స్వలింగ సంపర్కాన్ని నేర సమానం చేసే చట్టాన్ని రద్దు చేస్తూ ఢిల్లీ హై కోర్టు ఇచ్చిన తీర్పును సుప్రీం కోర్టు తిరస్కరించింది. అసహజమైన స్వలింగ సంపర్కం చట్ట విరుద్ధం అని స్పష్టం చేసింది. ఐ.పి.సి లోని సెక్షన్ 377 స్వలింగ సంపర్కాన్ని నిషేధిస్తుంది. దీనికి పాల్పడినవారిని నేరస్ధులుగా పేర్కొంటూ గరిష్టంగా 10 సంవత్సరాల జైలు శిక్షను ఇది ప్రతిపాదిస్తుంది. పౌరుల ప్రాధమిక హక్కులను తిరస్కరిస్తోందని చెబుతూ ఈ సెక్షన్ ను రద్దు చేస్తున్నట్లుగా 2009లో ఢిల్లీ హై కోర్టు తీర్పు చెప్పింది.

ఈ తీర్పును స్వలింగ సంపర్కుల హక్కుల సంస్ధలు స్వాగతించగా పలువురు వ్యతిరేకించారు. తీర్పుకు అనుకూలంగానూ, వ్యతిరేకంగానూ దాఖలయిన పిటిషన్లను ఒక్కటిగా చేసి సుప్రీం కోర్టు విచారణ నిర్వహిస్తోంది. గత సంవత్సరం ఫిబ్రవరి నుండి తీర్పును రిజర్వులో పెట్టిన సుప్రీం కోర్టు బుధవారం తన తీర్పు వెలువరించింది.

స్వలింగ సంపర్కం అసహజం అనీ, చట్ట విరుద్ధం అనీ సుప్రీం కోర్టు చెప్పినప్పటికీ ప్రభుత్వం నుండి మరిన్ని సలహాలు సూచనలు స్వీకరించడానికి సిద్ధంగా ఉన్నట్లు తెలిపింది. ప్రభుత్వం అవసరం అనుకుంటే ఐ.పి.సి సెక్షన్ 377 ను రద్దు చేయడం గానీ లేదా సవరణలు చేయడం గానీ చేయదలుచుకున్నట్లయితే తమకు అభ్యంతరం లేదని సుప్రీం కోర్టు తెలిపింది. ఇప్పటికైతే హై కోర్టు తీర్పును పక్కన బెడుతున్నట్లు స్పష్టం చేసింది.

సెక్షన్ 377 ప్రస్తుతం ఉనికిలో ఉన్న భారతీయ సాంప్రదాయాలను, విలువలను ప్రతిబించేది కాదని, వాస్తవానికి బ్రిటిష్ ప్రభుత్వం తమ సమాజంలోని విలువలకు అనుగుణంగా ఈ సెక్షన్ ను భారత దేశం రుద్దిందని అటార్నీ జనరల్ వాహనవతి సుప్రీం కోర్టులో వాదిస్తూ పేర్కొన్నారు.

“ఐ.పి.సి సెక్షన్ 377 భారత దేశంలో ఉనికిలో ఉన్న విలువలు, సాంప్రదాయాలను ప్రతిబింబిస్తూ ప్రవేశపెట్టినది కాదు. వలస పాలకులు తమ నైతిక విలువలకు అనుగుణంగా ఈ చట్టాన్ని మనపై రుద్దారు. ఐ.పి.సి ప్రవేశపెట్టడానికి ముందు భారత దేశంలో ఉన్న సమాజం స్వలింగ సంపర్కం పట్ల బ్రిటిష్ సమాజం కంటే మరింత గొప్ప సహనాన్ని పాటించింది. ఆ కాలంలో కుటుంబం మరియు సంతానోత్పత్తిలకు సంబంధించి ఉనికిలో ఉన్న విక్టోరియన్ నైతికత మరియు విలువల ప్రభావం మేరకు ఈ సెక్షన్ ను పొందుపరిచారు” అని అటార్నీ జనరల్ జి.ఇ.వాహనవతి వాదించారు.

అయితే అంతకుముందు హోమ్ మంత్రిత్వ శాఖ తరపున సుప్రీం కోర్టులో వాదించిన అడిషనల్ సొలిసిటర్ జనరల్ పి.పి.మల్హోత్రా సుప్రీం కోర్టులో దీనికి సరిగ్గా భిన్నమైన వాదన వినిపించారు. స్వలింగ సంపర్కం పూర్తిగా అనైతికం అనీ, భారతీయ సంప్రదాయాలకు విరుద్ధం అనీ వాదిస్తూ ఢిల్లీ హై కోర్టు తీర్పును రద్దు చేయాలని కోరారు. “స్వలింగ సంపర్కం తీవ్ర అనైతికం. సామాజిక నియమాలకు విరుద్ధం. అలాంటి చర్యల ద్వారా వ్యాధులు వ్యాపించే అవకాశం చాలా ఎక్కువగా ఉన్నది” అని జస్టిస్ జి.ఎస్.సింఘ్వి, ఎస్.జె.ముఖోపాధ్యాయ లతో కూడిన బెంచి ముందు వాదించారు. తాను హోమ్ మంత్రిత్వ శాఖ తరపున వాదిస్తున్నట్లు కూడా ఆయన తెలిపారు.

“ఇతర దేశాలతో పోలిస్తే మన రాజ్యాంగం భిన్నమైనది. నైతిక, సామాజిక విలువలు కూడా భిన్నమైనవే. కాబట్టి మనం వాటిని అనుసరించలేము. భారతీయ సమాజం స్వలింగ సంపర్కాన్ని తిరస్కరిస్తుంది. భారతీయ చట్టాలు భారతీయ సమాజానికి భిన్నంగా ఉండజాలవు” అని మల్హోత్రా వాదించారు.

అయితే విచిత్రంగా, మల్హోత్రా వాదనలను హోమ్ మంత్రిత్వ శాఖ అదే రోజు తిరస్కరించింది. ఢిల్లీ హైకోర్టు తీర్పుపై తాము ఎలాంటి నిర్ణయం తీసుకోలేదని, తీర్పుపై జరుగుతున్న వాద, ప్రతివాదాల్లో సుప్రీం కోర్టుకు సహాయం చేయాల్సిందిగా మాత్రమే తాము చెప్పామని హోమ్ శాఖ హడావుడిగా విడుదల చేసిన పత్రికా ప్రకటనలో పేర్కొంది. సహాయం చేయాలని కోరినప్పుడు ఏ విధంగా సహాయం చేయాలో కూడా హోమ్ శాఖ చెప్పి ఉండాలి. హోమ్ శాఖ చెప్పిన మేరకే మల్హోత్రా వాదించి ఉండాలి కూడా. ఐనా ఆయన వెనుక నిలబడడానికి హోమ్ శాఖ ఎందుకు సిద్ధపడలేదన్నది అప్పట్లో పత్రికల్లో ఒక టాపిక్ అయింది. ఢిల్లీ హై కోర్టు తీర్పుపై ఎవరైనా అప్పీలు చేసినట్లయితే సుప్రీం కోర్టుకు సహాయం చేయాలని కేబినెట్ కోరిందని, అంతకు మించి ఆయనకు ఆదేశాలివ్వలేదని హోమ్ శాఖ ప్రకటన తెలిపింది.

సుప్రీం బెంచి మాత్రం అప్పట్లో స్వలింగ సంపర్కానికి అనుకూలమైన వ్యాఖ్యలు చేసింది. సమాజంలో అనేక మార్పులు వస్తున్నాయని, గతంలో ఆమోదయోగ్యం కానివి ఇప్పుడు ఆమోదయోగ్యం అవుతున్నాయని పేర్కొంది. కలిసి బతకడం (live-in relationship), ఒంటరి తల్లి/తండ్రి, అద్దె గర్భం మొదలైన అంశాలను ఉదాహరణలుగా బెంచి పేర్కొంది.

అయితే దేశంలోని పలు సంస్ధలు, సంఘాలు ఢిల్లీ హైకోర్టు తీర్పు రద్దు చేయాలని వాదించాయి. అనేక రాజకీయ, సామాజిక, మత సంస్ధలు ఇందులో ఉన్నాయి. ఈ అంశంపై తుది తీర్పు ఇవ్వాలని సుప్రీం కోర్టును కోరాయి. బి.జె.పి నాయకులు ఢిల్లీ కోర్టు తీర్పును గట్టిగా తిరస్కరించారు. తీర్పును సవాలు చేస్తూ సుప్రీం కోర్టులో పిటిషన్ కూడా వారు దాఖలు చేశారు. బి.జె.పి సీనియర్ నేత బి.పి.సింఘాల్ స్వయంగా పిటిషన్ దాఖలు చేస్తూ స్వలింగ సంపర్కం భారతీయ సంస్కృతికి వ్యతిరేకం అని వాదించారు. అది అనైతికం, చట్ట విరుద్ధం అని ఆయన వాదించారు.

ఈ వాదనలను రికార్డు చేసుకున్న సుప్రీం కోర్టు తన తీర్పును రిజర్వులో ఉంచుతున్నట్లు  మార్చి 27, 2012 తేదీన పేర్కొంది. సదరు తీర్పును ఇప్పుడు వెలువరించింది.

సుప్రీం కోర్టు తీర్పును యోగా గురువు బాబా రాందేవ్ స్వాగతించారు. ఆయన మిత్రుడొకరు ఢిల్లీ హైకోర్టు తీర్పుకు వ్యతిరేకంగా పిటిషన్ దాఖలు చేసినవారిలో ఉన్నారు. తీర్పును స్వాగతించడంతో రామ్ దేవ్ ఊరుకోలేదు. స్వలింగ సంపర్కులు తన వద్దకు వచ్చినట్లయితే వారి జబ్బు నయం చేస్తానంటూ వివాదాస్పద ప్రకటన చేశారు. ఆయన ఏర్పాటు చేసిన పత్రికా సమావేశానికి హాజరయినవారు ఎవరూ స్వలింగ సంపార్కులు కారాదని తాను ప్రార్ధిస్తున్నట్లు కూడా పేర్కొన్నారు. 

తీర్పును వ్యతిరేకించినవారూ అనేకమంది ఉన్నారు. ప్రముఖ లాయర్ హరీష్ సాల్వే తీర్పును వ్యతిరేకించారు. సమాజ్ వాదీ పార్టీ ఎం.పి శివానంద్ తివారీ సుప్రీం తీర్పు కంటే హై కోర్టు తీర్పు శాస్త్రీయంగా ఉందని పేర్కొన్నారు. సుప్రీం తీర్పును గౌరవిస్తామని ఐ.టి మంత్రి కపిల్ సిబాల్ తెలిపారు. ఐతే ‘చట్టాన్ని సవరించే అవకాశం మాకుంది. దానిని వినియోగిద్దాం’ ఆయన వ్యాఖ్యానించారు. దాని అర్ధం ఏమిటో చెప్పడానికి మాత్రం నిరాకరించారు. పార్లమెంటు సమావేశాలు సజావుగా జరిగితే చట్టం రాజ్యాంగ సవరణ చేస్తామని తెలిపారు.