ముంబై లోని శక్తి మిల్స్ అత్యాచారం ఘటన ఢిల్లీలో జరిగిన నిర్భయ ఘటనకు ఏ మాత్రం తీసిపోనిదని ప్రిన్సిపల్ సెషన్స్ జడ్జి శాలిని ఫన్సల్కర్ తన తీర్పులో వ్యాఖ్యానించారు. నిర్భయ ప్రాణం కోల్పోవలసి రాగా ముంబై బాధితురాలు తట్టుకుని నిలబడ్డారని ఆమె ఇచ్చిన సాక్ష్యం కేసుకు అత్యంత బలమైన మూలాధారం అనీ జడ్జి తన తీర్పులో పేర్కొన్నారు. బాధితురాలితో పాటు ఆమెతో వెళ్ళిన ఆమె స్నేహితుడు కూడా చివరి వరకూ నిలబడి పోరాడిన తీరు అభినందనీయం అని జడ్జి అభినందించారు. జడ్జి అభినందన మరింత మంది బాధితులకు ధైర్యంగా అండగా నిలవడానికి తగిన భూమిక కాగలదు.

“ఆమె ఏకైక సాక్ష్యమే అత్యంత దృఢమైనది. మొత్తం ఘటనకు సంబంధించిన పూర్తి వివరాలపై ఉజ్వల కాంతి ప్రసరించేలా వివరిస్తూ వాస్తవ సంఘటనల క్రమాన్ని శక్తివంతంగా చెప్పగలిగారు. ఆ సాక్ష్యం ఎంత శక్తివంతంగా ఉన్నదంటే మరో మాటకు తావు లేకుండా కేసును ముగించడమే ఇక మిగిలింది. నిందితుల నేరాన్ని రుజువు చేయడానికి అన్ని కోర్టుల్లోనూ ఆమె ఇచ్చిన ఒక్క సాక్ష్యమే సరిపోతుంది. ఆమె కోర్టు ముందుంచిన సాక్ష్యం రాయిలా నిలబడి పోయింది. కోర్టులో సాక్ష్యం ఇస్తున్న క్రమంలో తాను మరోసారి ఆ దుర్ఘటనలోకి వెళ్ళిపోయి బాధాపరితప్త హృదయంతో జీవించిన తీరు హృదయాన్ని కలచివేసింది. ఆ సజీవ సాక్ష్యం ఎంతగా హృదయాలను తాకిందంటే ఆమెను నమ్మకుండా ఉండగల ధైర్యం ఎవరూ చేయలేరు” అని జస్టిస్ శాలిని ఫన్సల్కర్ తన తీర్పులో పేర్కొన్నారని ది హిందు తెలిపింది.

శక్తి మిల్స్ లో అత్యాచారానికి గురయిన ఫోటో జర్నలిస్టు కేసులో ముగ్గురు నిందితులకు కోర్టు మరణ శిక్ష విధించిన సంగతి తెలిసిందే. పలువురు సామాజికవేత్తలు మరణ శిక్షలను ఆమోదించడం లేదు. రిపీట్ అఫెండర్స్ (మళ్ళీ మళ్ళీ అత్యాచార నేరానికి పాల్పడేవారు) అన్న లాజిక్ శక్తి మిల్స్ నిందితులకు వర్తించదని వారు అభిప్రాయపడుతున్నారు. ఒకసారి అత్యాచారం చేశాక నేరం రుజువై శిక్ష పడిన తర్వాత మళ్ళీ అదే నేరానికి పాల్పడితే రిపీట్ అఫెండర్ అవుతారని, ఈ కేసులో అలా జరగలేదని వారి అభిప్రాయం. గత నేరాలు తాజా నేరం సందర్భంగానే వెలుగులోకి వచ్చిన విషయాన్ని వారు గుర్తు చేస్తున్నారు. మరణ శిక్ష ద్వారా నేరస్ధులు తమ ప్రవర్తనను సరిచేసుకునే అవకాశం లేకుండా పోయిందనీ, ఒకసారి శిక్ష పడ్డాక కూడా అదే నేరం చేస్తే మరణ శిక్ష విధించాలని చట్టం చెబుతోంది తప్ప ఈ కేసులో లాగా కాదని వారు చెబుతున్నారు. బహుశా వీరి వాదన పై కోర్టులో పరిగణనలోకి వస్తుందేమో చూడవలసి ఉంది.

బాధితురాలి స్నేహితుడిని కూడా కోర్టు అభినందించింది. ఆయన ఎంతో ధైర్యాన్ని ప్రదర్శించి బాధితురాలికి చివరివరకూ తోడు నిలిచారని కొనియాడింది. “దుర్ఘటన జరిగిన వెంటనే బాధితురాలు, ఆమె స్నేహితుడు పోలీసులకు ఫిర్యాదు చేయడం ద్వారా సాహసోపేతంగా వ్యవహరించారు. (న్యాయం పొందడానికి) ఆమె చేసిన ప్రయత్నాలన్నింటా ఆయన వెంట ఉన్నారు. దుర్ఘటన జరిగినప్పుడు ఆమెను కాపాడడానికి ప్రయత్నించడం, పోలీసుల వద్దకు రావడమే కాకుండా ట్రయల్ లో కూడా నిలబడినందుకు ఆయనను అభినందించి, ప్రోత్సహించాలి” అని కోర్టు తీర్పు పేర్కొంది. కోర్టు పరిశీలన మరింత మంది సాక్ష్యులకు ప్రోత్సాహకరం అవుతుందనడంలో సందేహం లేదు.

శక్తి మిల్స్ అత్యాచార ఘటన సమాజం ఉమ్మడి చేతనకు దిగ్భ్రాంతిని కలుగజేసిందని కోర్టు వ్యాఖ్యానించింది. “నిర్భయ ఘటనకు సంబంధించిన ఆందోళన, పరితాపం ఇంకా చల్లబడకముందే ఈ ఘటన జరిగింది. కఠిన చట్టాలు రూపొందిస్తున్నప్పటికీ, యువకులు ఇటువంటి క్రూరమైన, అమానవీయ ఘటనలకు పదే పదే పాల్పడుతున్నారు. మానవ జీవితానికి ఉన్న పవిత్రత పట్ల ఏ మాత్రం గౌరవం చూపకుండా వ్యక్తిగత సమగ్రతను ఉల్లంఘిస్తున్నారు. ఆ క్రమంలో శాంతి భద్రతలకు, చట్టాల అమలుకు తీవ్ర విఘాతంగా మారుతున్నారు. వారి ప్రవర్తన సహనశీలతకు ఏ మాత్రం అందుబాటులో లేదు. సమాజం అర్ధం చేసుకునేందుకు ఎంత మాత్రం తగనిది” అని తీర్పు పేర్కొంది.

శక్తి మిల్స్ ఘటన ముంబై ప్రతిష్టను దెబ్బ తీసిందని, మహిళలకు భద్రమైన నగరంగా పేరు పొందిన ముంబై పేరుకు నష్టం కలిగించిందని కోర్టు వ్యాఖ్యానించడం ఒక విచిత్రం. నిందితుల నేర ప్రవర్తన ఒక నిర్దిష్ట నగరంతో ముడి పడి ఉంటుందా లేక దేశంలోని సామాజిక విలువలతో ముడిపడి ఉంటుందా? అత్యాచారం అన్నది కేవలం నిందితుల శారీరక వాంఛలకు మాత్రమే సంబంధించినది అన్న అవగాహన నుండి ఇలాంటి అభిప్రాయం వ్యక్తం అయి ఉండవచ్చు. కానీ అత్యాచారం అన్నది ప్రధానంగా ఆధిపత్యానికి, అణచివేతకు సంబంధించిన దూర్మార్గపూరిత వ్యక్తీకరణ అన్న సంగతి ఎప్పటికి కోర్టులు, ప్రభుత్వాల దృష్టికి వచ్చేను?

(అదీ గాక ముంబై మహిళలకు భద్రమైన నగరం అనడం సత్యదూరం. ఈ లింక్ లు చూడండి:

నా జీవితంకోసం పోరాడి గెలిచాను -30 సం. క్రితం సొహైలా

గాయపడింది నేను, నా గౌరవం కాదు -సొహైలా అబ్దులాలి

బాధితురాలి తరపున వాదించిన పబ్లిక్ ప్రాసిక్యూటర్ ఉజ్వల్ నికం వ్యక్తం చేసిన అభిప్రాయాలూ కూడా దాదాపు ఇదే విధంగా ఉన్నాయి. “అత్యాచారం అనేది మహిళ శరీరంపై దాడి మాత్రమే కాదు. ఆమె మనసు, శీలం, ప్రతిష్ట, ఆత్మ గౌరవం లపైన దాడి కూడా. బాధితురాలు చనిపోతే తప్ప ఆ గాయాలు మానిపోవు” అని ఉజ్వల్ నికం కోర్టులో వాదించారు. అత్యాచారానికి గురయిన స్త్రీ చనిపోవడం తప్ప మరో మార్గం లేదని చెప్పే వాదన ఎంత ఘోరం, ఎంత లోపభూయిష్టం! స్త్రీల శీలం, పరువు ప్రతిష్టలు అత్యాచారం వల్ల పోతాయని చెప్పడం కంటే మించిన పితృస్వామిక ఆధిపత్య భావజాల వ్యక్తీకరణ మరొకటి ఉంటుందా?