కేంద్ర ప్రభుత్వం రాజ్యాంగాన్ని ఉల్లంఘించిందంటూ వీరాలాపాలు వల్లిస్తూ కేంద్రంపై యుద్ధం ప్రకటించిన ఒంటరి యోధుడిలా జనం ముందు నిలబడ్డ ముఖ్యమంత్రి కిరణ్ కుమార్ రెడ్డి కాంట్రాక్టు నిబంధనలకు విరుద్ధంగా ప్రజా ధనాన్ని కాంట్రాక్టర్లకు దొడ్డిదారిన అప్పజెప్పడానికి సిద్ధపడుతున్న వైనం ఇది. ముఖ్యమంత్రి చర్యలను ఆర్ధిక శాఖ అభ్యంతరం చెబుతున్నా వినకుండా 15 నుండి 20 వేల కోట్ల వరకు కాంట్రాక్టర్లకు అప్పనంగా అప్పజెప్పే నిర్ణయం ముఖ్యమంత్రి తీసుకున్నారని, ఆర్ధిక శాఖ అభ్యంతరాలను నివృత్తి చేసే సమావేశం సోమవారం జరగనుందని ఈ నాడు పత్రిక సమాచారం.

మీరే చూడండి. (బొమ్మపై క్లిక్ చేస్తే పెద్ద సైజులో చూడొచ్చు.) ఈ వార్త ఆదివారం (జనవరి 26) ఈనాడులో ప్రచురితం అయింది.

రాజ్యాంగం సంగతి తర్వాత. ముందు జనం డబ్బును కాపాడడానికి సి.ఎం సిద్ధపడితే అదే పదివేలు కాదా!

సవాలక్ష పేర్లతో కాంట్రాక్టర్లకు ప్రజాధనం కట్టబెట్టి ఆ తర్వాత వారి నుండి పర్సెంటేజీలు వసూలు చేసే అవినీతి కార్యం మొదట మహారాష్ట్ర కాంగ్రెస్ ప్రభుత్వం మొదలు పెట్టింది. అసలు ప్రాజెక్టులు మొదలు పెట్టకుండా కాలవలు తవ్వి, మట్టి పనులు చేసి వేలాది కోట్లు కాజేసిన పుణ్యాన్ని కాంగ్రెస్-ఎన్.సి.పి నేతృత్వంలోని మహారాష్ట్ర ప్రభుత్వం కట్టుకుంది. ఈ దోపిడీ పద్ధతి అక్కడి నుండి ఆంధ్ర ప్రదేశ్ లో రాజశేఖర రెడ్డి ప్రభుత్వం వరకు విస్తరించి చివరికి మన రాజ్యాంగబద్ధ సి.ఎం దాకా పాకిందన్నమాట!