బ్రెగ్జిట్ విషయమై సోమవారం నాడు బ్రిటిష్ ప్రధాని చేసిన ప్రకటన ప్రభావం చూపిస్తోంది. బ్రెగ్జిట్ ప్రక్రియ కు స్పష్టమైన టైం టేబుల్ ను ఆమె ప్రకటించడంతో బ్రిటిష్ కరెన్సీ పౌండ్ స్టెర్లింగ్ విలువ 31 ఏళ్ళ కనిష్ట స్ధాయికి పడిపోయింది. దానితో బ్రిటిష్ ఎగుమతులు పెరుగుతాయన్న అంచనాతో బ్రిటిష్ ప్రధాన స్టాక్ మార్కెట్ సూచి FTSE 16 నెలల గరిష్ట స్ధాయికి పెరిగింది. 

అధికార కన్సర్వేటివ్ పార్టీ కాన్ఫరెన్స్ లో మాట్లాడుతూ ప్రధాని ధెరిసా మే ‘బ్రెగ్జిట్ ప్రక్రియ మార్చి 2017 చివర్లో ప్రారంభం అవుతుంది. ఆ నెలలో ఆర్టికల్ 50 కింద ఈయూ కు నోటీసు ఇస్తాను’ అని ప్రకటించిన సంగతి తెలిసిందే. ఆ ప్రకటనతో బ్రెగ్జిట్ తీర్పు అమలు కావటం ఖాయమే అని మార్కెట్లు నిర్ధారించుకుని తదనుగుణంగా స్పందించాయి. బ్రెగ్జిట్, దీర్ఘ కాలికంగా బ్రిటన్ కు లాభకరమే అయినప్పటికీ స్వల్ప కాలికంగా కొన్ని ప్రతికూల పరిణామాలను ఎదుర్కోవలసి ఉంటుంది. ఈ కారణం వల్లనే బ్రిటిష్ కరెన్సీ పతనం అయింది. 

అమెరికన్ డాలర్ తో పోల్చితే పౌండ్ స్టెర్లింగ్ విలువ 1.2757 డాలర్లకు పడిపోయిందని పత్రికలు తెలిపాయి. 1985 నుండి ఇదే అత్యల్ప విలువ అని తెలుస్తున్నది. యూరోతో పీల్చితే పౌండ్ స్టెర్లింగ్ విలువ 3 సంవత్సరాల కనిష్ట స్ధాయికి (87.56 పెన్నీలు) పడిపోయింది. 

“బ్రెగ్జిట్ దిశలో పటిష్టమైన టైం టేబుల్ ప్రకటించినందున స్టెర్లింగ్ కు ఇటీవల తగిలిన గాయాలకు కట్టు…