కేంద్ర ప్రభుత్వంలోని మంత్రులు తయారు చేసిన లోక్ పాల్ డ్రాఫ్టును కేంద్ర ప్రభుత్వ కేబినెట్ గురువారం ఆమోదించింది. అన్నా హజారే నేతృత్వంలో పౌర సమాజ నాయకులు ఉద్యమం చేపట్టిన తర్వాత వారి డిమాండ్ మేరకు లోక్ పాల్ చట్టాని తెస్తామని హామీ ఇచ్చి ఆందోళన విరమింపజేసిన కేంద్ర ప్రభుత్వం మూడు నెలల అనంతరం లోక్ పాల్ చట్టం తెచ్చే వైపుగా మొదటి అడుగు వేసింది. అన్నా హజారే బృందం తయారు చేసిన జన్‌లోక్ పాల్ బిల్లులో సూచించిన 40 సూత్రాల్లో 34 సూత్రాలను కేబినెట్ ఆమోదించిన లోక్‌పాల్ బిల్లులో పొందుపరిచామని కేంద్ర న్యాయశాఖ మంత్రి సల్మాన్ ఖుర్షీద్  చెబుతున్నప్పటికీ హజారే నాయకత్వంలోని పౌరసమాజ కార్యకర్తలు కేబినెట్ ఆమోదించిన లోక్‌పాల్ బిల్లును తమ అంచనాలకు తగినవిధంగా లేదని తిరస్కరించారు. ఇక అన్నా హజారే ప్రకటించిన మేరకు ఆగస్టు 16 తేదినుండి శక్తివంతమైన లోక్‌పాల్ బిల్లు కోసం ఆమరణ నిరాహార దీక్ష జరగడం తధ్యంలా కనిపిస్తోంది.

కేంద్ర మంత్రులు చెబుతూ వచ్చినట్లుగా ప్రధాని పదవిని లోక్‌పాల్ పరిధిలోకి తేవడానికి కేబినెట్ ఆమోదించిన బిల్లులో అవకాశాలు లేవు. సుప్రీం కోర్టు ప్రధాన న్యాయమూర్తి కూడా లోక్‌పాల్ పరిధిలోకి రారు. ప్రధాని పదవిలో ఉన్నంతవరకూ వారిపై లోక్‌పాల్ విచారించజాలదు. లోక్‌పాల్‌కి ప్రాసిక్యూట్ చేసి అధికారం లేదు. కేవలం విచారణ జరిపి తీసుకోదగిన చర్యలను సుప్రీం కోర్టు ప్రధాన న్యాయమూర్తికి సిఫారసు చేసే అధికారం మాత్రమే ఉంటుంది. ప్రధాని కాకుండా ఇతర కేంద్ర మంత్రులు, గ్రూప్-ఎ అధికారులపై వచ్చే ఫిర్యాదులను, లోక్‌పాల్ ఎవరి అనుమతి లేకుండానే విచారించవచ్చు. కేబినెట్ సమావేశంలో ప్రధాని పదవిని కూడా లోక్‌పాల్ పరిధిలోకి తేవాలని ప్రధాని మన్మోహన్ కోరినప్పటికీ ఇతర సభ్యులు అంగీకరించిలేదని సమాచార ప్రసార శాఖ మంత్రి అంబికా సోనీ తెలిపారు. ప్రభుత్వం స్ధిరత్వంపైన ప్రభావం పడకుండా ఉండడానికి ప్రధానిని లోక్‌పాల్ నుండి మినహాయించామని ఆమె తెలిపింది. ఆగస్టు 1 నుండి ప్రారంభమయ్యే వర్షాకాల సమావేశాల్లో మొదటి రెండు రోజుల్లో లోక్‌పాల్ బిల్లును పార్లమెంటులో ప్రవేశపెట్టనున్నామని ఆమె తెలిపింది.

లోక్‌పాల్ వ్యవస్ధలో ఒక ఛైర్‌పర్సన్ కాక ఎనిమిది మంది సభ్యులు ఉంటారు. వారిలో సగం మంది న్యాయవవస్ధ నుండి నియమితులవుతారు. సొంత ప్రాసిక్యూషన్ వ్యవస్ధ, పరిశోధనా విభాగం లోక్ పాల్ కలిగి ఉంటారు. అవసరమైన అధికారులు, సిబ్బందిని సమకూరుస్తారు. సిటింగ్ లేదా రిటైర్డ్ ఛీఫ్ జస్టిస్ లోక్ పాల్ ఛైర్‌పర్సన్‌గా నియమితులవుతారు. సభ్యులుగా మాజీ లేదా సిటింగ్ సుప్రీం కోర్టు న్యాయమూర్తులు, హైకోర్టుల ప్రధాన న్యాయ మూర్తులు నియమితులు కావడానికి అర్హులు. మచ్చ లేని సమగ్రత ఉండి పాతిక సంవత్సరాల పాలనా అనుభవం ఉన్నవారు, అవినీతి, విజిలెన్స్ కేసులతో అనుభవం ఉన్నవారు లోక్ పాల్ సభ్యులుగా నియమితులవుతారు. డ్రాఫ్టు తయారిలో బి.జె.పి నాయకుడు అరుణ్ జైట్లీని, ఇతర పౌర సమాజ నాయకులనూ సంప్రదించామని ఖుర్షీద్ తెలిపాడు. ఇతర అంశాలు ఇంకా ఇలా ఉన్నాయి: