O)ffice of ‘Electronics for Imaging’ in California

ప్రపంచ ఐ.టి ఉత్పత్తులకు కేంద్రంగా పేరు పొందిన సిలికాన్ వాలీ (అమెరికా) లో ఓ కంపెనీ, ఇండియా నుండి వచ్చిన ఐ.టి ఉద్యోగులకు అమెరికా ఉద్యోగుల కంటే 6 రెట్లు తక్కువ వేతనం చెల్లిస్తోంది. బెంగుళూరు నుండి తెచ్చుకున్న భారతీయ ఐ.టి ఉద్యోగుల పట్ల చూపుతున్న ఈ వివక్ష గురించి అజ్ఞాత వ్యక్తుల ద్వారా ఫిర్యాదు అందుకున్న లేబర్ డిపార్టుమెంటు వారు తనిఖీ చేసి ఫిర్యాదు నిజమే అని తెలుసుకున్నారు.

భారీ తేడాతో తక్కువ వేతనం చెల్లించడమే కాకుండా కనీస పనిగంటలకు మించి రెండు రెట్లకు పైగా గంటలపాటు పని చేస్తున్నా ఓవర్ టైమ్ వేతనం భారతీయ ఐ.టి ఉద్యోగులకు చెల్లించడం లేదని అమెరికా లేబర్ డిపార్ట్ మెంట్ లోని వేజ్ అండ్ అవర్ డివిజన్ వారు కనుగొన్నారు. ఉద్దేశ్యపూర్వకంగా తక్కువ వేతనం చెల్లించినందుకు గాను ఐ.టి కంపెనీకి జరిమానా విధించినట్లు తెలుస్తోంది. భారతీయ ఉద్యోగులకు నష్టపరిహారం చెల్లించాలని కూడా ఆదేశించింది.

ఈ వ్యవహారానికి అమెరికా, పశ్చిమ దేశాల పత్రికలు విస్తృత ప్రచారం కల్పించాయి. తద్వారా అమెరికాలో కార్మిక చట్టాలను గట్టిగా, మొహమాటం లేకుండా అమలు చేస్తామని అమెరికా ఈ ఘటన ద్వారా ప్రపంచానికి చాటుతోంది. కార్మిక చట్టాలను కఠినంగా అమలు చేయవలసిందే. అనుమానం లేదు. కానీ అవే కార్మిక చట్టాలను సడలీకరించాలని, సరళీకరించాలని, నియంత్రణలు ఎత్తివేయాలని ఇండియాపై అమెరికా బహుళజాతి కంపెనీలు ఎందుకు వత్తిడి చేస్తున్నట్లు? కొద్ది రోజుల క్రితం భారత ప్రధాని మోడి ప్రకటించిన కార్మిక సంస్కరణలు కేవలం పశ్చిమ బహుళజాతి కార్పొరేషన్ ల ఒత్తిడికి తలఒగ్గి చేసినవేనని ఈ సందర్భంగా జ్ఞప్తికి తెచ్చుకోవచ్చు.

సిలికాన్ వ్యాలీలో ‘ఎలక్ట్రానిక్స్ ఫర్ ఇమేజింగ్’ పేరుతో ఓ ఐ.టి కంపెనీ ఉందని ఈ వార్త ద్వారా తెలుస్తున్నది. ఈ కంపెనీ బెంగుళూరులోని తమ కార్యాలయం నుండి 8 మంది భారతీయ ఉద్యోగులను అమెరికా రప్పించుకుంది. అమెరికా అనగానే ఎగిరి గంతేయడం మన బుద్ధి జీవుల అలవాటు కదా! అలాగే ఎన్నో కలలతో వారు అమెరికా వెళ్లారు. కానీ అక్కడ వారికి సరిగ్గా ఇండియాలో ఎంత చెల్లించారో అంతే చెల్లించారు. బహుశా తక్కువ కూడా కావచ్చు.

అమెరికా కనీస వేతన చట్టం ప్రకారం గంటకు 7.25 డాలర్లు చెల్లించాలి. గంటకు 2 డాలర్ల కంటే తక్కువ సంపాదిస్తున్న అష్టదరిద్రులు ప్రపంచంలో వందల కోట్లమంది ఉన్నారని ఐరాస కార్మిక సంస్ధ సంవత్సరానికి ఒకసారి కన్నీళ్లు పెట్టుకుంటూ ఉంటుంది. అలాంటి వారి జాబితాలో మన భారతీయ మేధావులను కూడా చేర్చుతూ కంపెనీ గంటకు కేవలం 1.21 డాలర్లు మాత్రమే చెల్లించింది. అంటే ఐరాస చెప్పే అష్ట దరిద్రుల కంటే ఘోరమైన వేతనం అన్నమాట!

గంటకు కేవలం 1.21 డాలర్లు మాత్రమే చెల్లించడమే ఘోరం అనుకుంటే ఇమేజింగ్ కంపెనీ అంతటితో ఆగకుండా మరో ఘోరాతి ఘోరాన్ని మనవాళ్లపై అమలు చేసింది. అమెరికా కార్మిక చట్టాల ప్రకారం వారానికి గరిష్టంగా 40 గంటలు మాత్రమే పని చేయించుకోవాలి. (అనగా వారానికి 290 డాలర్ల కనీస వేతనం. నెలకు నాలుగు వారాలు అనుకుంటే నెల కనీస వేతనం 1160 డాలర్లు. దీనిని రూపాయల్లోకి మార్చితే (డాలర్ =  రు. 60 చొప్పున) నెలకి రు. 69600/-) కానీ మనవాళ్ళ చేత వారానికి 122 గంటలు పని చేయించుకుంది. అనగా ఏకంగా మూడు రెట్లు కంటే ఎక్కువ. ఆదివారం కూడా పని దినం అయితే రోజుకి 17 గంటల పని. మన ఇండియాలో కూడా ఇంత ఘోరం జరగదు.

వారానికి 122 గంటల పాటు పని చేసినందుకు మనవారికి ఎంత చెల్లించి ఉండాలి? మొదటి 40 గంటలకు గంటకు 7.25 డాలర్ల చొప్పునా, ఆ తదుపరి గంటలకు గంటకు ఒకటిన్నర రెట్లు ఓవర్ టైమ్ లెక్కన గంటకు 10.875 డాలర్లు చెల్లించాలి. ఈ మొత్తాన్ని లెక్కిస్తే వారానికి  1181.75 డాలర్లుగా తేలుతుంది. నెలకు 4 వారాలు అనుకుంటే నెలకు చెల్లించవలసిన మొత్తం 4727 డాలర్లుగా (రు. 283620/-) తేలుతుంది. కానీ వారికి చెల్లించింది గంటకు 1.21 డాలర్ల చొప్పున నెలకు 590.48 డాలర్లు (రు. 35430/-) మాత్రమే. తక్కువ చెల్లించింది నెలకు ఏకంగా రు. 248190/-. ఇంతకంటే నిలువు దోపిడి, అత్యంత ఘోరమైన శ్రమ దోపిడి మరొకటి వర్తమాన ప్రపంచంలో ఉంటుందా అన్నది అనుమానమే.

డాలర్ల నుండి రూపాయలలోకి మార్చి పోల్చడం భావ్యమేనా అని అనుమానించవలసిన అవసరం లేదు. ఎందుకంటే ఆ పని చేసింది మనం కాదు, కంపెనీయే. వారికి ఇండియాలో చెల్లించే మొత్తాన్ని డాలర్లలోకి మార్చి ఎంత వస్తుందో చూసి సరిగ్గా అదే మొత్తాన్ని మనవాళ్ళకి చెల్లించారు.

ఈ ఘోరానికి పాల్పడ్డందుకు గాను కంపెనీకి 3,5000 డాలర్లు జరిమానా విధించామని అమెరికా లేబర్ డిపార్టుమెంటు అట్టహాసంగా ప్రకటించింది. ఉద్యోగులకు పాత బాకీల కింద 40,000 డాలర్లు (రు 24 లక్షలు) చెల్లించాలని ఆదేశించామని తెలిపింది. అయితే ఇది 8 మంది ఉద్యోగులకు కలిపా లేక ఒక్కొక్కరికా అన్నది తెలియలేదు. కలిపి అయితే అది ఇంకో ఘోరం అవుతుంది.

ఈ అంశంపైన ది హిందు పత్రిక అమెరికా లేబర్ డిపార్ట్ మెంట్ ని సంప్రదించింది. పత్రికకు ఈ మెయిల్ లో సమాధానం ఇస్తూ అమెరికా లేబర్ డిపార్ట్ మెంట్ లోని వెజ్ అండ్ అవర్ విభాగం జిల్లా డైరెక్టర్ సుసాన బ్లాంకో గొప్పలు పోయారు. “కార్మికుల చేత వారానికి 100 గంటలకు పైన దాదాపు రోజంతా పని చేయించుకోవడాన్ని, అది కూడా అత్యంత తక్కువ వేతనాలకు, మేము అనుమతించం. వ్యాపార యాజమాన్యాలు ఒక సంగతి అర్ధం చేసుకోవాలి. ఉద్యోగులను వారు మరోచోటి నుండి అమెరికాకు తెచ్చుకుంటే గనక అలాంటి వారికి అమెరికా కనీస వేతనాల చట్టం ప్రకారమే వేతనాలు చెల్లించాలి. అమెరికా కార్మిక చట్టాలను పొల్లు పోకుండా అమలు చేయడానికి వేజ్ అండ్ అవర్ డివిజన్ కట్టుబడి ఉంది. ఈ ఒక్క కార్మికుడిని దోపిడి చేయడానికి మేము అంగీకరించేది లేదు” అని ఆమె ఘనంగా సమాధానం ఇచ్చారు.

కార్మిక చట్టాలను కఠినంగా అమలు చేస్తున్నందుకు చప్పట్లు కొడదాం. కానీ అదే అమెరికా కంపెనీలు భారత దేశంలో కార్మిక చట్టాలు కఠినంగా ఉన్నాయని ఎందుకు ఆరోపిస్తున్నాయి? కఠిన చట్టాలను ఎత్తివేయాలని అంతవరకు పెట్టుబడులు పెట్టేది లేదని భారత ప్రభుత్వంపై ఎందుకు ఒత్తిడి చేస్తున్నాయి? అమెరికా వర్కర్ కి ఒక న్యాయమూ ఇతర దేశాల వర్కర్లకు మరొక న్యాయమూనా? మళ్ళీ ఇదే అమెరికా ఐరాస కార్మిక సంస్ధలో కూర్చుని ప్రపంచ దేశాలు కార్మిక సంక్షేమం పట్టించుకోవడం లేదని బడాయి పోతుంది. కార్మికుల కనీస వేతనాలు విషయం పట్టించుకోవాలని సుద్దులు చెబుతుంది. ఉపదేశాలు బోధిస్తుంది.

ఐరాస బైటికి వచ్చాక తన బోధనలను తానే అడ్డంగా ఉల్లంఘిస్తుంది. తమ కంపెనీల తరపున ప్రపంచ దేశాల ప్రభుత్వాలపై తీవ్ర ఒత్తిడులు తెస్తుంది. సరళీకరణ, ప్రయివేటీకరణ, ప్రపంచీకరణ విధానాలలో భాగంగా కార్మిక చట్టాలను రద్దు చేయాలని, ప్రైవేటు కంపెనీలకు ఇష్టారాజ్యం కల్పించాలని ఆంక్షలు విధిస్తుంది. సదరు ఆంక్షలకు భారత ప్రధాని మోడి తల ఒగ్గిన ఫలితమే ఆయన ప్రకటించిన కార్మిక సంస్కరణలు. ‘శ్రమయేవ జయతే’ అంటూ అందమైన పేరు పెట్టి ఆ పేరు మాటున పశ్చిమ దేశాల కంపెనీల కోసం కార్మికులకు నామమాత్రంగా మేలు చేసే నిబంధనలకు, చట్టాలకు చెల్లుచీటీ చెబుతున్నారు మన ప్రధాని.