మమత ఫాసిస్టు పోకడలు కొనసాగుతున్నాయి. తన పై గీసిన కార్టూన్ ను ఫార్వర్డ్ చేసినందుకు యూనివర్సిటీ ప్రొఫెసర్ ను అరెస్టు చేయించింది. తన ప్రతిష్టను మసకబార్చడానికి కుట్రలు జరుగుతున్నాయంటూ యధావిధిగా తన చర్యను సమర్ధించుకుంది. జాదవ్ పూర్ యూనివర్సిటీ ప్రొఫెసర్ అంబికేష్ మహాపాత్ర, ఆయన ఇంటిపక్కనే నివసిస్తున్న సుబ్రత సేన్ గుప్తా లను శుక్రవారం బెంగాల్ పోలీసులు అరెస్టు చేశారు. ముఖ్యమంత్రి మమత పరువు భంగం, మహిళ ప్రతిష్టకు మచ్చతేవడం, హేకింగ్ లాంటి సెక్షన్లను ప్రొఫెసర్ పై నమోదు చేశారు.

మమత చర్యను రాజకీయ పార్టీలు, మేధావులు, వివిధ రంగాల ప్రముఖులు తీవ్రంగా ఖండించారు. ఫాసిస్టు పోకడలు మానుకోవాలని హితవు పలికారు. ఒక వ్యంగ్య కార్టూన్ గీసినంతనే భంగమయ్యే బలహీన ప్రతిష్టా ముఖ్యమంత్రిది అని ప్రశ్నించారు. మమత చర్యను నిరసిస్తూ యూనివర్శిటీ ఉపాధ్యాయులు, బోధనేతర సిబ్బంది, విద్యార్ధులు ప్రదర్శన నిర్వహించారు. అరెస్టుకు ముందు త్రిణమూల్ కాంగ్రెస్ కార్యకర్తలు తనను తీవ్రంగా కొట్టి తెల్లకాగితంపై బలవంతంగా సంతకం తీసుకున్నారని ప్రొఫెసర్ విలేఖరులకు తెలిపాడు. యూనివర్సిటీ వైస్ ఛాన్సలర్ ప్రదీప్ నారాయణ్ ఘోష్ సైతం ప్రొఫెసర్ అరెస్టును ఖండించాడు. ఇంత చిన్న విషయానికి ప్రొఫెసర్ ను అరెస్టు చేయలేరనీ, ఇంకేదో మనసులో పెట్టుకున్నారని వ్యాఖ్యానించాడు.

–

ఈ కార్టూన్ ను ‘ది హిందూ’ ప్రచురించింది.