యు.పి.ఎస్.సి: భాష రాజకీయాల జీనీ వదిలారా? -కార్టూన్


CSAT controversy

సివిల్స్ పరీక్షల్లో మూడేళ్ళ క్రితం ప్రవేశపెట్టిన CSAT (Civil Services Aptitude Test) ప్రశ్న పత్రంపై మరోసారి రగడ రేగింది. హిందీ ప్రాంతాల వాళ్ళు ప్రధానంగా ఈ ఆందోళనలో పాలు పంచుకుంటున్నారు. ఆంగ్లేతర మాధ్యమాలలో పరీక్ష రాసేవారికి వ్యతిరేకంగా కుట్ర చేశారని, గ్రామీణ నేపధ్యం ఉన్న వాళ్ళను ఉన్నత స్ధాయిలకు రాకుండా అడ్డుకునేందుకే ఆంగ్ల భాషా ప్రావీణ్యాన్ని పరీక్షించే భాగాన్ని ప్రవేశపెట్టారని వారు విమర్శిస్తున్నారు. త్వరలో జరగబోయే సివిల్స్ పరీక్షలను వాయిదా వేసి తమ సమస్యలను పరిష్కరించాలని డిమాండ్ చేస్తున్నారు.

అయితే, ఆంగ్ల భాషా ప్రావీణ్యంను పరీక్షించే ప్రశ్నలకు 22 మార్కులు మాత్రమే కేటాయించారని అసలు సమస్య అది కాదని కొందరు చెబుతున్నారు. నూతన సరళి సైన్స్ విద్యార్ధులకు ఎక్కువగా అనుకూలంగా ఉన్నదని మానవ శాస్త్రాల విద్యార్ధులు నష్టపోతుండడంతో అదే ప్రధాన సమస్య అయిందని తెలుస్తోంది. ఆంగ్ల ప్రశ్నలకు ఇస్తున్న హిందీ అనువాదం పరమ ఘోరంగా ఉంటోందని హిందీ మీడియం విద్యార్ధులు ఆరోపిస్తున్నారు.

ఉదాహరణకి ఒకసారి ఎకనమిక్ రిఫార్మ్స్ అన్న పదాన్ని భూమి సుధార్ అంటూ అనువదించారని, వాస్తవానికి భూమి సుధార్ అంటే వాస్తవ అర్ధం భూ సంస్కరణలు అనీ, ఇటువంటి అనువాదంతో హిందీ లేదా ఇతర ఆంగ్లేతర భాషల విద్యార్ధులు తీవ్రంగా నష్టపోతున్నారని ఆందోళనకారుల విమర్శ. వివిధ రంగాల మేధావులు CSAT కు అనుకూలంగానూ, వ్యతిరేకంగానూ కూడా వాదిస్తుండడం విశేషం. ఆంగ్లం తెలిసిన వారు ‘ఆంగ్లం నేర్చుకోవచ్చుగా’ అని ప్రశ్నిస్తున్నారు.

ప్రజల సంస్కృతిలో భాష అనేది అత్యంత ముఖ్యమైన దినుసు. పాలనావేత్తలు ప్రజలతో నిత్య సంబంధంలో ఉండాలంటే మొదట వారు మాట్లాడే భాషపైన గౌరవం ఉండాలి. ఆంగ్ల భాషలో మాట్లాడడం, రాయడం గొప్పగా భావించేవారు సివిల్స్ లో ప్రవేశిస్తే దేశీయ భాషల పట్ల వారు తిరస్కార భావంతో ఉంటారనడంలో సందేహం లేదు. జపాన్, జర్మనీ, ఫ్రాన్స్, చైనా లాంటి దేశాల్లో ఆంగ్ల భాషను దూరం పెడుతూనే అత్యున్నత సాంకేతిక అభివృద్ధిని సాధించగలిగాయి. కాబట్టి ఆంగ్ల భాష నేర్చుకోవడం అత్యవసరం అనడం సత్యదూరమే కాగలదు.

కాకపోతే ప్రజలలో విస్తృతంగా వాడుకలో ఉన్న దేశీయ భాషా పదజాలాన్ని సాంకేతిక పరిజ్ఞానంలోకి చొప్పించడంలో దేశంలోని ప్రభుత్వాలు ఘోరంగా విఫలం అయ్యాయి. అనగా దేశీయ భాషలను అభివృద్ధి చేసుకోవడంలో వారు విఫలం అయ్యారు. వలస పాలకులు చొప్పించిన ఆంగ్ల మాధ్యమం ఇప్పటికీ దేశీయ భాషలపై ఆధిపత్యం కొనసాగించడం, అది సివిల్స్ పరీక్షలను సైతం వదలకపోవడం ఒక దౌర్భాగ్యం. ఒక మాధ్యమంగా ఆంగ్ల భాషను నేర్చుకోవడం ఎవరూ వ్యతిరేకించవలసిన అవసరం లేదు. కానీ వివిధ రకాల సామర్ధ్యాన్ని కొలవడానికి కూడా ఆంగ్ల భాషను ముందు పీఠిన నిలబెట్టడమే అభ్యంతరకరం.

భాషా వైరుధ్యాల రాజకీయాల జీనీని యు.పి.ఎస్.సి అనవసరంగా బైటకు రప్పించిందని కార్టూన్ సూచిస్తోంది. సిరా సీసాలోని భాషా రాజకీయాలను సివిల్స్ పరీక్ష పత్రంపై ఒలికించబూనిన ఫలితంగా ఆందోళనలు మిన్నంటాయని కార్టూనిస్టు సూచిస్తున్నారు.

ప్రకటనలు

6 thoughts on “యు.పి.ఎస్.సి: భాష రాజకీయాల జీనీ వదిలారా? -కార్టూన్

  1. -సి-శాట్ ప్రవేశ పెట్టి మూడు సంవత్సరాలు దాటింది. మరో ఇరవై రోజుల్లో పరీక్ష జరగబోతుండగా…ఇప్పుడు పరీక్ష పెట్టాలా…? వాయిదా వేయాలా అనే చర్చ జరగడం మరీ వింత. మరో వైపు సంవత్సరకాలంగా పరీక్షకు సిద్ధమవుతున్న సీరియస్ అభ్యర్థులకు ఇది పిడుగు పాటుగా మారింది. సంవత్సరం నుంచీ సీరియస్ గా ప్రిపేర్ అవుతున్నవారికి ఇప్పుడు అసలు పరీక్ష జరుగుతుందో జరగదో తెలీక ఓ వైపు, జరిగినా సీ-శాట్ ఉంచుతారా ఉంచరా అని మరో వైపు టెన్షన్ తో జుట్టు పీక్కుంటున్నారు.

    -ఈ వివాదం ఎన్నికల ముందే జరిగి ఉంటే అభ్యర్థుల డిమాండ్ నెరవేరి ఉండేదని నా వ్యక్తిగత అభిప్రాయం. ఎందుకంటే వారి ఆందోళన మేరకే ఈ సారి రెండు సంవత్సరాల వయో పరిమితిని పెంచారు. అప్పుడే సి-శాట్ డిమాండ్ కూడా తీవ్రంగా చేయాల్సింది. అప్పుడు మౌనంగా ఉన్న వాళ్లు తీరా పరీక్ష దగ్గరపడేముందు ఆందోళన చేయడం చేతులు కాలాక ఆకులు పట్టుకున్నట్లే ఉంది. ముందే చేసి ఉంటే ఎప్పుడో పరిష్కారమయ్యేది.
    ఇప్పుడు ఆందోళన వల్ల…ఒక వేళ ప్రభుత్వం సిలబస్ మార్చడానికి ఒప్పుకుందే అనుకుందాం. మరి ఆ కొత్త సిలబస్ ప్రకారం…ప్రిపేర్ కావడానికి అభ్యర్థులకు సమయం ఇవ్వాలి కదా. సివిల్స్ పరీక్షలకు కనీసం సంవత్సరం ప్రిపేర్ అవుతారు. మరి ఇప్పుడు వారికి అంత సమయం లభిస్తుందా.? ప్రిలిమ్స్ తర్వాత మెయిన్స్ పరీక్షకు ప్రిపేర్ అయ్యేందుకు గడువు ఉండాలి. అక్కడ అభ్యర్థులకు ఇబ్బందిగా మారుతుంది.

    -అసలు ఈ సి-శాట్ గురించి హిందీ మీడియం అభ్యర్థులు ఆందోళన చేయడం నాకు ఆశ్చర్యంగా అనిపిస్తోంది. ఎందుకంటే వారికి కనీసం హిందీ అనువాదమైనా లభిస్తుంది. ఒక వేళ ఎకానిమిక్ రిఫార్మ్స్ ను, లాప్ టాప్ ను అనువదించడంలో లోపాలు దొర్లి ఉండవచ్చు. పక్కనే ఇంగ్లీష్ లో ఉంటుంది కదా. ఎకానమిక్ రిఫార్మ్స్ అని….నా ఉద్దేశం కనీసం వాళ్లకు ఎంతో కొంత హిందీ అనువాదం ఉందని. మరి మిగతా మీడియం వాళ్ల పరిస్థితి ఏమిటి…? వాళ్లకు మెటిరియల్ దొరకదు. మొత్తం ప్రిలిమ్స్, మెయిన్స్ మొత్తం వారిది కాని భాషలోనే రాయాలి.
    ఇంకో హాస్యాస్పదమైన విషయం ఏమంటే హిందీ అభ్యర్థులు చేస్తున్న డిమాండ్ ఇంగ్లీష్ భాషా పరిజ్ఞానం పరీక్షించే దానికి హిందీ అనువాదం ఉండడం లేదని.
    ఆ ప్రశ్నల ఉద్దేశమే ఇంగ్లీష్ భాషా జ్ఞానం పరీక్షించడం. మళ్లీ హిందీ అనువాదం ఇస్తే….ఇక ప్రశ్నలు ఇవ్వడం ఎందుకు…? ఐనా ఆ ప్రశ్నలు కూడా చాలా సాధారణ స్థాయిలో ( పదో తరగతి స్థాయిలోనే) ఉంటాయి. అవి కూడా ఎనిమిది ప్రశ్నలు. కేవలం ఎనిమిది ప్రశ్నల కోసమే హిందీ విద్యార్థులు ఆందోళన చేస్తే…వారికి మద్దతుగా హిందీ రాష్ట్రాల ఎంపీలు పార్లమెంటు ఉభయసభలని దద్దరిల్లేలా చేస్తున్నారు. ప్రభుత్వానికి కంటిమీద కునుకు లేకుండా నిత్యం ఆందోళన చేస్తున్నారు.
    మరి ఎన్నో ఏళ్లుగా తెలుగు విద్యార్థులు ఇంత అవస్థ పడుతున్నా మన రాష్ట్ర ఎంపీలు కనీసం మన వాళ్ల గురించి పార్లమెంటులో మాట్లాడిన పాపాన పోలేదు…
    ఇక హిందూ కార్టూన్ ప్రకారం…మోడి ప్రభుత్వం హిందీ అభ్యర్థుల ఆందోళనకు తలవంచి..సీ-శాట్ లో ఇంగ్లీష్ ప్రశ్నలకు హిందీ అనువాదం ఇస్తే..మరి ప్రాంతీయ భాషా అభ్యర్థులు కూడా ఆందోళ చేస్తారు కదా….? ఇక ఆందోళనలకు అంతెక్కడ…?

    పోనీ మొత్తం సి-శాట్ పరీక్షనే రద్దు చేసి …వాళ్లు కోరుతున్న ప్రకారం ఆప్షన్ నే రెండో పేపర్ గా ఉంటే పాత విధానాన్ని పెట్టాలనే డిమాండ్ కూడా ఆచరణలో సాధ్యం కాదు. ఎందుకంటే పాత విధానం ఇప్పుడున్న ఒక్క ఆప్షనల్ విధానంలో పనికి రాదు. గతంలో రెండు ఆప్షన్ లు ఉండేవి. ఒకటి మెయిన్ ఆప్షన్- అంటే ప్రిలిమ్స్ లో ఆ ఆప్షన్ పై రెండో పేపర్ ( ఇప్పుడు సి-శాట్) పరీక్ష నిర్వహించే వారు. కానీ ఆ విధానం పూర్తిగా అసమంజసంగా ఉండేది. ఫిజిక్స్, కెమిస్ట్రీ, లేదా బయాలజీ అభ్యర్థులకు సహజంగానే పేపర్ చాలా కఠినంగా ఉండేది. ఇక సిలబస్ లిమిటెడ్ గా ఉంటే పబ్లిక్ అడ్మిమినిస్ట్రేషన్, ఆంతోపాలజీ వారికి పరీక్ష సులభంగా ఉండేది. ఫలితంగా ఎక్కువ మంది ఆంత్రోపాలజీ, పబ్లిక్ అడ్మినిస్ట్రేషన్ నే తీసుకునే వారు. ఓ దశలో సివిల్స్ రాసే అభ్యర్థుల్లో సగం మంది పై రెండు ఆప్షనల్ తోనే పోటీపడే వారు. ఈ తరహా విధానానికి చెక్ పెట్టేందుకు….సి-శాట్ ను ప్రవేశ పెట్టారు.
    ఇక ఇప్పుడు మళ్లీ పాత తరహాలో ఆప్షనల్ ను రెండో పేపర్ గా పెట్టడం కుదరదు. ఎందుకంటే గతంలో రెండు ఆప్షనల్ ఉండేవి.కాబట్టి ఒకటి మెయిన్ ఆప్షనల్ గా తీసుకుని….రెండోది లాంగ్వేజ్ తీసుకునే వారు. అంటే హిస్టరీ-తెలుగు లేదా సైకాలజీ-తెలుగు. మిగతా రాష్ట్రాల వాళ్లు….ఆయా రాష్ట్రాల మాతృభాషను తీసుకునే వారు. ఇప్పుడున్న విధానంలో రెండు ఆప్షనల్ తీసేసి ఒకటే ఆప్షనల్ ఉంచారు. అంటే ఇప్పుడెవరైనా తెలుగు ( మాతృభాష) ఆప్షనల్ గా ఉన్న వారికి ప్రిలిమ్స్ పరీక్ష ఆయా మాతృభాషలో పెట్టాల్సి ఉంటుంది. అంటే తెలుగు భాషకు సంబంధించి పేపర్ తెలుగు భాషలోనే ఇవ్వాల్సి ఉంటుంది. అలాంటపుడు మాతృభాషలో ప్రిలిమ్స్ రాసే అవకాశం ఎవరు వదులుకుంటారు. అప్పుడు మొత్తం మాతృభాషలో రాసే విద్యార్థులు ఉంటారు. అప్పుడు సివిల్స్ పరీక్ష కాస్త మాతృభాషలో పరిజ్ఞానం పరీక్షగా మారిపోతుంది. ఆ రకంగా అసలు పరీక్షల ఉద్దేశమే దెబ్బతింటుంది.

    అసలు సివిల్స్ పరీక్షలో ఉన్న ప్రధాన లోపం ఏమిటంటే “అభ్యర్థి తన కిష్టం వచ్చిన ఆప్షనల్ ఎంచుకోవచ్చు” అనడంలోనే ఉంది. అక్కడే సమస్యకు బీజం పడుతోంది. ఎందుకంటే ప్రపంచంలో ఒక పరీక్ష రాసే అభ్యర్థులకు ఎవరికైనా అందరికీ కలిపి ఒకటే పేపర్ ఉంటుంది. కానీ సివిల్స్ లో మాత్రం ఏ ఆప్షనల్ కు తగ్గట్టు ఆ పేపర్ ఉంటుంది. మొత్తం ఇరవై ఐదు ప్రధాన ఆప్షనళ్లు (అంటే ఫిజిక్స్,సైకాలజీ, హిస్టరీ మొ.) మరో పందొమ్మిది భాషా ఆప్షనళ్లు మొత్తం నలభైనాలుగు రకాల పేపర్లు ఉంటాయి. ఎవరి పేపర్ వాళ్లు రాస్తారు. అంటే తెలుగులో రాసే వాళ్లు- కఠిన మైన ఫిజిక్స్ లో రాసే వాళ్లు… వీరందరికీ కలిసి ఒకే ర్యాంకు ఉంటుంది. ఇక్కడే అసలు సమస్య. ఒక సంవత్సరం సైకాలజీ పేపర్ సులభంగా ఉండొచ్చు, లేదా హిస్టరీ పేపర్ సులభంగా ఉండొచ్చు. ( సాపేక్షంగా మరో సబ్జెక్ట్ పేపర్ తో పోలిస్తే)
    అప్పుడు సహజంగానే ఈజిగా ఉన్న పేపర్ అభ్యర్థులే ఎక్కువగా సెలక్ట్ అవుతుంటారు. ఐఐటీ లో చదివిన ప్రతిభావంతులైన విద్యార్థులు కూడా ఆంత్రోపాలజీ, పబ్లిక్ అడ్మినిస్ట్రేషన్ తీసుకునేది ఈజీగా గట్టెక్కొచ్చనే ఉద్దేశంతోనే.
    మన రాష్ట్రంలో ఇంటర్మీడియట్ లో తెలుగు వదిలేసి సంస్కృతం లాంగ్వేజ్ తీసుకున్నట్లు..ఈజీ పేపర్లు ఏమిటో వ్యూహాత్మకంగా ఎంపికచేసుకుంటారు. ఇక టక్కుటమార ,గజకర్ణ గోకర్ణ విద్యలు తెలిసిన కోచింగ్ సెంటర్ల గురించి చెప్పేదేముంది. తమ అభ్యర్థులను ఎలాగైనా ఒడ్డున పడేసేందుకు రకరకాల మార్గాల్లో ప్రయత్నిస్తుంటాయి.

    అసలు సివిస్ సర్వీస్ ఉద్యోగికి కావాల్సింది, బలహీన వర్గాల సంక్షేమం గురించి పాటుపడడం. ప్రభుత్వ పథకాల్లో అక్రమాలు చోటుచేసుకోకుండా పేద ప్రజల వద్దకు చేర్చడం. కానీ పరీక్ష విధానంలో వీటి గురించి చర్చ కాకుండా….ఇంగ్లీష్ ఉండాలా- హిందీ ఉంచాలా…అనే చర్చ జరగడం శోచనీయం.

    -మొత్తంగా ఈ వివాదానికి తెర పడాలంటే ఒకటే మార్గం. సి-శాట్ రెండో పేపర్ ను రద్దు చేసి మొదటి పేపర్ కే ఇంకో యాభై ప్రశ్నలు కలిపే ఒకటే పేపర్ ను పరీక్ష నిర్వహించాలి. అలాగే ఆప్షనల్ మొత్తం రద్దు చేసి కేవలం జనరల్ స్టడీస్ పైనే పరీక్ష ఉండాలి. అదీ ప్రాంతీయ భాషలన్నింటిలోకి ప్రశ్న పత్రాలు అనువందిచి ఇవ్వాలి-ప్రిలిమ్స్ తో సహా.

  2. సిశాట్ పరీక్ష అనవసరం,అది గ్రామీణ(మాతృభాష)ప్రాంత అభ్యర్ధులకు కొంత ప్రతికూలమైనప్పటికీ?!,
    సైన్స్ విధ్యార్ధులకు అనుకూలమనడం సహేతుకం కాదు,అది ప్రాధమిక తరగతుల స్థాయిలోని అంశాలకు చెందినదే!
    పరీక్షను అన్ని భారతీయ(గుర్తింపు కలిగిన) భాసలలో నిర్వహిస్తే అందరికీ అనుకూలంగా ఉంటుందనడం సహేతుకం.

  3. chandu tulasi gaaru..what u have said z very informative and well analysed ,but it z not rational to say dat telugu optional z very easy and cake walk ,comparitively with physics and others.infact telugu literature z the bit tougher and creative compared to other optionals ,as one have to deal with aesthetic ,rasa ,dwaani ,vakrokthi kind approach.and your emphathetic words to telugu medium students are great full thnq..

  4. హిందీని బలవంతంగా రుద్దాలని కుట్ర జరుగుతుందని అనుమానం. మునుపెన్నడు లేని హిందీ మాటలు దక్షిణాది రాష్ట్రాల్లో అదీ భక్తుల నోల్ల నుండి వింటున్నాము. ఆంగ్లం సామ్రాజ్య వాధ తాబే దార్ల ఉత్పత్తి కి తప్పని సరైన భాష. అది అంత సులభంగా పోతుందా?
    ఒక ఉమ్మడి విధ్యా విధానం లేని దేశం లో పోటీ అనేది ఒక జిమ్మిక్‌ మాత్రమే. అది ఎవరికి అనుకూలంగా ఉండాలో వారికే ఉంటుంది.

  5. being an aspirant of Civils, i personally felt that it doesnt require a optional at all to check ones administrative abilities.The present scheme of examination is good except optional subject papers in Mains. CSAT (Prelims) to be continued by making 2nd paper only qualifying in nature(with out any translation) and providing translation in all 8th schedule languages for GS paper (1st paper).

  6. నాయుడు గారు. మీరు చెప్పినది నిజమే. తెలుగు ఆప్షనల్ మిగతా ఏ ఆప్షనల్ కన్నా ఈజీ కాదు. అక్కడ నా ఉద్దేశం ఏమిటంటే తెలుగు అంటే మాతృభాష అని. మనది ప్రాచీన భాష కాబట్టి. మనకు చాలా సిలబస్ ఉంది. అదే కొన్ని ప్రాంతీయ భాషల సిలబస్ చూడండి. అవి ఆధునిక యుగంలో అభివృద్ధి చెందిన భాషలు. వాటికి ఉన్న సాహిత్యం చాలా తక్కవ. సివిల్స్ సిలబస్ చాలా చాలా తక్కువ.
    ఆ రకంగా మిగతా పేపర్ల కన్నా మాతృభాష సాహిత్యం అధ్యయనం చేయడం కొంత సులభమే కదా. అదీ నా ఉద్దేశం.

స్పందించండి

Fill in your details below or click an icon to log in:

వర్డ్‌ప్రెస్.కామ్ లోగో

You are commenting using your WordPress.com account. నిష్క్రమించు / మార్చు )

ట్విటర్ చిత్రం

You are commenting using your Twitter account. నిష్క్రమించు / మార్చు )

ఫేస్‌బుక్ చిత్రం

You are commenting using your Facebook account. నిష్క్రమించు / మార్చు )

గూగుల్+ చిత్రం

You are commenting using your Google+ account. నిష్క్రమించు / మార్చు )

Connecting to %s