వికీలీక్స్ ద్వారా వెల్లడయిన కేబుల్ విషయాలను మంగళవారం దేశంలోని పత్రికలన్నీ వార్తలు ప్రచురించడంతో వాటికి మాయావతి స్పందిస్తూ జులియన్ పై దాడి చేసింది. కేబుల్ రాసింది అమెరికా రాయబారి, ఉద్దేశింది అమెరికా ప్రభుత్వాన్ని కాగా కేబుల్స్ ను వెల్లడించిన తనని టార్గెట్ చేయడం ఏమిటని జులియన్ తన స్పందనలో ప్రశ్నించాడు. జులియన్ పిచ్చోడనీ, అతని దేశంవారు ఆయనని పిచ్చాసుపత్రిలో చేర్చాలనీ, ఖాళీ లేకుణ్నట్లయితే ఆగ్రా పిచ్చాసుపత్రిలో చేరుస్తామని మాయావతి మంగళవారం విలేఖరులతో చెప్పింది. దానికి జులియన్ అస్సాంజ్ లండన్ నుండి ప్రతిస్పందించాడు.

ఒక పత్రికా ప్రకటనలో అస్సాంజ్ తన స్పందనను తెలిపాడు. “మాయావతి వివేకపూరిత ఆలోచనా పద్ధతిని మోసం చేసింది. ప్రశ్నం ఏమిటంటే ఆమె దళితులను కూడా ఇలానే మోసం చేస్తున్నదా? లీక్ అయిన డాక్యుమెంట్లు అమెరికా రాయబారులు రాసినవేననడంలో ఎట్టి సందేహమూ లేదు. అమెరికా రాయబార కార్యాలయం నుండి వచ్చిన అధికారిక డాక్యుమెంట్లవి. ఇవి అధికారికమని ప్రపంచవ్యాపితంగా రుజువయ్యాయి. డాక్యుమెంట్లను లీక్ చేస్తున్నందుకు అమెరికా ప్రభుత్వమే మా కార్యకర్తలను వెంటాడి వేధించడాని బట్టి కూడా ఆ విషయం అర్ధం అవుతోంది” అని జులియన్ ప్రకటనలో పేర్కొన్నాడు.

“అమెరికా రాయబారులు తమ ప్రభుత్వంతో తాము జరిపిన ప్రవేటు సంభాషణలలో ఆరోపణలు చేశారు. ఈ సంభాషణలలో ఉన అంశాలపట్ల ముఖ్యమంత్రి మాయావతికి అభ్యంతరం ఉన్నట్లయితే, ఆమె హిల్లరీ క్లింటన్ తో తలపడవలసి ఉంది. మాయావతి తన తప్పును గుర్తించి క్షమాపణలు చెప్పాలి” అని జులియన్ పేర్కొన్నాడు. “అలా చేయడంలో ఆమె విఫలమయితే, ఇంగ్లండ్‌కు తన ప్రవేట్ జెట్ ను లండన్ లో ఉంటున్న నావద్దకు పంపవచ్చు. గత 272 రోజులుగా నేనిక్కడ నా ఇష్టానికి విరుద్ధంగా ఇంటిలో నిర్భధించారు. నాకు మానసిక శరణాలయంలో ఆశ్రయం కల్పించదలుచుకుంటే నేను దానిని ఆహ్వానిస్తున్నాను. నేను ఇష్టపడే ఇండియాలో శరణు దొరకడం నాకింకా సంతోషం కలిస్తుంది. దానికి ప్రతిఫలంగా లండన్ నుండి అత్యంత గొప్ప చెప్పుల జతను మాయావతికి సమర్పించుకుంటాను” అని జులియన్ తెలిపాడు.