలు, వెనుకబాటుతనం, నిరక్షరాస్యత, కుల భావనలు ఇవన్నీ వారికి ఉపయోగపడుతున్నాయి తప్ప ప్రజలకు నష్టకరంగానే ఉన్నాయి.

   తెలంగాణలో హైవేల వెంటా, హైద్రాబాద్ లోనూ, దాని చుట్టుపక్కల ఉన్న పరిశ్రమలలో అత్యధిక భాగం ఆంధ్రవారివే. ఇది నేను కొత్తగా చెబుతున్నది కాదు. ఆంధ్ర పెట్టుబడుదారులు కూడా చెబుతున్నదే. “మా పెట్టుబడులన్నింటినీ హైద్రాబాద్, చాని చుట్టుపక్కలా పెట్టి తెలంగాణను అభివృద్ధి చేశాము. ఇప్పుడు పొమ్మంటే ఎలా? మేము చేసిన అభివృద్ధి అంతా మీకె చెందాలా? మేము కష్టపడి, రాజధాని అని హైద్రాబాద్ ని అభివృద్ధి చేస్తె ఇప్పుడు వెళ్ళమంటారా?” అడుగుతున్నదెవరు? గుంటూరు, గోదావరి జిల్లాల సంపన్నులే. వారే సీమాంద్ర తరపున ప్రతినిధులుగా మాట్లాడుతున్నారు. అవేవీ మీ దృష్టిని ఆకర్షించలేదా, బొందలపాటిగారూ? వారు చెబుతున్నది వాస్తవం. హైద్రాబాద్ చుట్టుపక్కల, లోపల, హైవేల వెంటా ఉన్న పెట్టుబడులన్నీ వారివే. తెలంగాణ ప్రాంతమే అభివృద్ధి చెందింది అని చెప్పడానికి మేధావులు ఇస్తున్న లెక్కలే మీరు కోరుతున్న లెక్కలు. కాకుంటే వారు చెబుతున్న అభివృద్ధి ప్రజలకు సంబంధించింది కాదు. పరిశ్రమలు, రోడ్లు, విమానాశ్రయాలు, పెద్ద పెద్ద హోటళ్ళు, సినిమాలు, ఎంటర్‌టైన్‌మెంట్ సంస్ధలు, ఫ్లై ఓవర్లు, సిమెంట్ రోడ్లు ఇవన్నీ అభివృద్ధికి ఆనవాళ్ళుగా వారు చెబుతున్నారు. ఆ ఆనవాళ్ళు వేటిలోనూ తెలంగాణకి చెందిన సామాన్య ప్రజానికానికి చోటు లేదు బొందలపాటిగారూ. కేవలం డబ్బున్నవారికే అక్కడ ప్రవేశం. అది పెట్టుబడిదారులకు ఉపయోగపడే అభివృద్ధి తప్ప సామాన్య జన జీవనంలో మార్పులు తెచ్చి అందరికీ సుఖజీవనం ప్రసాదించగల మార్పులు కావవి. రేపు తెలంగాణ వచ్చినా తెలంగాణ ప్రజలకు తెలంగాణ పెట్టుబడిదారుల అభివృద్ధిలో భాగస్వామ్యం లభించదు. కానీ ఆ పేరు చెప్పి రేపు నిలదీయగల అవకాశం ప్రజలకు అదనంగా లభిస్తుంది. ఇక బై ప్రొడక్టు లబ్ది గురించి ముందే చెప్పుకున్నాం.

   మనం ఏ ప్రాంతంలో ఉంటే దానికి అనుకూలంగా ఆలోచించాలని కాకుండా వాస్తవాలెలా ఉన్నాయన్నది పరిశీలించి తదనుగుణంగా స్పందించగల శక్తి మనకు ఉండాలి. వాస్తవాలను తెలుసుకోవడానికి కొంత ఓపిక కూడా కావాలి. అధ్యయనం చెయ్యాలి. ఇవన్నీ ఉన్నపుడు ద్వేష రహితంగా చర్చించుకోగల పరిస్ధితి ఏర్పడుతుంది. వివరాల కోసం కొంచెం ఎక్కువ రాశాను. అన్యధా భావించవలదు.
3. ఎంతో ఓపికతో పొడవైన సమాధానం రాసినందుకు ధన్యవాదాలు శేఖర్ గారూ,
   “ప్రతీ కుటుంబనుండి ఒకరు హైద్రాబాద్ లో ఉన్నారనీ మీ అభిప్రాయం సరైంది కాదని నా అభిప్రాయం”
   మీరు దీనిని లిటరల్ గా తీసుకొన్నట్లున్నారు. నా ఉద్దేశం ఒకప్పటి కంటే ఇప్పుడు ఆంధ్ర లోని కుటుంబాలకు హైదరాబాద్ తో అనుబంధం పెరిగిందనే. ఎస్ సీ , ఎస్ టీ ప్రజానీకం నుంచీ కూడా హైదరాబాద్ లో ఐ టీ నుంచీ, వాచ్ మేన్ ల దాకా పని చేస్తున్న వారు చాలా మంది నాకు తెలుసు.
   “కాని తెలంగాణ పెట్టుబడిదారులు తెలంగాణవారికి, ఆంధ్ర పెట్టుబడిదారులు ఆంధ్ర వారికి ముద్దు అని జనరలైజ్ చేశారు” నేను ఈ వాక్యం మీరు తెలంగాన వారు అనుకొని రాశాను…అవును..తెలంగాణ వారు తమను దోచే/దోయబోయే వారినే ఇప్పుడు నెత్తిన పెట్టుకొంటున్నారు..కాబట్టీ..వారికి “మీ పెట్టుబడి దారులు వేరు..మీ ప్రజలు వేరు..మీ పెట్టుబడి దారులను తిడితే మీరు బాధ పడకండి” అని చెప్పే అర్హత లేదు. ఎందుకంటే..ఏ “కే సీ ఆర్” నో తిడితే వారికి ఇంత బారు కోపం వస్తుంది..మా తెలంగాన ఆత్మ గౌరవం అంటారు. అది మిగిలిన వాళ్ళకు కూడా ఉంటుంది అని విస్మరిస్తారు.

   “ప్రజల్లో ఉన్న అనేక బలహీనతలు, వెనుకబాటుతనం, నిరక్షరాస్యత, కుల భావనలు ఇవన్నీ వారికి ఉపయోగపడుతున్నాయి”
   వీటి లో ప్రాంత భావన కూడా ఒకటి.
   “హైద్రాబాద్ లోనూ, దాని చుట్టుపక్కల ఉన్న పరిశ్రమలలో అత్యధిక భాగం ఆంధ్రవారివే…..”
   ఆంధ్ర వారి పరిశ్రమలలో ఉద్యోగాలు చేస్తున్న అనేక మంది తెలంగాణ వారు ఉన్నారు. ఒక వేళ ఈ పరిశ్రమలు తెలంగాన వారివైతే, ఇప్పటి కన్నా ఏ కొంచెమో తెలంగాణ ఉద్యోగులు పెరుగుతారేమో..కానీ విపరీతం గా మాత్రం పెరగరు. ఇక్కడ “మీ పట్టుబడి దారులు పోయి మా ఎట్టుబడిదారులు రావాలి” అని పచ్చి ప్రాంతీయ వాదం వలననే అనిపిస్తుంది. తెలంగాణ పెట్టుబడి దారులు రావటం వలన ఒరిగేదేమీ ఉండదు.

   “మనం ఏ ప్రాంతంలో ఉంటే దానికి అనుకూలంగా ఆలోచించాలని కాకుండా వాస్తవాలెలా ఉన్నాయన్నది పరిశీలించి తదనుగుణంగా స్పందించగల శక్తి మనకు ఉండాలి”
   ఇది తెలంగాణ వారికి కూడా వర్తిస్తుంది కదా?ఆంధ్ర పెట్టుబడి దారులను తిట్టే మిష తో, ఆంధ్ర ప్రాంతీయులను అనని మాట లేదు. నా ప్రత్యక్ష అనుభవం లోనే ఒక తెలంగాన మనిషి, “నువ్వు హైదరాబాద్ లో ఎందుకుంటున్నవ్?” అని అడిగాడు. దానికి నేను “ఒక మరాఠీ అతనిని చూపించి, “ఇతను ఎందుకు ఉంటున్నాడొ, నేనూ అందుకే ఉంటున్నాను” అని చెప్పుకోవలసి వచ్చింది. తెలంగాణ వాదుల విద్వేషాన్ని మీరు ఇంకా ఎదుర్కొన్నట్లు లేదు. వారు నిష్పాక్షికం గా ఆలోచించినట్లైతే, తెలంగాణ రావటం వలన వారికి ఒరిగేదేమీ ఉండదు, ఒక రకమైన ప్రాంతీయ కుతి తీరిన తృప్తి తప్ప. ఇక చాలా రిస్కులు పొంచి ఉన్నాయి.

   ఓపెన్ మైండ్ తో మాట్లాడే వారి తో మనమూ ఓపెన్ మైండ్ తో నే మాట్లాడితే ప్రయోజనం ఉంటుంది. ముందే కంక్లూజన్స్ చేసుకొని వాటిని సమర్ధించుకొంటానికి మాట్లాడే వారి తో ఓపెన్ గా మాట్లాడితే, అలా ఓపెన్ గా ఉండటం మన బలహీనత అవుతుంది. వారు చివరికి మన్లని వాదనలో ఓడించి చంకలు గుద్దుకొంటారు. తెలంగాణా వాదులు మాట్లాడటానికి ముందు గానే అనేక అభిప్రాయాలను ఏర్పరచుకొని వాటిని సమర్ధించుకోవటానికి మాట్లాడుతారు. అలాంటి వారి తో అదే తరహా లోనే మాట్లాడ వలసి వస్తుంది. వారి తో ఓపెన్ గా మాట్లాడినా, వారు చివరికి నేం కాలింగ్ లోకి దిగుతారు. బందిపోటు దొంగ తో ధార్మిక వాదనలు చేసి అతనిని మార్చగలమా. మనం కూడా అతని లానే ఒక కత్తి పడితేనే అతను దారి లోకి వస్తాడు.
4. “…కోస్తాంధ్ర వెంట హైడ్రో కార్బన్ పరిశ్రమలతో వాన్-పిక్ అనే కోస్తా కారిడార్ నిర్మించి దానికి నీటి సరఫరా కోసం పోలవరం రూపొందించారు. ”
   ఇది అర్ధ సత్యమేనేమో..మీరు లోతు గా పరిశీలించాలంటున్నరు కాబట్టీ చెబుతున్నాను.

   “తెలుగు ఎ.పి గా ఏర్పడకముందు తెలంగాణ ప్రాంత ప్రయోజనాల రక్షణ కోసం కొన్ని ఒప్పందాలు కుదుర్చుకోవడం ఒక వాస్తవం. వాటిని అమలు చేయలేదన్నది కూడా వాస్తవమే.”
   కొంత మాత్రమే వాస్తవం. ఇకపోతే ఏ పీ స్టేట్ లో తెలంగాణ వారికి కొన్ని విషయాలలో అన్యాయం జరిగితే, ఆంధ్ర వారికి కొన్ని విషయాలలో అన్యాయం జరిగింది. ప్రస్తుతం ప్రత్యేక తెలంగాన అంటున్నారు కాబట్టీ తెలంగాణ కి జరిగిన అన్యాయాలు లైం లైట్ లోకి వస్తున్నాయి.
   ..ఆంధ్ర కి జరిగిన అన్యాయాలలో, అక్కడ పరిశ్రమలను అభివృధ్ధి చేయక పోవటం, రాజధాని లోకూడా ప్రభుత్వ ఉద్యోగాలు చేయనీయక పోవటం, ఐ ఐ టీ, ఆర్ ఈ సీ వంటి సంస్థలన్నీ తెలంగాణ లోనే పెట్టటం, ఇటువంటివి.. ప్రత్యేక ఆంధ్ర ఉద్యమం అంటూ ఒకటి వస్తే ఇలాంటి సవా లక్ష అన్యాయాలు రాజకీయ నాయకుల సహకారం తో వింత రంగులు వేసుకొని, పెద్ద భూతాలంత ఆకారం( వాటి అసలు ఆకారం చిన్నదైనా) లో బయట పడతాయి. మీరు స్టాక్ హోం సిండ్రోం కి తావిస్తున్నారేమో! అందరూ తెలంగాణ కి అన్యాయం జరిగిందనుకొంటున్నారు కాబట్టీ జరిగే ఉండాలి అనుకోవటం.
5. కోస్తా కారిడార్ కోసమే ప్రధానంగా పోలవరం రూపుదిద్దుకుందనడం పూర్తి వాస్తవమే. అనుమానం లేదు. ప్రస్తుతం కోస్తా కారిడార్ వెనక్కి పోయినట్లు కనిపిస్తోంది. అందుకే పోలవరం కూడా వెనక్కి వెళ్ళీంది. రాజశేఖరరెడ్డి ఉన్నట్లయితే వాన్‌పిక్ (వాడరేవు అండ్ నిజాంపట్నం పోర్ట్ & ఇండస్ట్రియల్ కాంప్లెక్స్) ఉధృతంగా సాగుతుండేది. వాన్‌పిక్ డాట్ ఒఆర్‌జి వెబ్‌సైట్ ఓసారి చూడండి. కొంత అర్ధమయ్యే అవకాశం ఉంది. పోలవరం వాన్‌పిక్ కోసమే అని అధికారికంగా చెప్పరు. గోదావరి నీరు కృష్టకి మళ్ళించి కోస్తా ప్రజల వినియోగం కోసం అని చెప్పారు కాని అది పైకి చెప్పేది. అసలు లక్ష్యం కోస్తా కారిడార్ వెంట విదేశీ పరిశ్రమలు వస్తే వాటి నీటి అవసరాల కోసం పోలవరాన్ని డిజైన్ చేశారు. తెలంగాణ ఉద్యమం, రాజకీయ అస్ధిరత, పక్క రాష్ట్రాల అభ్యంతరాల వలన ఆ ప్రాజెక్టు తాత్కాలికంగా వెనక్కి పోయింది. ఈ సమస్యలు సెటిలైతే మళ్లీ రంగం మీదికి వస్తుంది.

   తెలంగాణ ఎ.పి లో కలిసి పోవడానికి ఇచ్చిన ఒప్పందాలను వేటినీ అమలు చేయలేదు. మీరు కొంత వాస్తవం అంటున్నారు గనక అమలైన ఒప్పందాల గురించి చెబితే తెలుసుకోవడానికి పనికొస్తుంది.

   ఆంధ్రలో పరిశ్రమలు అభివృద్ధి చేయడానికి కారణం ఇక్కడ అందుబాటులో ఖనిజ వనరులు లేకపోవడమే. మేజర్ ఖనిజ వనరులు తెలంగాణలో ఉన్నాయి. నా సమాధానంలో రాశాను, కోస్తాలో ఖనిజ వనరులు ఉన్నట్లయితే కోస్తా ధనికులు తెలంగాణకి వెళ్ళేవారు కాదని. పెట్టుబడిదారులు పెట్టుబడికి అనువైన చోటుకే వెళ్తారు. ఖనిజాల లభ్యత, రవాణా, జాతీయ అంతర్జాతీయ సంబంధాలకు అనువైన వాతావరణం… ఇలాంటివి. అవి తెలంగాణలో అధికంగా కనపడ్డాయి గనక అక్కడికి వెళ్ళారు. పెట్టుబడి లాభాల కోసం వెళ్ళి వాళ్ళని ఉద్ధరించడం కోసం వెళ్ళాం అంటున్నారు. రాజధానిలో ప్రభుత్వ ఉద్యోగాలు చేయనీక పోవడం ఎప్పుడు జరిగింది? ఇప్పుడు కె.సి.ఆర్ లాంటి వారి మాటలు కొలబద్ద కానే కాదు. నిజానికి కె.సి.ఆర్ పలుకుబడి ఆయనది కాదు. తెలంగాణ ప్రజల్లో ఉన్న ఆకాంక్ష ఆయన్ని కాపాడుతోంది. 2009 ఎన్నికల్లో ఆ పార్టీ బతుకేంటో అర్ధమైంది కదా. తెలంగాణ డిమాండ్ అంటే టి.ఆర్.ఎస్, కె.సి.ఆర్ అని భావించడం కరెక్టు కాదు. వారి వాగుడు వారినలా పత్రికల్లొ నిలుపుతోంది. పార్టీల్లో కూడా దానికంటే గొప్ప పార్టీ కనపడక వాళ్ళకి ఈ మధ్య ఓట్లు దక్కుతున్నాయి తప్ప అది వారి ప్రతిష్ట కాదు.

   అన్యాయాల విషయానికి వస్తే అన్ని ప్రాంతాల వారికి కామన్ అయిన అన్యాయాలు చాలానే ఉన్నాయి. తెలంగాణ ఉద్యమం సందర్భంగా కామన్ అన్యాయాలు కూడా ప్రస్తావనకు వస్తున్నాయి. ఉద్యమాల సమయంలో అది సహజం. కాని తెలంగాణ ప్రాంతానికే పరిమితమైన కొన్ని అన్యాయాలు ఉన్నాయి. వాటిలో నీటి పారుదల సౌకర్యాలు ప్రధానం. నీళ్ళు అక్కడ పారుతున్నా ప్రాజెక్టులు లేక వినియోగించుకోలేక పోయారు. ఎత్తు ప్రాంతం కాబట్టి ప్రారంభంలొ ప్రాజెక్టుల నిర్మాణానికి ఆసక్తి చూపలేదు. తెలంగాణ వేరు రాష్ట్రంగా కొనసాగినట్లయితే ఏదో ఒక పద్దతిలో నీటి పారుదలకు ప్రయత్నించేవారు. ఉమ్మడిగా ఉండడంతో నీటి పారుదలకి అనువగా ఉన్న ప్రాంతంపైన కేంద్రీకరించడం జరిగింది. ఆ ప్రాజెక్టులు ఎ.పి ప్రాజెక్టులుగా పిలవబడ్డాయి. కేంద్ర దృష్టిలో అవి ఎ.పి ప్రాజెక్టులు. ఆ విధంగా తెలంగాణకి అన్యాయం జరిగింది. ఈ అన్యాయం కోస్తా ప్రజలందరి వలనా జరగలేదు. ఈ విషయాలన్ని మాట్లాడుకున్న పెద్ద మనుషులు ఆచరణలో పట్టించుకోక పోవడం వలన జరిగింది.

   స్టాక్ హోం సిండ్రోం కోసం మీవైపు నుండి కూడా ఓసారి చూడండి. నేను తెలంగాణ, సీమాంధ్రల పైన కొన్ని పుస్తాకాలు చదివాను. ఒప్పందాలు చదివాను. వాటి అమలు తీరు తెన్నుల గురించి వివిధ రచయితలు రాసిన ఆర్టికల్స్, పుస్తకాలు చదివాను. ఉత్పత్తి సంబంధాలు ఎదుగుదల, విస్తృతి, ఉత్పత్తి సాధనాల యాజమాన్యం లాంటి అంశాల పైన కేంద్రీకరించి అధ్యయనం చేశాను. వాటి ఆధారంగానే సాపేక్షికంగా తెలంగాణకి అన్యాయం జరిగిందన్న అవగాహనకి వచ్చాను.
6. మీరు చెప్పిన వాంపిక్ సైట్ చూశాను. ఇంకా గూగుల్ చేసి చూశాను. కానీ వాంపిక్ కోసం మాత్రమే పోలవరం కడుతున్నారన్న ఆధారం నాకు కనపడలేదు.
   “..కాని అది పైకి చెప్పేది. అసలు లక్ష్యం కోస్తా కారిడార్ వెంట విదేశీ పరిశ్రమలు వస్తే వాటి నీటి అవసరాల కోసం పోలవరాన్ని డిజైన్ చేశారు.”
   మీకు అసలైన ఇన్సైడర్ సమాచారం ఎలా తెలిసింది. ఇది మీ గెస్ మాత్రమేనా. గెస్ చేయటం లో తప్పు లేదు. కాని “మన అభిప్రాయాలను బట్టీ, ఇంక్లినేషన్ ను బట్టీ మన గెస్ ఉంటుంది” అనేదాన్ని దృష్టి లో పెట్టుకోవాలి అనుకొంటా.
   మొత్తానికి వాంపిక్ కోసమే పోలవరం అనేదాన్ని నేను తప్పు అని నిరూపించలేను. కాబట్టీ మీరు చెప్పింది అవాస్తవమనీ చెప్పలేను, వాస్తవము అనటానికి కూడా ఆధారాలు కనిపించటం లేదు.
   “మీరు కొంత వాస్తవం అంటున్నారు గనక అమలైన ఒప్పందాల గురించి చెబితే తెలుసుకోవడానికి పనికొస్తుంది.”
   నేను పెద్ద గా డాక్యుమెంట్లూ అవీ చదవలేదు గానీ శ్రీకృష్ణ రిపోర్ట్ లో కొన్ని ప్రాజెక్ట్లకు అన్యాయం జరిగిన మాట నిజమే అనీ, కొన్ని ప్రాజెక్ట్లూ, ఒప్పందాలు సరిగానే జరిగాయి లేక తరువాత సరిదిద్ద బడ్డాయి అనీ చదివినట్లు గుర్తు. ఇప్పుడు ఆ రిపోర్ట్ ని బయటకు తీసి చర్చించే ఓపిక లేదు. బాంబే అల్లర్ల గురించి రిపోర్ట్ ఇచ్చిన దగ్గరి నుంచీ నాకు శ్రీకృష్ణ అంటే పాజిటివ్ అభిప్రాయం ఉంది కాబట్టీ శ్రీకృష్ణ కమిటీ చెప్పినది కరక్ట్ అనుకొంటున్నాను.
   “స్టాక్ హోం సిండ్రోం కోసం మీవైపు నుండి కూడా ఓసారి చూడండి. నేను తెలంగాణ, సీమాంధ్రల పైన కొన్ని పుస్తాకాలు చదివాను. ఒప్పందాలు చదివాను. వాటి అమలు తీరు తెన్నుల గురించి వివిధ రచయితలు రాసిన ఆర్టికల్స్, పుస్తకాలు చదివాను. ఉత్పత్తి సంబంధాలు ఎదుగుదల, విస్తృతి, ఉత్పత్తి సాధనాల యాజమాన్యం లాంటి అంశాల పైన కేంద్రీకరించి అధ్యయనం చేశాను. వాటి ఆధారంగానే “సాపేక్షికంగా” తెలంగాణకి అన్యాయం జరిగిందన్న అవగాహనకి వచ్చాను.”
   ఏమైనా నేను సమైక్య వాదిని. దీని వలన నాకు వ్యక్తి గతం గా వచ్చేది ఏమీ లేదు. విడిపోతేనే నాకు వ్యక్తి గతం గా లాభం. కానీ ఇతర రాష్ట్రాలలో ఉండి, తమిళుల, కన్నడిగుల భాషా భావన చూసినాక, తెలుగు వారందరూ ఒకే రాష్ట్రం గా ఉండాలి అన్న బలమైన భావం కలుగుతుంది. అలానే తెలంగాన కి అన్యాయం “జరిగితే” మిగిలిన వారు అది మళ్ళీ పునరావృతం కాకుండా చూడాలి. ముఖ్య మంత్రిని తెలంగాణ వాడిని చెయ్యండి, 100% కాబినెట్ లో తెలంగాన మంత్రులను పెట్టండి, ఆంధ్ర ప్రదేష్ కు తెలంగాణ అని పేరు పెట్టంది…కానీ తెలుగు వారంతా కలిసి ఉండాలి.
   నిత్యం కొట్టుకొనే తెలుగు ప్రాంతాల వారిని చూస్తే, ఇతర భాషల వారి ముందు తల తీసినట్లు గా ఉంటుంది. తెలుగు వారు కొట్టుకొని కేంద్రానికి వెళ్ళి వాళ్ళని తగువు తీర్చమని అడిగేదేమిటి? ఎంత సిగ్గుచేటు? కేంద్రం వాడు విషయం నాంచుతున్నాడని నిందించటం ఏమిటి? ముందు మనం సరి గా ఉంటే, ఎవడో ముకర్జీ, పటేల్, సోనియమ్మ లు ఎందుకు సీన్ లోకి వస్తారు?
7. “స్టాక్ హోం సిండ్రోం కోసం మీవైపు నుండి కూడా ఓసారి చూడండి. నేను తెలంగాణ, సీమాంధ్రల పైన కొన్ని పుస్తాకాలు చదివాను. ఒప్పందాలు చదివాను. వాటి అమలు తీరు తెన్నుల గురించి వివిధ రచయితలు రాసిన ఆర్టికల్స్, పుస్తకాలు చదివాను. ఉత్పత్తి సంబంధాలు ఎదుగుదల, విస్తృతి, ఉత్పత్తి సాధనాల యాజమాన్యం లాంటి అంశాల పైన కేంద్రీకరించి అధ్యయనం చేశాను. వాటి ఆధారంగానే “సాపేక్షికంగా” తెలంగాణకి అన్యాయం జరిగిందన్న అవగాహనకి వచ్చాను.”
   మీ పరిజ్ఞానాన్ని గౌరవిస్తాను. స్టాక్ హోం సిండ్రోం కి నేనూ అతీతుడిని కాదు. మీరు “సాపేక్షికం” గా తెలంగాన కి అన్యాయం జరిగింది అంటున్నారు కాబట్టీ మీతో నాకు పేచీ లేదు.
8. విశేఖర్ గారు, మీ తాటికొండలోనే కాదు, మా తుంబిగూడ (రాయగడ జిల్లాలో) నుంచి కూడా ఎవరూ రాజధాని నగరమైన భుబనేశ్వర్‌కి వలస వెళ్ళలేదు. వాళ్ళందరూ ఒకటీ, ఒకటిన్నరా ఎకరం భూములని దున్నుతున్న ఆదివాసీలు. ఆ గ్రామాన్ని రాయగడ మునిసిపాలిటీలో విలీనం చేసిన తరువాత వేరే ప్రాంతాల నుంచి ఒకరిద్దరు కోమట్లు ఆ గ్రామానికి వచ్చారు. ఆ గ్రామం విడిచి పట్టణానికి వెళ్ళింది మాత్రం మా కుటుంబం నుంచి ముగ్గురు. అది కూడా ఆంధ్రాకి వలస వచ్చారు కానీ ఆ రాష్ట్ర రాజధానికి మాత్రం వెళ్ళలేదు.
9. బొందలపాటి గారు, ఆర్థిక పరిస్థితి మారిన తరువాత ఎవరూ కులం గురించి పట్టించుకోరు. మాది ఆదివాసీ కుటుంబమే కానీ మేముంటున్నది విశాఖపట్నంలో, అది కూడా నెలకి తొమ్మిది వేలు అద్దె కట్టే ఇంటిలో. హైదరాబాద్ ఐటి కంపెనీలో పని చేసే దళితుడు కూడా లింగంపల్లి దగ్గర ఇంతే ఖరీదైన ఇంటిలో ఉంటాడు. ఐదు వందల రూపాయల అద్దె గుడిసెలో ఉండే పేద దళితుని పక్కన మిడిల్ క్లాస్ దళితుడు ఎవడూ కూర్చోడు. ఆర్థిక పరిస్థితి మారిన తరువాత ఎవరైనా కులానికి దూరంగా జరిగిపోతారు కనుక హైదరాబాద్ ఐటి కంపెనీలలో ఏయే కులాలవాళ్ళు ఉన్నారనేది అనవసర విషయమే. కేవలం వేలు లేదా లక్షల మందికి లాభం కలిగించే శక్తి ఉన్న ఐటి పరిశ్రమ వల్ల రాష్ట్ర పరిస్థితి మౌలికంగా ఏమీ మారదు.
10. telangaavadinayina naaku teleeni chaalaa vishayaalu telusukogaligaanu. samaykavadula badanu ardam chesuko galigaanu

స్పందించండి

మీ వ్యాఖ్యను ఇక్కడ రాయండి...

Fill in your details below or click an icon to log in:

ఈమెయిలు (తప్పనిసరి) (Address never made public)

పేరు (తప్పనిసరి)

వెబ్‌సైటు

You are commenting using your WordPress.com account. ( నిష్క్రమించు /  మార్చు )

You are commenting using your Facebook account. ( నిష్క్రమించు /  మార్చు )

రద్దుచేయి

Connecting to %s

దీనిపై కొత్త వ్యాఖ్యలను నాకు ఈమెయిలు ద్వారా తెలియజేయి.

కొత్త టపాలు వచ్చినపుడు నాకు ఈ-మెయిల్ పంపించు.

Δ