సిస్టర్ సెలైన్ అగస్టీన్ తో ఐశ్వర్య

కడుపు చూపిస్తూ అడుక్కునే భిక్షకులు కోకొల్లలు. పిల్లల్ని భిక్షక వృత్తిలో దింపి లక్షలు, కోట్లు సంపాదించే మాఫియా ముఠాలకు కొదవలేదు. పదవులు, కాంట్రాక్టులు అడుక్కోవడం రాజకీయ నాయకులు, సూపర్ ధనికుల జన్మహక్కు. కానీ పొట్ట కోసం అడుక్కుంటున్న నాయనమ్మకి తెలియకుండా పక్కనే నిలబడి చదువుకోసం రహస్యంగా సహాయం కోరిన ఐదేళ్ల ఐశ్వర్య కధ ఎవరూ విని ఉండరు. మతి చలించి తనను వదిలి వెళ్ళిపోయిన అమ్మ కోసమేనేమో తెలియదు గానీ డాక్టరీ చదువుకోవాలన్న బలమైన కోరిక ఐశ్వర్యను చదువు కోసం చేయి చాచేలా చేసింది. సేలం రైల్వేస్టేషన్ లో కడుపు నింపుకోమని టిఫిన్ ప్యాకెట్ కొనిచ్చిన ప్రయాణీకుడు కణ్ణన్ దానాన్ని తిరస్కరించి, ధైర్యం చేసి చదువుకి సాయం చెయ్యమని కోరడంతో ఆ పాపకు దాతల దాతృత్వం వరదలా చేరుతోంది.

ఐశ్వర్యకు అమ్మా, నాన్నల ప్రేమ పొందే భాగ్యం దక్కలేదు. తండ్రి అంధుడు కాగా, తల్లి మానసిక వికలాంగురాలు. ఐశ్వర్యను వదిలి తల్లి ఎటో వెళ్లిపోయింది. భిక్షకురాలయిన నాయనమ్మ పళనియమ్మాల్ పాపను సాకుతోంది. సేలం రైల్వే స్టేషన్ లో పళనియమ్మాల్, ఐశ్వర్యల గురించి తెలియనివారు లేరు. ‘ది హిందూ’ పత్రిక ప్రకారం సేలం రైల్వే స్టేషన్ లో ఐదేళ్ల ఐశ్వర్య ముఖం అందరూ ఎరిగినదే. తన ఈడు పిల్లల్లాగా కాకుండా స్టేషన్ కి వచ్చే పాసింజర్లను, సందర్శకులను ఐశ్వర్య ‘చదువుకుంటాను, సాయం చెయ్యమ’ని కోరేది. నాయనమ్మ ప్రయాణీకులను దానం చెయ్యమని కోరుతుంటే ఆమె వెంటే ఐశ్వర్య నడిచేది. ప్రయాణీకులు డబ్బులు ఇవ్వజూపినా ఐశ్వర్య తీసుకునేది కాదట.

సేలంలోని ఎగుమతిదారు, సోషల్ వర్కర్ కూడా అయిన జి.కణ్ణన్ ముందు చేయి చాచాక ఐశ్వర్య చదువు కోరికకు రెక్కలొచ్చాయి. ఐశ్వర్య తనకు పరిచయమయిన సంఘటన గురించి కణ్ణన్ ఇలా చెప్పాడు. “బాగా రాత్రి అయింది. లేట్ నైట్ ట్రైన్ అందుకోవాలి. ఆహారం కొనుగోలు చేస్తుండగా నా పక్కనే ఐశ్వర్య, తన నాయనమ్మ కనిపించారు. మరో రెండు ప్యాకెట్లు కొని వారికిచ్చాను. వృద్ధురాలు నా సహాయాన్ని అంగీకరించింది. కానీ ఆశ్చర్యంగా పాప తిరస్కరించింది. తర్వాత పాప తనకు చదువు నేర్పగలరా అని లోగొంతుకతో రహస్యంగా అడిగింది” అని కణ్ణన్ తెలిపాడు.

ఐశ్వర్య ఏమి అడుగుతోందో అర్ధం అయ్యాక కణ్ణన్ చాలా ఆశ్చర్యపోయాడు. అకస్మాత్తుగా, అసాధారణ రీతిలో ఎదురైన పాప విన్నపాన్ని విని సంభ్రమాశ్చర్యాలకు గురయ్యాడు. ఆయన వెంటనే సూరమంగళం ఎ.సి.పి టి.చంద్రశేఖరన్ కి సమాచారం ఇచ్చాడు. ఎంక్వైరీ చేశాక పాప దీన గాధ తెలిసింది. యాచకురాలయిన నాయనమ్మ సంరక్షణలో ఉన్న ఐశ్వర్యకు చదువుకోవాలన్న కోరిక బలంగా ఉన్నట్లు కూడా తెలిసింది. తమ వెంట వస్తే బడిలో చేర్చుతామని పోలీసులు కోరడంతో ఐశ్వర్య సంతోషంగా తలూపింది. పోలీసులు పాపను ‘లోటస్’ అనే అనాధ శరణాలయంలో చేర్చారు.

ఐశ్వర్య కధనాన్ని ‘ది హిందూ’ అక్టోబర్ 12 న వెలుగులోకి తెచ్చింది. ఐశ్వర్య కు సహాయం చెయ్యదలిస్తే ‘లోటస్ హోమ్’ కు పంపించాలని లోటస్ నిర్వాహకురాలు సిస్టర్ సెలైన్ అగస్టీన్ ‘ది హిందూ’ పత్రిక ద్వారా కోరింది. ఐశ్వర్య కల నెరవేరడానికి తన సహాయంగా కణ్ణన్ రు. 10,000 లోటస్ కి ఇచ్చాడు. సిస్టర్ సెలైన్ తన ఫోన్ నెంబర్ 09600416555 అని తెలియజేసింది. తన చిరునామా: Lotus Home, 885 First Plot, Rohini Garden, Alagapuram Pudur, Salem –16 గా ‘ది హిందూ’ తెలిపింది.

ఐశ్వర్య వార్త పత్రికలో వచ్చాక లోటస్ హోమ్ కి దాతల విరాళాలు విరివిగా రావడం ప్రారంభించాయి. డబ్బు, మనీ ఆర్డర్లు, డిమాండ్ డ్రాఫ్టుల రూపంలో దాతలు లోటస్ హోమ్ పై ఇపుడు కరుణ వర్షం కురుస్తోంది. కొన్ని వందల మంది ఫోన్ కాల్స్ తో తన సెల్ ఫోన్ క్రిక్కిరిసిపోయిందని సిస్టర్ హిందూ పత్రికకు చెప్పింది. ఐశ్వర్యకు దీవెనలు పంపేవారు కొందరయితే,  తక్షణ సహాయంతో పాటు భవిషత్తుకోసం కూడా హామీలు ఇచ్చేవారు అనేకులు. ఇటు కన్యాకుమారి నుండి అటు చివర ముజఫర్ పూర్ (బీహార్) వరకూ అనేకమంది ఐశ్వర్య దీన గాధకి స్పందించి నైతిక, ధన సహాయం చేస్తున్నారు. “మనసుకు నాటుకునే ఐశ్వర్య చిరునవ్వు (infectious smile), కదిలించే ఆమె కధలకు వస్తున్న స్పందన చూస్తే సమాజం ఇంకా ఎంత మంచితనంతో నిండి ఉందో తెలియజేస్తోంది” అని సిస్టర్ సెలైన్ పత్రికకు తెలిపింది.

లోటస్ హోమ్ మేనేజర్ల ప్రకారం కణ్ణన్ చొరవ, సహాయం ఐశ్వర్య భవిష్యత్తుకు పునాదిని వేశాయి. ముజఫర్ పూర్ నుండి అభిషేక్ చౌదరి, సేలం స్టీల్ ప్లాంట్ నుండి కళ్యాణసుందరం చెరో 10,000 దానం చేశారు. ఇంకా అనేకమంది వందల, వేల రూపాయల్లో తమ దాతృత్వాన్ని వ్యక్తం చేశారు. “అనేకమంది మా హోమ్ ఖాతాకి నేరుగా డబ్బు జమ చేశారు. చాలామంది మాకసలు చెప్పకుండానే ఖాతాలో డబ్బులు వేశారు” అని హోమ్ నిర్వాహకులు తెలిపారు. కేవలం డబ్బుతోనే సహాయం పరిమితం కాలేదు. సేలం జిల్లాతో పాటు పక్క జిల్లాల్లో పేరుపొందిన పాఠశాలల కరెస్పాండెంట్లు కొందరు ఐశ్వర్యకు చదువు చెబుతామని ముందుకొచ్చారు. ఒక మహిళా కరెస్పాండెంటు స్కూల్ వరకే కాకుండా ఆ తర్వాత కూడా చదివిస్తానని ముందుకొచ్చింది. విద్యా హాస్పిటల్స్ కి చెందిన డా.షణ్ముగం ఐశ్వర్య కల నిజం చేయడానికి ముందుకొచ్చాడు. అనేక పాఠశాలల విద్యార్ధులు తమ పాకెట్ మనీలో కొంత భాగాన్ని విరాళాలుగా సేకరించి లోటస్ హోమ్ కి పంపారు.

లోటస్ హోమ్ నిర్వాహకులను కదిలించిన సంఘటనను తప్పనిసరిగా చెప్పుకోవాలి. నమక్కల్ నుండి ఒక రిటైర్డ్ హెడ్ మాస్టర్ వారికి ఫోన్ చేశాడు. తననులోటస్ హోమ్ లో ఉండనివ్వాలనీ, అక్కడ ఉండి జీవితంలో మిగిలిన కాలాన్నంతా ఐశ్వర్యకు చదువు చెప్పడానికి వెచ్చిస్తాననీ, అందుకు అనుమతి ఇవ్వాలనీ ఆయన విజ్ఞప్తి చేశాడు. తన నెలసరి పెన్షన్ రు.20,000 తో సహా తన రిటైర్ మెంట్ బెనిఫిట్స్ అన్నీ ఐశ్వర్య చదువుకోసం వెచ్చించడానికి తాను సిద్ధంగా ఉన్నాననీ ఆయన తెలిపాడు. ఇంకా అనేకమందయితే తన వేతనాలకి తగ్గట్టుగా నెల నెలా రు.100 నుండి రు. 500 వరకూ పంపుతామని తెలియజేశారు.

భారత దేశంలో ఐశ్వర్యలకు కొదవేమీ లేదు. పేదరికం వల్ల తల్లి దండ్రుల నిరాదరణకి గురయి చిన్న చీపురు చేతబుచ్చుకుని రైల్వే కోచ్ లు శుభ్రం చేస్తూ అడుక్కునే అనాధ బాలలు ప్రయాణీకులకు నిత్యం తారసపడుతుంటారు. దాదాపు అన్నీ పట్నాల్లోనూ చిన్న పిల్లలు అనేకమంది దీనంగా చేతులు చాస్తూ కనిపిస్తున్నారు. వీరెవరికీ చదువుకోవాలన్న ధ్యాస, కోరిక లేకపోవచ్చుగానీ పూటకింత తిండిపెట్టి చదివిస్తామంటే తిరస్కరించకపోవచ్చు. స్వేచ్ఛగా బతకాలన్న సహజసిద్ధమైన కోరిక, బందిఖానాగా కనిపించే చదువును తిరస్కరిస్తుందని గ్రహించి వీరందరికీ తిండి పెట్టి చదివించడానికి దాతలు, అనాధ గృహాలు ముందుకు వస్తే ఎంతో ఉపయోగం.

పత్రికలో వచ్చిన వార్తలకు కదిలిపోయే దాతలు కంటికి ఎదురుగా కనపడే దీనులకు సహాయం చేయాలన్న ఆలోచనకు త్వరగా రాలేకపోవడం ఎలా అర్ధం చేసుకోవాలి? సుప్రీం కోర్టు తీర్పు మేరకు 25 శాతం సీట్లు పేదలకు కేటాయించడానికి అనేక ప్రవేటు పాఠశాలలు నిరాకరిస్తున్నాయి. అలా నిరాకరించకుండా సుప్రీం కోర్టు తీర్పు స్ఫూర్తిని యధాతధంగా స్వీకరిస్తే అనేకమంది పేదలు చదువులకు నోచుకుంటారు. దాతల సహాయాన్ని పక్కదారి పట్టించకుండా నిర్దేశిత లక్ష్యం కోసం తప్పక వినియోగిస్తారన్న నమ్మకం కలిగిస్తే ఇంకా అనేకులు తమ గొర్రెతోక వేతనాలను స్వల్పంగానయినా పంచుకోవడానికి సిద్ధపడతారని ఐశ్వర్య ఉదంతం చెబుతోంది.