ప్రధాని నివాసం వద్ద సీమాంధ్ర ఆందోళనకారుల అరెస్టు -ది హిందు

ఎట్టకేలకు తెలంగాణ ప్రజల కోరిక నెరవేర్చే ప్రక్రియను కేంద్ర ప్రభుత్వం అధికారికంగా ప్రారంభించింది. గురువారం సాయంత్రం సమావేశమయిన కేంద్ర కేబినెట్ తెలంగాణ రాష్ట్ర ఏర్పాటుపై హోమ్ మంత్రి ప్రవేశ పెట్టిన నోట్ ను తీర్మానంగా ఆమోదించింది. టి.వి ఛానెళ్లు చెబుతున్నదాని ప్రకారం సి.డబ్ల్యూ.సి తీర్మానాన్ని కేబినెట్ యధాతధంగా ఆమోదించింది. హైద్రాబాద్ 10 యేళ్లపాటు ఇరు రాష్ట్రాలకు ఉమ్మడి రాజధానిగా ఉంటుంది. కొత్త రాజధాని ఎక్కడన్నదీ కేబినెట్ నియమించే మంత్రుల బృందం నిర్ణయిస్తుందని హోమ్ మంత్రి సుశీల్ కుమార్ షిండే ప్రకటించారు.

కొత్త రాజధాని ఏర్పాటుకు కేంద్రం నిధులు ఇస్తుందని హోమ్ మంత్రి ప్రకటించారు. నీళ్ళు, ఉద్యోగాలు, అప్పులు, ఆదాయాలు తదితర అంశాల విభజనను మంత్రుల బృందం చూసుకుంటుందని చెప్పారు.

గురువారం జరిగే కేబినెట్ సమావేశంలో కేబినెట్ సమావేశంలో తెలంగాణ అంశం చర్చకు రాదని, చర్చించనున్నారన్న వార్తలు ఊహాగానాలేనని నిన్న, ఈ రోజు కూడా చెప్పిన సుశీల్ కుమార్ షిండే అందరిని నిరుత్తరులను చేస్తూ తెలంగాణ ఏర్పాటును కేబినెట్ ఆమోదించిందన్న విషయాన్ని ప్రకటించారు. రాష్ట్ర విభజన వార్త సహజంగానే సీమాంధ్రలో ఖేదాన్ని, తెలంగాణలో మోదాన్ని కలుగజేసింది.

కాగా ప్రజలు అధైర్య పడాల్సిన అవసరం లేదని, అసెంబ్లీలో బిల్లును ఓడిస్తామని ఎ.పి.ఎన్.జి.ఓ నేత అశోక్ బాబు నమ్మబలుకుతున్నారు. విభజనకు నిరసనగా 48 గంటల బందుకు పిలుపిచ్చారు. రెండు నెలలు వేతనాలు లేక ఆకలి కేకలతో అల్లాడుతున్న సీమాంధ్ర ఉద్యోగులు మరిన్ని రోజుల ఆందోళనకు సహకరిస్తారా అన్న టి.వి9 ప్రశ్నకు ఆయన చిన్న ఉద్యోగులకు బ్యాంకు రుణాలు ఇచ్చే ఏర్పాటు చేశామనీ, చివరి నిమిషం వరకూ పోరాటం ఆపేది లేదని బింకం ప్రదర్శించారు.

తెలంగాణపై కేంద్రం వెనక్కి వెళ్లకపోవచ్చు గానీ, ముందుకు వెళ్ళే పరిస్ధితి కూడా లేదని చెబుతూ వచ్చిన అశోక్ బాబు గారు ఇకనైనా వాస్తవాన్ని గుర్తించాల్సిన అవసరం ఉంది. రాజకీయ నేతల తరహాలో లేనిది ఉన్నట్లుగా, ఉన్నది లేనట్లుగా చెప్పడం ప్రజా నేతల లక్ష్యం, లక్షణం కారాదు. అసంబద్ధమైన డిమాండ్ వదిలి, సీమాంధ్ర ప్రజలకు, ఉద్యోగులకు మేలు చేసే ఆచరణ సాధ్యమైన డిమాండ్లను ప్రభుత్వాల ముందు ఉంచాల్సిన అవసరం ఉన్నది.

కాంగ్రెస్ పార్టీలో రాజీనామాల పర్వం మొదలయింది. పార్టీ ప్రాధమిక సభ్యత్వానికి రాజీనామా చేస్తున్నట్లు నలుగురు ఎం.పిలు ప్రకటించగా, మంత్రి పదవులకు రాజీనామా చేస్తున్నట్లు ముగ్గురు మంత్రులు ప్రకటించారు. అనంత వెంకట్రామి రెడ్డి, ఉండవల్లి అరుణ్ కుమార్, సాయి ప్రతాప్, సబ్బం హరిలు కాంగ్రెస్ పార్టీకి రాజీనామా చేస్తున్నట్లు ప్రకటించారు. కావూరి సాంబశివరావు, పళ్లం రాజు, చిరంజీవి మంత్రి పదవులకు రాజీనామా చేస్తున్నట్లు ప్రకటించారు. ఈ రాజీనామాలు ఎంతవరకు వాస్తవమో అప్పుడే చెప్పలేము. రాజీనామాలు ఆమోదం పొందితే తప్ప వాటిలో వాస్తవం ఎంతో ప్రజలకు అర్ధం కాదు.

వైకాపా నేత జగన్మోహన్ రెడ్డి గారు మనసు బాష మాట్లాడుతున్నారు. ఈ రోజు తన మనసుకు ఎంతో బాధ కలిగిందని, 18 నెలల జైలు జీవితంలో కూడా ఇంతగా ఎప్పుడూ బాధ కలలగలేదని ఆయన వాపోయారు. ఓట్లు, సీట్లు లెక్క చూసుకుని రాష్ట్రాన్ని విభజించినవారు మనుషులేనా అని ప్రశ్నించారాయన. రాష్ట్ర విభజనకు నిరసనగా 72 గంటల బందుకు పిలుపిచ్చారు. చివరికి విభజించినవారిని వదిలి, ప్రతిపక్షంలో ఉన్న చంద్రబాబు నాయుడే విభజనకు ప్రధాన కారణం అని ఆయన ముక్తాయించారు.

సి.డబ్ల్యూ.సి నిర్ణయం తీసుకున్నాక కేబినెట్ నిర్ణయానికి కేంద్రం రెండు నెలలు ఎందుకు ఆగింది? బహుశా విభజన నిర్ణయం ప్రకటించాక ఎలాగూ ఆందోళనలు తప్పవు గనుక అదుపు తప్పనంతవరకూ వాటికి అనుమతి ఇవ్వాలని కేంద్ర పెద్దలు భావించి ఉండవచ్చు. తెలివిగా సీమాంధ్ర ఉద్యోగులు రెండు నెలల సమ్మెలో అలసిపోయే వరకూ ఆగింది. ఇప్పుడిక, రెండు నెలల వేతనాలు ఆగిపోయాక, వేతన కష్టాలు అనుభవంలోకి వచ్చాక, ముందుకు వెళ్లడానికే ప్రభుత్వం నిర్ణయించుకుందని జనానికి అర్ధం అయ్యాక ఇక ఆందోళనలు చేసే ఓపిక నశించవచ్చని కేంద్రం ఆశించి ఉండవచ్చు.

అదీ గాక రాజకీయంగా కూడా తాలు ఎవరో తప్ప ఎవరో తెలుసుకునే అవకాశం కూడా కాంగ్రెస్ నేతలకు/అధిష్టానానికి ఈ సందర్భంగా వచ్చింది. ముఖ్యమంత్రి కిరణ్ కుమార్ రెడ్డి తిరుగుబాటును ఆనం-బొత్స-మాణిక్యంల ప్రతి తిరుగుబాటు ద్వారా తిప్పి కొట్టిన కాంగ్రెస్ అధిష్టానం అదును చూసి వేటు వేసింది కాబోలు! మరి కొద్ది రోజులు పోతేగాని కిరణ్ కుమార్ తిరుగుబాటు వాస్తవమో కాదో అర్ధం కాకపోవచ్చు.

కానీ ‘అసెంబ్లీ ఉంది కదా! అక్కడ తీర్మానాన్ని ఓడిస్తే, కేంద్రం ఆలోచించవచ్చు’ అంటూ సీమాంధ్ర ప్రజలకు చెప్పడం మోసం అవుతుంది. ఈ మాటలను ఎన్.జి.ఓ నేత అశోక్ బాబు టి.వి9తో మాట్లాడుతూ చెప్పారు. ‘ఆర్టికల్ 3 ప్రకారం అసెంబ్లీ ఆమోదం లేకపోయినా, కేంద్రం విభజనను అమలు చేసే అవకాశం ఉండవచ్చు గానీ, అసెంబ్లీయే తిరస్కరించాక విభజనతో ముందుకు వెళ్ళే నియంతృత్వానికి కేంద్రం పాల్పడదని నమ్ముతున్నాను’ అని ఆయన అన్నారు. ఈ మాటలు సందర్భ రీత్యా అన్నా, సీరియస్ గా అన్నా అవాంఛనీయం. ఇలాంటి మాటలతో ప్రజల్ని మభ్యపుచ్చడం తగని పని. దానికి బదులు నిర్ధిస్థ డిమాండ్లను ప్రభుత్వాల ముందు ఉంచి వాటిని ఆమోదింపజేసుకోవడం ఉత్తమమైన పని.

తెలంగాణ ఏర్పాటుకు కాంగ్రెస్ అధిష్టానం నిర్ణయిస్తే ఎం.పి పదవికి రాజీనామా చేస్తాననీ, అసలు రాజకీయాల నుంచే తప్పుకుంటానని లగడపాటి రాజగోపాల్ చెబుతూ వచ్చారు. కానీ సి.డబ్ల్యూ.సి నిర్ణయం తర్వాత కూడా ఆయన ఆ మాటే ఎత్తలేదు. సి.డబ్ల్యూ.సి నిర్ణయం అమలు కాదనీ, అమలయితే రాజీనామా చేస్తానని చెప్పారు. అదీ అయింది గానీ రాజీనామా మాత్రం జరగలేదు. అయితే కేబినెట్ నిర్ణయం పై కోర్టుకు వెళ్ళే ఆలోచనలో ఆయన ఉన్నారని ఛానెళ్లు చెబుతున్నాయి. అది ఆయన హక్కు. కానీ రాజీనామా చేస్తానన్న ఆయన ప్రతిజ్ఞ గురించి ఎవరూ ఎందుకు మాట్లాడరు?