రామలింగ రాజు సోదరులు, ఇతర పెద్ద మనుషులకు అవినీతికి పాల్పడినందుకు గాను హై కోర్టు శిక్షలు ప్రకటించింది. అత్యధికంగా 7 సం.ల జైలు శిక్ష + 5.5 కోట్లు జరిమానా విధిస్తూ తీర్పు ప్రకటించింది. ఈ శిక్షలను చూసి అందరూ సంతోషిస్తున్నారు. తగిన శిక్ష పడిందని వ్యాఖ్యానిస్తున్నారు.

అసలు సత్యం కంపెనీ అధిపతి రామలింగ రాజు బృందం పాల్పడిన అవినీతికి పడిన శిక్ష మొత్తం కార్పొరేట్ అవినీతికి పడవలసిన శిక్షతో పోల్చితే ఎంత చిన్న దెబ్బతో సమానమో అది కార్పొరేట్ అవినీతిని ఏ మాత్రం బాధపెట్టగలదో ఈ కార్టూన్ చెబుతోంది.

సత్యం కంపెనీకి ఆడిటింగ్ నిర్వహించిన కంపెనీ ప్రైస్ వాటర్ హౌస్ కూపర్స్ అనే పేరు గలది. ఇది ‘ద సిటీ’ (లండన్) నుండి పని చేసే బహుళజాతి కంపెనీ. ప్రపంచంలోని అతి పెద్ద ఆడిటింగ్ కంపెనీల్లో ఇది రెండవది. మొదటి స్ధానం డెలాయిట్ ది. 2014లో డెలాయిట్ ఆదాయం 34.2 బిలియన్ డాలర్లు కాగా ప్రైస్ వాటర్ హౌస్ ఆదాయం 34 బిలియన్లు. (ఇది టర్నోవర్ కాదు కేవలం వార్షిక ఆదాయం మాత్రమే.

కుంభకోణం విలువ 7,000 కోట్ల రూపాయలు. లావాదేవీలు లేకుండానే అవి జరిగినట్లు అకౌంట్ బుక్స్ లో (బ్యాలన్స్ షీట్) ఎప్పుడో చూపామని అది పెరిగి పెద్దదై 7,000 కోట్లు అయిందని జనవరి 7, 2009 తేదీన ఇన్వెస్టర్లకు రాసిన ఈ మెయిల్ లేఖలో రామలింగరాజు పేర్కొన్నారు.

అకౌంట్ పుస్తకాలు సరిగ్గా ఉన్నదీ లేనిది ఆడిటింగ్ కంపెనీలు ప్రతియేడూ నిర్వహిస్తాయి. అలాంటిది ఎన్నడో యేళ్ళ క్రితం జరిగిన తప్పును కనిపెట్టకుండా ఉండడం ఆడిటింగ్ కంపెనీకి సాధ్యం కాదు. ఒకవేళ సాధ్యపడితే అది ఆడిటింగ్ కంపెనీ కాకపోయినా అయి ఉండాలి లేదా కంపెనీతో కుమ్మక్కయినా అయి ఉండాలి. ఈ రెండోదే నిజమని ప్రత్యేకంగా చెప్పనవసరం లేదు.

మనం చెప్పడం కాదు అమెరికా సెక్యూరిటీ ఎక్చేంజ్ కమిషనే (మన సెబి లాంటిది) ఆ సంగతి చెప్పింది. సత్యం కంపెనీతో కుమ్మక్కు అయినందుకు 6 మిలియన్ డాలర్ల జరిమానా వసూలు చేసింది కూడా. జైలు శిక్షలు ఎందుకు పడలేదన్నది భ్రహ్మ రహస్యం. బిలియన్ల డాలర్ల మోసాలు చేసి జరిమానాతో బైటపడడం అమెరికా కార్పొరేట్ కంపెనీలకు సాధారణ అలవాటు. వారి వ్యవస్ధ అలా తయారు చేసుకున్నారు మరి.

Ramalinga Raju

అది కూడా బ్రిటిష్ కంపెనీ అయినందున జరిమానా వసూలు చేశారు గానీ అమెరికా కంపెనీ అయితే అదీ ఉండేది కాదు. ఇన్సైడర్ ట్రేడింగ్ పేరుతో శ్రీలంక (రాజారత్నం), ఇండియా (రజత్ గుప్తా) సంతతికి చెందిన వ్యాపారులకు భారీ శిక్షలు వేస్తారు గానీ అమెరికన్లను మాత్రం అసలు ముట్టుకోవు. రజత్ గుప్తా విషయం అయితే ఆయన తప్పు అసలే లేదని కేవలం అమెరికన్ మోసగాళ్లను తప్పించడానికే ఆయన్ని బలిపశువుని చేశారని కొన్ని పత్రికలు పరిశోధనాత్మక కధనాలు వెలువరించాయి. అందులో మన తెహెల్కా కూడా ఒకటి.

ఇట్లాంటి దేశాలు అవినీతి గురించి మనకి నీతులు చెబుతాయి!

సత్యం లాంటి చిన్న కంపెనీతో లాలూచీ పడితేనే 1.7 బిలియన్ డాలర్ల కార్పొరేట్ అవినీతి జరిగింది. ఈ అవినీతిలో ఆడిటింగ్ కంపెనీ (PwC) కి భారీ భాగం ఉంటుందని గమనిస్తే సంవత్సరానికి 34 బిలియన్ డాలర్ల ఆదాయం కలిగిన ప్రైస్ వాటర్ హౌస్ కూపర్స్ కంపెనీ ఇంకెన్ని కంపెనీల్లో లాలూచీ పడుతూ అవినీతికి పాల్పడి ఉండాలి?

PwC కంపెనీ 157 దేశాల్లో విస్తరించి ఉంది. ప్రపంచ వ్యాపితంగా 2 లక్షలమంది ఉద్యోగులు దానికోసం పని చేస్తుంటారు. 1998లో స్ధాపించబడిన కంపెనీ కేవలం 17 సంవత్సరాలలో ఇంతపెద్ద కంపెనీగా అవతరించడం ఎలా సాధ్యం? ఎంత మొత్తంలో కార్పొరేట్ అవినీతిలో భాగం పొందితే ఇంత ఆర్జన సాధిస్తుంది? జనం ఆలోచించాల్సిన విషయం ఇది.

కార్పొరేట్ అవినీతి ఎంత పెద్ద తిమింగలమో చెప్పడానికె ఇదంతా. ఆడిటింగ్ సంస్ధలు ప్రపంచంలో సవాలక్షా ఉన్నాయి. వారందరు కార్పొరేట్ కంపెనీల, సంపన్నుల అక్రమ సంపాదనను సక్రమం చేసే పనిలోనే నిమగ్నమై ఉంటారు. (మన జగన్ గారి అవినీతిలో ఆడిటర్ విజయసాయి పాత్ర గుర్తుకు తెచ్చుకోండి.)

ఆడిటర్లు సక్రమంగా చేసేపని ఏదన్నా ఉంటే అది మధ్యతరగతి ఉద్యోగుల ఆదాయ పన్ను వ్యవహారాలను చూసిపెట్టడమే. మిగిలినదంతా లెక్కల సర్దుబాటు మాత్రమే. ఆడిటర్లకు కోపం వచ్చినా ఇది నిజం. కోర్టుల్లో లాయర్ల పీడన, సర్దుబాట్లు ఎలాంటివో అకౌంటింగ్ లో ఆడిటర్ల పీడన, సర్దుబాట్లు అలాంటివి. ఇవన్నీ వ్యవస్ధలో జరిగే భారీ తప్పులను, నేరాలను, అవకతవకలను కప్పిపుచ్చుకోవడానికి, ‘అంతా బాగానే ఉంది’ అని జనాన్ని నమ్మించడానికి వ్యవస్ధ తనకు తానుగా నిర్మించుకునే ఉప వ్యవస్ధలు. ఇటువంటి విశాల దృక్పధం ఉంటే తప్ప కేశవ్ గారి కార్టూన్ ఎంత సరైనదో మన అవగాహనలోకి రాదు.

[కార్పొరేట్ అవినీతి అనే ఊబకాయుడి గుండెకు లక్ష్యం వేసుకుని సంధించిన శిక్షల బాణం పోయి పోయి బలం లేక బూటుకాలుకు తగిలిందని, ఆ బాణం దెబ్బ ‘అబ్బా’ అని ఊరుకోగల చిన్నది మాత్రమేనని కార్టూన్ చెబుతోంది.]