Photo: Deccan Chronicle

ఒక అమ్మాయి జీవితంలో సంతోషం నింప వలసిన ప్రేమ, కాలకూట విషాన్ని విరజిమ్మి చివరికి ఆ జీవితాన్నే బలిగొన్న విషాదాంతం ఇది. ‘ప్రేమ’ రూపంలో వ్యక్తమయిన ‘పురుష దురహంకారం’, వినోదిని తిరస్కారంతో అసలు రంగు వెల్లడించుకుని జడలు విప్పిన ఉన్మత్తంతో ‘యాసిడ్ దాడి’గా ప్రతీకారం తీర్చుకుంది. ఫలితంగా మూడు నెలల పాటు తీవ్ర శారీరక, మానసిక వేదన అనుభవించిన వినోదిని మంగళవారం శాశ్వతంగా కన్నుమూసింది. మెడ, కళ్ళు, చెవులు భాగాలను తీవ్రంగా కాల్చుకుతిన్న యాసిడ్ తన ప్రభావాన్ని చివరి వరకు కొనసాగించడంతో ఆమె శరీరంలోని ప్రోటీన్లు బాగా పడిపోయి మరణానికి దారి తీసిందని చెన్నైలోని అత్యున్నత స్థాయి బర్న్స్ ఆసుపత్రి కలిగి ఉన్న కిల్పౌక్ మెడికల్ కాలేజీ నిపుణులు తెలిపారు.

పుదుచ్చేరి కేంద్ర పాలిత ప్రాంతంలోని కరైకల్ నివాసి అయిన 23 సంవత్సరాల వినోదిని నవంబరు 14 తేదీన యాసిడ్ దాడికి గురయింది. బి.టెక్ గ్రాడ్యుయేట్ అయిన వినోదిని చెన్నై నగరంలో ఒక ప్రైవేటు కంపెనీలో ఉద్యోగం చేస్తోంది. సైదాపేట లోని వర్కింగ్ వుమెన్స్ హాస్టల్ లో ఆమె నివాసం. ఆమె తండ్రి జయపాల్ కరైకల్ లోని ఒక ప్రైవేటు పాఠశాల వాచ్ మెన్ గా పని చేస్తున్నాడు. సురేష్ అలియాస్ అప్పు అని యువకుడు వినోదిని తండ్రికి పరిచయస్ధుడు. నిర్మాణ కూలిగా పని చేసే సురేశ్ జయపాల్ తో స్నేహం పెంచుకుని ఆయనకి కొంత డబ్బు అప్పుగా కూడా ఇచ్చాడు. ఆ పరిచయంతో వినోదినిని పెళ్లి చేసుకుంటానని సురేష్ చేసిన ప్రతిపాదనను వినోదిని కుటుంబం తిరస్కరించింది.

దీనితో పగ పెంచుకున్న సురేష్ అవకాశం కోసం ఎదురు చూశాడు. దీపావళికి తల్లిదండ్రులు, బంధువులను చూడడానికి వినోదిని కరైకల్ వచ్చింది. నవంబరు 14 తేదీన తిరిగి చెన్నై బయలుదేరి తండ్రితో కలిసి కరైకల్ లో బస్టాండుకు నడిచి వెళ్తోంది. చెన్నైకి వెళ్ళే బస్సు ఎక్కుతున్న సమయంలో సురేష్ దాడి చేసి నత్రజని ఆమ్లాన్ని వినోదిని ముఖం పైకి వెదజల్లాడు. ఆమె తండ్రి కొద్దిపాటి గాయాలతో తప్పించుకోగా వినోదిని తీవ్రంగా గాయపడింది. ముక్కు, చెవులు, కళ్ళు, గొంతు, చేతులపైన పడిన యాసిడ్ ఆమె చూపును, ఊపిరి మార్గాన్ని దెబ్బతీసింది.

“వినోదిని తండ్రి అతని డబ్బుని పూర్తిగా తిరిగి చెల్లించినా సురేశ్ వెంటపడడం మానలేదు. ఒకసారి పోలీసులకి ఫిర్యాదు కూడా చేశాము. పోలీసులు అతన్ని హెచ్చరించినా అవకాశం వచ్చినప్పుడల్లా ఆమె తండ్రిపై ఒత్తిడి తేవడం కొనసాగించాడు. కానీ వినోదిని పైన దాడి చేస్తాడని మేము ఎప్పుడూ అనుకోలేదు. పెళ్లి చేసుకుంటానని చెప్పినపుడు ఆమె ఉన్నత చదువుని గుర్తు చేసి అది సాధ్యం కాదని గట్టిగా చెప్పాము. అతని ప్రయత్నాలు విరమించుకోవాలని చెప్పాము” అని వినోదిని బాబాయి రమేష్ చెప్పాడు.

దాడి తర్వాత కరైకల్ లోనే ఉన్న ఒక ప్రైవేటు ఆసుపత్రికి హుటాహుటిన తరలించారు. అక్కడ ఫస్ట్ ఎయిడ్ చేశాక పుదుచ్చేరి లోని ‘జిప్ మర్’ తీసుకెళ్లాలని వారు సూచించారు. నవంబర్ 15 తేదీన చెన్నైలోని ప్రభుత్వ కిల్పౌక్ ఆసుపత్రికి తరలించారు. కిల్పౌక్ ఆసుపత్రి కాలిన గాయాలను నయం చేయడంలో ప్రసిద్ధి చెందిన ఆసుపత్రి. యాసిడ్ దాడి బాధితులకు చికిత్స చేయడంలో ప్రత్యేకత పొందింది. కానీ యాసిడ్, వినోదిని శరీరం లోపలి భాగాలకు విస్తరించి లోతుగా తినేయడంతో ఆమె క్రమంగా అతి ముఖ్యమైన ప్రోటీన్ లను కోల్పోతూ వచ్చింది. ముక్కు, కళ్ళు, చెవులకు తిరిగి పూడ్చలేని విధంగా నష్టం జరిగింది. ఆమెకు వైద్యం చేస్తున్న డాక్టర్ జయరామన్ రిటైర్ కావడంతో ఆయన వద్దనే చికిత్స తీసుకుంటానని పట్టుబట్టిన వినోదిని కోరిక మేరకు ఆయన పని చేసే ప్రైవేటు ఆసుపత్రికి ఆమెను తరలించారు. వినోదిని గాయాలు మానడానికే డాక్టర్లు అనేక వారాల పాటు ఎదురు చూశారు. గాయాలకు డ్రస్సింగ్ చేస్తూ, గాయాలు మానితే జరిగిన నష్టం ఏపాటిదో అంచనా వేయడానికి ఎదురు చూశారు. కానీ వారం లోపే ఆమె రెండు కళ్లకూ చూపు తిరిగి రాదని డాక్టర్లకు అర్ధం అయింది.

ది హిందూ ప్రకారం వినోదినిని పదే పదే ఆసుపత్రులు మార్చారు. ఆమె తల్లిదండ్రుల ఆర్ధిక పరిస్ధితి దీనికి కారణం అని తెలుస్తోంది. ప్రారంభంలో చికిత్స ఆలస్యం కావడం వలన యాసిడ్ గాయాలు తీవ్ర స్థాయికి చేరాయని కూడా తెలుస్తోంది. వినోదినికి చికిత్స చేస్తున్న ప్లాస్టిక్ సర్జన్ డాక్టర్ జయరామన్ ప్రకారం కాలిన గాయాలు వాటికి గల కారణాలను బట్టి ప్రధానంగా మూడు రకాలు. మంటలు, విద్యుత్ వల్ల గాయాలయితే వెనువెంటనే ప్రభావం కలుగుతుంది. కానీ యాసిడ్ లాంటి రసాయన పదార్ధాల వలన కాలితే అవి క్రమ క్రమంగా ప్రభావం చూపుతాయి. యాసిడ్ సాంద్రతను బట్టి మొదట చర్మం తర్వాత క్రమంగా కండ, కొవ్వు కూడా తినేస్తుంది.

రోదిస్తున్న తండ్రి జయపాల్ -ది హిందూ

కాలిన గాయాలు 40 శాతం దాటితే తీవ్రంగా గాయపడినట్లు లెక్క. గాయాలు లోతైనవి అయితే 30 శాతం కాలినా మరణం సంభవించవచ్చు. లోతు గాయాలకు తొడ భాగం నుండి మాంసం, చర్మం సేకరించి కాలిన భాగాలను పునర్నిర్మించే సర్జరీ తప్ప మరో మార్గం లేదు. వినోదినికి ఈ రకం గాయాలు కావడంతో ఆమె పరిస్ధితిని సరిగా అంచనా వేయడం డాక్టర్లకు సాధ్యం కాలేదు. కోలుకున్నట్లే కనిపించిన వినోదిని లోతు గాయాలు ప్రోటీన్లు బాగా కోల్పోయేందుకు దారి తీసి గుండెపోటు సంభవించింది. “ఆమె గుండెను పునరుద్ధరించడానికి మేము రెండుసార్లు ప్రయత్నించాము. రక్తం కూడా ఎక్కించాం. కానీ ఆమె శరీరానికి సరైన పోషక పదార్ధాలు అందకపోవడంతో ప్రోటీన్ల స్థాయి బాగా పడిపోయింది” అని డాక్టర్ జయరామన్ తెలిపాడు.

వినోదిని మరణం ఆమె కుటుంబ సభ్యులకు తీవ్రమైన విషాదాన్ని మిగుల్చింది. తనను కూడా చంపెయ్యమని ఆమె తల్లి డాక్టర్లను బతిమాలుతున్న దృశ్యం చూపరులను కంటతడి పెట్టించింది. ఆమెపై దాడి చేసి పొట్టనబెట్టుకున్న సురేష్ ని ఉరి తీస్తే సరిపోదని, తన కూతురు లాగా అతను కూడా తీసుకుని తీసుకుని చనిపోయేలా చేయాలని వినోదిని తండ్రి నేలకు కూలబడి రోదించిన దృశ్యం అందరినీ కలచివేసింది. “ఆమెకు పోస్ట్ మార్టం చేయొద్దు. వాడు ఆమెని ఇప్పటికే తీవ్రంగా నాశనం చేశాడు. ఇంకా నాశనం చెయ్యడం మాకు ఇష్టం లేదు. డాక్టర్లు ఆమెను బతికించలేక పోయారు. ఇక పోస్ట్ మార్టం చేసి ఏమి లాభం?” అని ప్రశ్నిస్తూ వినోదిని బాబాయి రమేష్ రోదిస్తూ పోస్ట్ మార్టం కు అడ్డుపడ్డాడు. డాక్టర్లు, బంధువులు ఎంతో నచ్చజెప్పిన మీదట ఆయన చివరికి అంగీకరించాడు. నగరంలోని వివిధ కాలేజీల నుండి విద్యార్ధినీ, విద్యార్ధులు వినోదిని ఇంటికి వచ్చి సంతాపం తెలిపారు. ఆమెతో పని చేసే ఉద్యోగులు కూడా అక్కడికి వచ్చి విషాద పర్యంతం అయ్యారు.

సురేష్ పైన నమోదు చేసిన కేసును హత్య కేసుగా మార్చుతున్నట్లు పోలీసులు తెలిపారు. కానీ ఆడపిల్లలకు ప్రేమోన్మాదుల నుండి రక్షణ కల్పించే సామాజిక వాతావరణం ఏర్పడనంత వరకు యాసిడ్ దాడులకు, ఇతర లైంగిక అత్యాచారాలకు ఇప్పట్లో ముగింపు రావడం అసాధ్యం. యువతీ, యువకుల్లో ప్రేమ భావనల పట్లా, సహజసిద్ధ ఆకర్షణ పట్లా ఆరోగ్యకరమైన అవగాహన కలుగజేసే వాతావరణం సమాజంలో లేదు. “నాకు దక్కనిది, ఇంకెవ్వరికీ దక్కడానికి వీలు లేదు” అంటూ ఆడ పిల్లలను ప్రాణం, మనసు, హృదయం, మెదడు ఉన్న వ్యక్తిగా గుర్తించని దురహంకార స్వభావాలను పెంచి పోషించే సంస్కృతి మన పిల్లల చుట్టూ వ్యాపించి ఉంది. సినిమాలు, పాటలు తదితర కళారూపాల్లో కూడా మహిళా వ్యతిరేక భావజాలానికి ఆజ్యం పోసే భావనలు చొప్పించబడుతున్నాయి. ఈ నేపధ్యంలో చూసినపుడు మరణ శిక్షలు ప్రాణాలు తీస్తాయే తప్ప భావజాలాన్ని మార్చలేవు కనక కఠిన శిక్షలు పరిష్కారంలో కేవలం ఒకానొక భాగం అని మాత్రమే అర్ధం అవుతుంది. మరింత మంది కరైకల్ సురేశ్ లు, గుంటూరు మనోహర్ లు తయారు కానీ సమాజమే ఆడపిల్లలపై అఘాయిత్యాలకు శాశ్వత పరిష్కారం కాగలదు.