Cartoon: roundtableindia.co.in

కుల వివక్షతో ఆలయ పాలక సిబ్బంది పాల్పడుతున్న వేధింపులకు తట్టుకోలేక తమిళనాడులో 23 సంవత్సరాల దళిత పూజారి బలవన్మరణానికి పాల్పడ్డాడు. పూజారి పదవినుండి తప్పుకోవాలనీ, అసలు గుడిలోకే రాకూడదనీ పాలక సిబ్బంది వేధించడంతో దళిత పూజారి ఎస్.నాగముత్తు మూడు నెలల క్రితం పోలీసులకు ఫిర్యాదు చేశాడు. పోలీసులు కేసు పెట్టకుండా పట్టించుకోక పోవడంతో ఒక స్వచ్ఛంద సంస్ధ సాయంతో కోర్టుకి కూడా వెళ్ళాడు.  వేధింపులపై కేసు నమోదు చేసి విచారణ చేయాలని కోర్టు ఆదేశాలిచ్చినా వేధింపుల్లో మార్పులేకపోవడంతో నాగముత్తు ఆత్మహత్య లేఖ రాసి చనిపోయాడని ది హిందూ తెలిపింది.

ధేని జిల్లా, పెరియాకుళం సర్కిల్, టి.కళ్లుపట్టి గ్రామంలోని కైలాసనాధ దేవాలయంలో ఎస్.నాగముత్తు గత ఏడేళ్లుగా పూజారిగా పని చేస్తున్నాడు. ప్రధాన పూజారికి సహాయకుడుగా పనిచేసే నాగముత్తు ఆయన లేనపుడు ప్రధాన బాధ్యతలు కూడా నిర్వర్తించేవాడు. దళితుడు పూజారిగా ఉండడం ఏమిటని కొద్ది నెలలుగా భక్తజనం అభ్యంతరం పెడుతున్నారని తెలుస్తోంది. నాగముత్తు వలన భక్తులు గుడికి రావడానికి జంకుతున్నారని కనుక కనీసం పండగ దినాల్లోనూ, ఇతర పుణ్య దినాల్లోనూ పూజలనుండి అతను దూరంగా ఉండాలని ఆలయ పాలక సిబ్బంది ఆదేశాలిచ్చారు.

ఆలయ కమిటీ ఆదేశాలని నాగముత్తు తిరస్కరించాడు. ఏ ప్రతిపదికపైన తనను అడ్డుకుంటారని ప్రశ్నించాడు. నాగముత్తు తిరుగుబాటుని పెద్దలు సహించలేకపోయారు. తమనే ప్రశ్నిస్తావా అంటూ నాగముత్తుని కమిటీ సిబ్బంది చితకబాదారు. తనను కొట్టినవారిపై నాగముత్తు ధెంకరై పోలీసు స్టేషన్ లో ఫిర్యాదు చేశాడు. ఎఫ్.ఐ.ఆర్ నమోదు చేయాలని పోలీసులను కోరాడు. ఫిర్యాదు తీసుకున్న పోలీసులు నాగముత్తుకి రశీదు కూడా ఇచ్చారు. అయితే పోలీసులు కేసులు పెట్టలేదు. ఈ లోపు ఫిర్యాదుని వెనక్కి తీసుకోవాలని నాగముత్తు తండ్రి సుబ్బరాజుని అగ్రకులాలకు చెందిన పెద్దలు డిమాండ్ చేశారు. పెరియాకుళం పంచాయితీ ప్రెసిడెంటు కూడా అలా డిమాండ్ చేసినవారిలో ఉన్నాడు. అప్పటికి కూడా నాగముత్తు ఒప్పుకోలేదు.

నాగముత్తు ఈసారి డి.ఎస్.పి ని కలిశాడు. తన ఫిర్యాదుపై చర్యలు తీసుకోవాలని కోరాడు. కేసు నమోదు చేయడానికి బదులు డి.ఎస్.పి కూడా ఫిర్యాదుని వెనక్కి తీసుకోవాలని నాగముత్తుకి సలహా ఇచ్చాడు. పోలీసులపై నమ్మకం కోల్పోయిన నాగముత్తు మధురై నుండి పని చేసే ‘ఎవిడెన్స్’ అనే స్వచ్ఛంద సంస్ధను కలిశాడు. ఎవిడెన్స్ సంస్ధ మధురైలో ఉన్న మద్రాస్ హైకోర్టు బెంచి వద్ద పిటిషన్ దాఖలు చేసింది. పిటిషన్ ని విచారించిన బెంచి పోలీసులు వెంటనే కేసు రిజిస్టర్ చేసి విచారణ ప్రారంభించాలని ఆగస్టు 31 తేదీన ఆదేశాలిచ్చింది.

సెప్టెంబర్ 2 తేదీన ధెంకరై పోలీసులు కేసు నమోదు చేశారు. ఐ.పి.సి సెక్షన్ 294(బి), 323, 506(1) ల కింద నేరారోపణ నమోదు చేశారు. ఎస్.సి/ఎస్.టి అత్యాచారాల నిరోధ చట్టం 1989 [సెక్షన్ 3(1)(x)] కింద కూడా కేసు పెట్టారు.  కానీ ఆ తర్వాత కూడా విచారణ ప్రారంభం కాలేదు. దోషులు అరెస్టు కాలేదు. ఈ లోపు నాగముత్తుపై బెదిరింపులు కొనసాగాయి. కేసు వెనక్కి తీసుకోవాలని ఒత్తిడి పెరిగింది. రోజు రోజుకీ వేధింపులు పెరిగిపోయిన ఫలితంగా డిసెంబరు 7 తేదీన అతను ఉరివేసుకుని ఆత్మహత్యకు పాల్పడ్డాడు.

ఆత్మహత్య లేఖలో నాగముత్తు 7 గురు పేర్లను రాసినట్లు టైమ్స్ ఆఫ్ ఇండియా తెలిపింది. తనను బెదిరిస్తుండడం వలన తనకూ, తన కుటుంబానికీ తగిన రక్షణ కల్పించాలని పోలీసులను కోరినప్పటికీ పట్టించుకోలేదని నాగముత్తు తన లేఖలో పేర్కొన్నాడు. అతని విగత శరీరానికి ధేని లోని ప్రభుత్వాసుపత్రిలో పోస్టుమార్టం జరిపారు. పోస్టుమార్టం అనంతరం శవాన్ని తీసుకోవడానికి నాగముత్తు బంధువులు ఒప్పుకోలేదు. ఆత్మహత్యకు కారకులయినవారిని వెంటనే అరెస్టు చేయాలని నాగముత్తు బంధువులు, ఇతర దళిత ఆందోళనకారులు డిమాండ్ చేశారు. ఆసుపత్రి ఎదుట బైఠాయించి ఆందోళనకు దిగారు. ఆత్మహత్య లేఖలో పేర్కొనబడిన ఏడుగురిపైనా కేసులు నమోదు చేశామని ధేని జిల్లా ఎస్.పి ప్రవీణ్ కుమార్ నచ్చజెప్పినప్పటికీ ఆందోళన విరమించడానికి వారు ఒప్పుకోలేదు. నిందితులను అరెస్టు చేసేవరకూ ఆందోళనను విరమించేది లేదని వారు పట్టుబట్టినట్లు ది హిందూ, టి.ఓ.ఐ తెలిపాయి.

భారతదేశంలో కుల వివక్ష బలీయంగా కొనసాగుతోందని నాగముత్తు ఆత్మహత్య మరోసారి స్పష్టం చేసింది. భగవంతునితో భక్తుడిని అనుసంధానం చేయ్యడానికి బత్తి అయినా పని చేస్తుందేమో కానీ ప్రాణం, వ్యక్తిత్వం ఉన్న ఒక దళిత పూజారి పనికిరాడని భక్త జనం భావిస్తూనే ఉన్నారు. పూజారి వ్యవస్ధ దానికదే అగ్రకులాధిపత్యానికీ, మేధో ప్రతిభ కొన్ని కులాలకే పరిమితం అనిచెప్పే వెనుకబాటు ఛాందసత్వానికీ ప్రాతినిధ్యం వహించే వ్యవస్ధ. సమస్త మానవ శ్రమలకీ, వాటి ఫలితాలకీ మనిషిని కాకుండా భౌతిక ఉనికిలేని అమూర్త భావనలను బాధ్యుని చేసే అసంబద్ధ వ్యవస్ధ. అలాంటి వ్యవస్ధ కులవివక్షకు దూరంగా ఉండాలనీ, ఉంటుందనీ ఆశించడం గొంగట్లో తింటూ వెంట్రుకలు ఏరుకోవడమే.

నాగముత్తు కేసులో కులవివక్ష నిజానికి పెద్ద వార్త కాదు. కుల వివక్షను అంతం చేసే ఉద్దేశ్యంతో, వివక్షను పాటించేవారిని శిక్షించే ఉద్దేశ్యంతో ఏర్పాటు చేశామని చెప్పిన ఘనత వహించిన చట్టాలు వాస్తవంలో అమలు కావడం లేదన్నదే ఇక్కడ అసలు వార్త. వివక్షలకు దూరంగా ఉంటామని ప్రమాణం చేసి వచ్చే గ్రామ సర్పంచి స్వయంగా వివక్ష పాటించడమే కాక దళితులను తానే బెదిరిస్తాడు. కులవివక్షతో తనను కొట్టారని ఫిర్యాదు చెయ్యబోతే పోలీసులే ఆ ఫిర్యాదుని తీసుకోరు. పై అధికారులకి చెబితే వారు కూడా ఫిర్యాదు వద్దనే చెబుతారు. చివరికి డబ్బు, సమయం ఖర్చుపెట్టుకుని కోర్టుకి వెళ్తే తప్ప ఫిర్యాదు నమోదు కాదు.

ఫిర్యాదు నమోదయినా విచారణ జరగదు. అరెస్టులు జరగవు. చట్టాలనీ, ఆ చట్టాలను అమలు చేసేవారినీ ఆశ్రయించాక కూడా తన్నులుతిన్న దళితులు పోలీసుల చేత చీవాట్లు తింటూ, తన్నే ఆధిపత్యం ఉన్న వర్గాల చేత బెదిరింపులు ఎదుర్కొంటూ బిక్కు బిక్కు మంటూ రోజులు వెళ్లదీయాలి. అయినా కేసులు ఉండవు, కేసులుంటే విచారణ ఉండదు. రక్షణ అసలే ఉండదు. చివరికి వేధింపులు భరించలేక, విరక్తితో ఆత్మహత్య చేసుకోవడమే దళిత పూజారికి భారత చట్టాలు కల్పించిన గొప్ప భద్రత!