అప్ డేట్ – 3: బుధవారం జరిగిన బాంబు పేలుళ్ళలో మరణించినవారి సంఖ్య 13 కు చేరుకుందని పోలీసులు చెప్పారని ‘ది హిందూ’ పత్రిక తెలిపింది.. మహా రాష్ట్ర ముఖ్యమంత్రి కూడా 13 మంది చనిపోయారని ధృవీకరించాడు. ఐ.ఇ.డి (ఇంప్రూవైజ్‌డ్ ఎక్స్‌ప్లోజివ్ డివైజ్) లతో పేలుళ్ళు జరిపారని పోలీసులు చెప్పారు. దాదర్ లో కారులో ఉంచిన బాంబు పేలిందని తెలుస్తోంది. గొడుగు కింద ఉంచిన మరొక బాంబుని నిర్వీర్యం చేశారు.

అప్ డేట్ – 2: ఈరోజు అంటే, జులై 13 అజ్మల్ కసబ్ పుట్టిన రోజనీ, ముంబైపై టెర్రరిస్టులు దాడులు చేసిన అనంతరం చనిపోగా మిగిలిన వారు తప్పించుకుపోయారనీ, వారే కసబ్ పుట్టిన రోజు సందర్భంగా ఈ ఘాతుకానికి పాల్పడి ఉండవచ్చని రాయిటర్స్ అంచనా. ప్రమాద స్ధలంలో ఎవరికీ చెందని ఒక కారు (నెంబరు ఎం.హెచ్ 43A 9384) ఉన్నట్లు ఛానెళ్ళు చూపిస్తున్నాయి.

నాలుగో చోట (లెమింగ్టన్ రోడ్) కూడా పేలుడు సంభవించిందని వార్తలు తెలుపుతున్నాయి. హోమ్ సెక్రటరీ సమాచారం మేరకు బుధవారం పేలుళ్ళలో ఇప్పటివరకూ ఇద్దరు చనిపోగా వందమంది గాయపడ్డారు.

బుధవారం ఉదయమే ఇద్దరు ఇండియన్ ముజాహిదీన్ సంస్ధ సభ్యులు ఇద్దరిని అరెస్టు చేశారని పోలీసులు తెలిపారు. దానికి ప్రతీకారంగానే ఈ పేలుళ్ళు జరిపారా లేక లష్కర్ ఎ తొయిబా పాత్ర ఉన్నదా అన్న అనుమానాలు వ్యక్తం అవుతున్నాయి. అధికారికంగా ఏమని భావిస్తున్నదీ తెలియరాలేదు. భారత దేశంలోని ఇతర ప్రధాన నగరాలన్నింటా అలర్ట్ ప్రకటించారు. అందులో హైద్రాబాద్ కూడా ఒకటి.

ముంబైలో మళ్ళీ బాంబు పేలుళ్ళు సంభవించాయి. పూర్తి వివరాలు ఇంకా అందలేదు. రాయిటర్స్ వార్తా సంస్ధ సమాచారం ప్రకారం దక్షిణ ముంబైలో రెండు చోట్ల పేలుళ్ళు సంభవించగా, సెంట్రల్ ముంబైలో ఒక చోట బాంబులు పేలాయి. 15 మందికి గాయాలైనట్లు ఆ సంస్ధ తెలిపింది.