పశ్చిమ దేశాల ప్రజలు ఏకంగా మీడియాపైనే యుద్ధం ప్రకటించారు. ప్రధాన స్రవంతి మీడియా తమకు వాస్తవ వార్తలు అందించడం లేదని ఆరోపిస్తూ వందలాది మంది ఆయా మీడియా సంస్ధల ముందు నిరసన ప్రదర్శనలు నిర్వహించారు. నిరసనలను ఎదుర్కొన్న మీడియా సంస్ధల్లో ‘నిస్పాక్షిక వార్తా ప్రసారానికి చిరునామాగా’ తమ భుజాలు తామే చరుచుకునే ప్రఖ్యాత మీడియా సంస్ధలు ఉండడం విశేషం. బి.బి.సి, ఎన్.బి.సి, ఫాక్స్ న్యూస్, ఎబిసి, సి.బి.ఎస్, సి.ఎన్.ఎన్ తదితర కార్యాలయాల ఎదుట అమెరికా, ఐరోపా, ఆస్ట్రేలియాల వ్యాపితంగా శనివారం నిరసన ప్రదర్శనలు జరిగాయి.

నిరసనకారులు MARCH AGANIST MAINSTREAM MEDIA (MAMSM) అనే సంస్ధను ఏర్పరుచుకుని, దాని ఆధ్వర్యంలో వెబ్ సైట్ కూడా నిర్వహిస్తున్నారు. తమ కార్యాలయాల ముందే జరిగిన నిరసనలను తమ వార్తా ప్రసారాల్లో కవర్ చేయకుండా ఉండాలని ఈ వెబ్ సైట్ ద్వారా సవాలు విసిరారు. తమ ఉద్యమం నిరసన కంటే ఎక్కువేనని, ప్రధాన స్రవంతి మీడియా విశ్వసనీయతపై దాడి చేయడానికే తమ ఉద్యమమని వారు తెలిపారు.

శ్రోతలు, వీక్షకులు ఇక ప్రధాన స్రవంతి మీడియా ప్రచారం చేసే అబద్ధాలను నమ్మడానికి సిద్ధంగా లేరని, అవి ప్రసారం చేయని వాస్తవాల కోసం ప్రత్యామ్న్యాయ మీడియాకోసం వెతుకుతున్నారని వారు తమ వెబ్ సైట్ లో తెలిపారు. MSM (MainSteam Media) ప్రసారం చేయని అనేక ముఖ్యమైన ఘటనలు, పరిణామాలు ప్రజల దృష్టికి రాకుండా పోతున్నాయని, అలాంటివేమీ జరగనట్లుగా ప్రధాన స్రవంతి మీడియా నటించడమే దానికి కారణమని సదరు వెబ్ సైట్ చెబుతోంది.

ఆస్ట్రేలియా బ్రాడ్ కాస్టింగ్ కార్పొరేషన్(ఎ.బి.సి), బ్రిటిష్ బ్రాడ్ కాస్టింగ్ కార్పొరేషన్ (బి.బి.సి), నేషనల్ బ్రాడ్ కాస్టింగ్ కంపెనీ (ఎన్.బి.సి), కేబుల్ న్యూస్ నెట్ వర్క్ (సి.ఎన్.ఎన్), ఫాక్స్ న్యూస్… ఈ వార్తా సంస్ధల పేర్లను MAMSM వెబ్ సైట్ పేర్కొంది. ఈ సంస్ధల ముందు రెండే రెండు ప్రత్యామ్నాయాలు ఉన్నాయని తమ కార్యాలయాల ముందు వేలాది మంది చేస్తున్న నిరసనలను ప్రసారం చేయడమా లేక అలాంటివేమీ జరగనట్లు నటించడమా అన్న విషయాన్ని వారే నిర్ణయించుకోవాలని సవాలు విసిరారు.

రష్యా టుడే వార్తా సంస్ధ ప్రకారం అమెరికా, బ్రిటన్ లలో ప్రదర్శకులు ఫాక్స్ న్యూస్, బి.బి.సి, ఎన్.బి.సి తదితర వార్తా సంస్ధల ముందు నిరసనలు నిర్వహించారు. ప్రపంచ పరిణామాలను తమ ఇరుకు దృక్పధం నుండి కవర్ చేయడం పట్ల వారు నిరసన వ్యక్తం చేశారు. సోషల్ మీడియా వెబ్ సైట్ల ద్వారా వారు ప్రపంచ వ్యాపితంగా నిరసనలను ఆర్గనైజ్ చేశారు. ఎన్నాళ్లుగానో పాతుకుపోయిన ప్రధాన స్రవంతి మీడియా కార్యాలయాల ముందు అమెరికా వ్యాపితంగా MAMSM కార్యకర్తలు నిరసనలు నిర్వహించారు. “మీడియాను బహిష్కరించండి” అని కాలిఫోర్నియా నిరసనల్లో ఒక బ్యానర్ పేర్కొనగా, “అమెరికాకు నిజాలు తెలియాలి” అని కన్సాస్ నగరంలో ప్రదర్శకులు నినదించారని ఆర్.టి తెలిపింది.

2011 మార్చి 11 తేదీన జపాన్ లో ఫుకుషిమా అణు కర్మాగారం వద్ద జరిగిన భారీ అణు ప్రమాదం గురించి ప్రధాన స్రవంతి మీడియా నిజాలను ప్రసారం చేయడం లేదన్న అంశాన్ని నిరసనకారులు ప్రధానంగా ఎత్తి చూపారు. “ఆ అణు కర్మాగారం నుండి విడుదల అయిన రేడియేషన్ మనదాకా రాబోతోంది. మనపై కూడా ప్రభావం వేయబోతోంది. ఒక్క కాలిఫోర్నియాలోనే కాదు ప్రపంచవ్యాపితంగా ఆ ప్రభావం ఉండబోతోంది. ఆ ప్రభావం మనపై ఎలా ఉంటుంది, మనం తాగే నీటిపై ఏ ప్రభావం ఉండబోతోంది, మన ఆహార సరఫరా పైనా, మన జీవన విధానం పైనా ఎలాంటి ప్రభావం కలగజేస్తుంది? ఇవేవీ మనకు చెప్పేవారు లేరు” అని కాలిఫోర్నియాలో ఓ నిరసనకారుడు పేర్కొన్నాడని ఆర్.టి. తెలిపింది.

లండన్ లో బి.బి.సి కార్యాలయం ముందు ప్రదర్శకులు ధర్నా నిర్వహించినట్లు తెలుస్తోంది. “ప్రధాన స్రవంతి మీడియా మేము చెప్పేది వినాలి. చివరికి జనం అంతా ఒక్కటై తమకు కావలసిన మార్పేమిటో వారికి చెప్పనున్నారు” అని లండన్ లో ఒక ప్రదర్శకుడు పేర్కొన్నారు. విలేఖరుల సమగ్రతను పునరుద్ధరించడానికి, కాపాడడానికి తాము పోరాడుతున్నామని ప్రదర్శకులు తెలిపారు.

అమెరికా ప్రధాన స్రవంతి మీడియా పైన ప్రజల విశ్వాసం క్రమంగా విశ్వాసం సన్నగిల్లుతోందని వివిధ సర్వేలు చెబుతున్నాయి. 44 శాతం అమెరికన్లు మాత్రమే మాస్ మీడియా ను నమ్ముతున్నారని 2012 సెప్టెంబర్ లో నిర్వహించిన ఒక సర్వేలో వెల్లడి కాగా అది ఈ యేడు 40 శాతానికి పడిపోయిందని ఆర్.టి తెలిపింది. అంటే 60 శాతం అమెరికన్లు మీడియాపై విశ్వాసం కోల్పోయారన్నమాట. 2005 నుండి అమెరికాలో ఈ విధంగా మీడియాపై విశ్వాసం సన్నగిల్లుతూ వస్తోందని ప్రెస్ టి.వి తెలిపింది.