ఏప్రిల్ నాటి నిరాహార దీక్షలో అన్నా హజారే

కేంద్ర ప్రభుత్వ వైఖరితో అన్నా హజారే విసుగు చెందాడు. ప్రభుత్వం ఇచ్చిన హామీలను విశ్వసించి ఏప్రిల్ లో ఆమరణ నిరాహార దీక్షను విరమించిన అన్నా హజారే, మరునాటి నుండే పౌర సమాజ కార్యకర్తలపై కేంద్ర మంత్రులు వివిధ ఆరోపణలతో దాడి ప్రారంభించడంతో ఖిన్నుడయ్యాడు. శాంతి భూషణ్, ఆయన కొడుకు ప్రశాంత్ భూషన్ ఇరువురూ కమిటీలో ఉండడం పట్ల మొదట అభ్యంతరం వ్యక్తం చేసిన మంత్రులు తర్వాత శాంతి భూషణ్ పై అవినీతి ఆరోపణను ఎక్కడో పాతాళం నుండి తవ్వి తీశారు. ఆ ఆరోపణలో నిజం లేదని ఇతర పౌరసమాజ నాయకులు తేల్చాక, ప్రధాని, సుప్రీం కోర్టు ఛీఫ్ జస్టిస్ లను బిల్లులో కలపొద్దంటూ లొల్లి మొదలెట్టారు.

ఈలోపు యోగా గురువు ప్రారంభించిన మరో దీక్షపై పోలీసులతో దాడి చేయించడంతో అప్పటివరకు ఎడమొఖం పెడమొఖంగా ఉన్న హజారే, రాందేవ్ శిబిరాలు ఒంటి గోంతుతో నిరసించాయి. అన్నా హజారే, దానికి నిరసనగా ఒక రోజు దీక్షను ప్రకటించి జంతర్ మంతర్ వద్ద అనుమతి ఇవ్వకపోవడంతో మహాత్మాగాంధీ సమాధి రాజ్ ఘాట్ వద్ద దీక్ష జరిపాడు. ఇప్పుడు ప్రభుత్వం తరపున లోక్ పాల్ బిల్లు డ్రాఫ్టింగ్ కమిటీలో ఉన్న కేంద్ర మంత్రులు తాము ఒక డ్రాఫ్టును రూపొందిస్తామనీ, పౌర సమాజ నాయకులు మరొక డ్రాఫ్టు రూపొందించడనీ చెప్పడంతో పౌర సమాజ నాయకులు విస్తుపోతున్నారు. ఈ లెక్కన ఆగష్టు 15 నాటికి తయారయ్యేది “లోక్ పాల్ బిల్లు” కాదనీ “జోక్ పాల్ బిల్లు” అనీ అరవింద్ కేజ్రీవాల్ నిరసన వ్యక్తం చేశాడు.

ప్రభుత్వ ధోరణి ఇలాగే కొనసాగి ఎటువంటి ఆయుధాలు లేని సాదా సీదా బిల్లును రూపొందిస్తే తాను ఆగష్టు 16 నుండీ ఆమరణ ధీక్ష ప్రారంభిస్తానని ప్రకటించాడు. తమను తీహార్ జైలులో పెట్టదలుచుకుంటే పెట్టుకోవచ్చనీ అన్నా ప్రకటించాడు. పౌర సమాజ కార్యకర్తలు సూచించే అన్ని ప్రతిపాదనలనూ డ్రాఫ్టులో పొందుపరుస్తామని ఇచ్చిన హామీనుండి ప్రభుత్వం వెనక్కి వెళుతోందని ఆయన విమర్శించాడు. రెండు బిల్లులు తయారు చేద్దామని సూచించడం పట్ల ఆయన విలేఖరుల వద్ద ఆశ్చర్యాన్ని వ్యక్తం చేశాడు. “రెండు డ్రాఫ్టులు తయారుచేసే పనైతే, ఇక ఈ ఉమ్మడి కమిటీని ఎందుకు ఏర్పాటు చేసినట్లు? ఆ విషయం ముందే చెబితే సరిపోయేది. మా డ్రాఫ్టు వారికి తెలుసు. ఇంత సమయాన్ని ఎందుకు వృధా చేశారు? శక్తివంతమైన బిల్లు తయారు చేయడానికి ప్రభుత్వానికి ఎలాంటి ఉద్దేశ్యమూ లేదని స్పష్టమవుతోంది” అని హజారే అన్నాడు.

హజారే, ఏప్రిల్ లో తన నిరాహార దీక్షను విరమించడానికి ప్రభుత్వం ఇచ్చిన హామీలనుండి వెనక్కి వెళ్ళిందని ఆరోపిస్తూ, ఆగస్టు 16 న ఆమరణ నిరాహార దీక్షను తిరిగి ప్రారంభిస్తానని ప్రకటించాడు. రాందేవ్ దీక్షను అణచివేసినట్లు తమ దీక్షను కూడా అణవివేసినట్లయితే మేము దానికి సిద్ధంగా ఉన్నాం. లాఠీలూ, తూటాలు ఎదుర్కోవడానికి మేం సిద్దం. దేశం కోసం నా జీవితాన్ని త్యాగం చేయడానికి నేను సిద్ధంగా ఉన్నాను” అని ఆయన ప్రకటించాడు. అయితే జూన్ 20, 21 తేదీల్లో జరిగే సమావేశాలకు తాము హాజరవుతామని ఆయన తెలిపాడు. ప్రభుత్వం ఏంచెబుతుందో వింటామన్నాడు.