“అబద్ధాలు నిజాలుగా ధ్వనించడానికీ, హత్యలు గౌరవనీయమైనవిగా చేయడానికీ, ఒట్టి గాలిని సైతం గట్టి పధార్ధంగా చూపడానికీ రాజకీయ పరిభాష ఉద్దేశించబడింది”

-జార్జ్ ఆర్వెల్

“Political language is designed to make lies sound truthful and murder respectable, and to give the appearance of solidity to pure wind.”

-George Orwell

మార్చి 22 న ఐక్య రాజ్య సమితి మానవ హక్కుల సంస్ధలో అమెరికా ఒక తీర్మానం ప్రవేశపెట్టింది. ఎల్.టి.టి.ఈ పై శ్రీలంక సైన్యం జరిపిన యుద్ధం చివరి రోజుల్లో తమిళ పౌరులపై దారుణ హత్యాకాండకు పాల్పడ్డారని ఆ తీర్మానం పేర్కొంది. శ్రీలంక సైన్యం యుద్ధ నేరాలను విచారించి బాధితులకు న్యాయం జరపడంలో శ్రీలంక ప్రభుత్వం విఫలమయిందనీ ఆ తీర్మానం ఆరోపించింది. తీర్మానాన్ని సమర్ధించినవారిలో ఇండియా కూడా ఉంది. తీర్మానాన్ని భారత దేశం సమర్ధించడలో ఉచితానుచితాలు ఎలా ఉన్నప్పటికీ అసలు అమెరికాకి మానవ హక్కుల గురించి మాట్లాడే హక్కు ఎక్కడి నుండి వచ్చిందన్నది అసలు ప్రశ్న.

అమెరికా, యూరప్ దేశాల కంపెనీల కోసం అమెరికా నాయకత్వంలో ఇరాక్, ఆఫ్ఘనిస్ధాన్ లపై సాగించిన దురాక్రమణ యుద్ధాల్లో మొత్తం 9.2 లక్షల మంది చనిపోయారని ఈ వెబ్ సైట్ చెబుతోంది. వికీ లీక్స్ ద్వారా విడుదలయిన అమెరికా డాక్యుమెంట్ల ద్వారా వెల్లడయిన లెక్క పది లక్షలపైనే ఉంది. అది కూడా 2004, 2010 సంవత్సరాల మధ్య జరిగిన యుద్ధ నేరాల లెక్క మాత్రమే. చనిపోయినవారిలో 60 శాతంపైన ఇరాకీ, ఆఫ్ఘన్ పౌరులే ఉన్నారు. అంతకుముందు వియత్నాం దురాక్రమణ యుద్ధంలో కూడా అమెరికా అనేక దారుణమైన యుద్ధ నేరాలకు పాల్పడింది. ప్రచ్చన్న యుద్ధ కాలంలో లాటిన్ అమెరికా, సెంట్రల్ అమెరికా, ఆఫ్రికా, ఆసియాలలో అనేక దేశాల్లో అమెరికా సాగించిన మారణకాండ కూడా లెక్కలోకి తీసుకుంటే అమెరికా దుర్మార్గాలపై ఆగ్రహించే ఓపిక సాధారణ మానవులకు ఉండకపోవచ్చు.

అటువంటి యుద్ధ నేరగాడు అమెరికా శ్రీలంక తమిణుల మానవ హక్కుల గురించి కన్నీరు పెట్టుకోవడం అత్యంత హాస్పాస్పదం, మోసం.

యుద్ధ నేరాలకు పాల్పడే సమయంలో అమెరికా యుద్ధ యంత్రం ఎంత దుర్మార్గంగా వ్యవహరిస్తుందో ‘కోలేటరల్ మర్డర్ వీడియో’ బహిర్గతం చేసింది. ఇరాక్ లో అమెరికా సైనికులు సాగిస్తున్న దుర్మార్గాలు చూసి తట్టుకోలేని అమెరికా సైనికుడొకరు ఈ వీడియోను లీక్ చేశాడు. అపాచీ హెలికాప్టర్ నుండి అమెరికా సైనికులు జరిపిన ఈ హత్యాకాండలో ఇద్దరు రాయిటర్స్ విలేఖరులు చనిపోగా, ఇద్దరు చిన్న పిల్లలు గాయపడ్డారు. ఈ ఘటనలో స్వయంగా పాల్గొన్న అమెరికా సైనికుడు తాను చూసిన ఘోరానికి విచలితుడై పశ్చాత్తాపంతో ఇచ్చిన సాక్ష్యం మరో వీడియోలో చూడవచ్చు. హత్యాకాండ ఎలా మొదలయిందీ, ఎలా ముగిసిందీ అంతా వివరంగా వీడియోలోనే సబ్ టైటిల్స్ ద్వారా వివరించబడింది.

కోలేటరల్ మర్డర్ కు ప్రత్యక్ష సాక్షి అయిన అమెరికా సైనికుడు ఈధన్ మెక్-కార్డ్ ఇచ్చిన బహిరంగ సాక్ష్యం ఈ వీడియో లో చూడవచ్చు.

–