ఆఫ్ఘన్ మిలిటెంట్లు మరొక అమెరికా హెలికాప్టర్ ని కూల్చివేసినట్లు ప్రెస్ టి.వి తెలిపింది. తూర్పు ఆఫ్ఘన్ రాష్ట్రం ఘజని లోని అందర్ జిల్లాలో అమెరికా హెలికాప్టర్ ని కూల్చి వేసినట్లు తాలిబాన్ మిలిటెంట్లను ఉటంకిస్తూ ప్రెస్ టి.వి తెలిపింది. హెలికాప్టర్ లో ఉన్న 14 మంది అమెరికా సైనికులు చనిపోయారని తాలిబాన్ ప్రతినిధి జబిహుల్లా ముజాహిద్ చెప్పాడు. హెలికాప్టర్ కూల్చివేతపై నాటో దళాల నుండి ఇంకా సమాచారం ఏదీ అందలేదని ప్రెస్ టి.వి తెలిపింది.

82 ఎం.ఎం రాకెట్ తో హెలికాప్టర్ ని కూల్చినట్లు జబీహుల్లా తెలిపాడు. ఇటీవల కాలంలో అనేక అమెరికా హెలికాప్టర్లను తాలిబాన్ మిలిటెంట్లు కూల్చివేశారు. తాలిబాన్ చేతిలో హెలికాప్టర్ కూలినప్పుడల్లా సాకేతిక కారణాల వల్ల కూలిందనో, పక్షి ఢీకొని కూలిందనో చెప్పడం నాటో, అమెరికా కమాండర్లకు రివాజు. తాలిబాన్ మిలిటెంట్లు తమ హెలికాప్టర్లను కూల్చినట్లు వారెన్నడూ అంగీకరించలేదు. ఈసారీ అదే కధనం వెలువడడానికి అన్నీ అవకాశాలూ ఉన్నాయి.  లేదా అసలు హాలికాప్టర్ కూలిన వార్తే బైటికి రాకపోవచ్చు.