ప్రపంచ ఆర్ధిక వ్యవస్ధకు ఇటలీ డౌన్ గ్రేడ్ ఆశనిపాతం లాంటిదని విశ్లేషకులు భావిస్తున్నారు. మంగళవారం జరిగిన కొన్ని సానుకూల పరిణామాలను ఇది పూర్వ పక్షం చేసిందని భావిస్తున్నారు. కొద్దివారాలలో ఖర్చులకు డబ్బు లేని పరిస్ధితిలోకి జారబోతున్న గ్రీసుకి తదుపరి సాయం నిరాటంకంగా అందించడానికి ఒప్పందం దగ్గర్లో ఉందని ఒక వార్త వెలువడగా, యూరప్‌ను ఆదుకోవడానికి ఐ.ఎం.ఎఫ్ ద్వారా 10 బిలియన్ డాలర్ల సాయం అందించడానికి బ్రెజిల్ నిర్ణయించిందన్నది రెండవ సానుకూల వార్త. ఈ వార్తలతో వాస్తవానికి యూరోజోన్ రుణ సంక్షోభం పరిష్కారమయ్యే దిశలో సానుకూల అడుగులుగా భావించవలసి ఉండగా రెండింటినీ పూర్వపక్షం చేస్తూ ఎస్&పి సంస్ధ, ఇటలీ రేటింగ్ ను తగ్గించింది.

గ్రీకు అప్పుకంటే ఇటలీ అప్పుతో చాలా దేశాలు, చాలా బ్యాంకులు సంబంధం కలిగి ఉన్నాయనీ అందువలన గ్రీసుకంటే ఇటలీ పరిణామానికి ఎక్కువ ప్రభావం ఉంటుందని విశ్లెషకులు చెబుతున్నారు. నిజానికి గ్రీసు రుణ సంక్షోభం దానికదే పెద్ద ఆందోళనకరం కాదనీ ఆ తర్వాత దాని ప్రభావం పెద్ద ఆర్ధిక వ్యవస్ధలైన స్పెయిన్, ఇటలీలపై పడుతుందన్నదే అసలు భయం అనీ వారు చెబుతున్నారు. ఇపుడు అనిశ్చితి మరింత విస్తృతమయ్యిందని వారు భావిస్తున్నారు.

జర్మన్ పారిశ్రామిక దిగ్గజం సీమన్స్ కంపెనీ కొన్ని రోజుల క్రితం ఒక పెద్ద ఫ్రెంచి బ్యాంకునుండి అర బిలియన్ యూరోల వరకూ డబ్బుని ఉపసంహరించుకున్నట్లుగా తెలుస్తోంది. ఫ్రాన్సు బ్యాంకులపై నమ్మకం సడలుతున్నపరిస్ధితిని ఇది సూచిస్తున్నది. యూరోజోన్‌ను రుణ సంక్షోభం నుండి బైటపడడానికి యూరో బాండ్లను కొనుగోలు చేస్తానని హామీ ఇచ్చిన చైనా, అనేక యూరోపియన్ బ్యాంకులకు సంబంధించిన ద్రవ్య వ్యాపారాలను ఆపివేసింది. రుణ సంక్షోభం దానికి కారణంగా చూపింది.

ఇదిలా ఉండగా గ్రీసుకు ఐ.ఎం.ఎఫ్, ఇ.యు లనుండి రానున్న నెలలో అందవలసిన బెయిలౌట్ రుణం వాయిదాకు ఆటంకాలు తొలగిపోయే దిశలో ఒప్పందం కుదరనున్నట్లుగా వార్తలు వస్తున్నాయి. గ్రీసు ప్రభుత్వం ఖర్చు తగ్గించడానికి తగిన చర్యలను ప్రకటించలేదని చెబుతూ తదుపరి రుణం వాయిదా విడుదలపై అనుమానాలు వ్యాపించి ఉన్న దశలో ఈ వార్తలు వెలువడ్డాయి. గ్రీసు ప్రభుత్వం మరింతగా తన ప్రజలపై పొదుపువిధానాలను రుద్ధుతానని హామి ఇవ్వడంతో ఇ.యు, ఐ.ఎం.ఎఫ్ లు మెత్తబడ్డాయని చెబుతున్నారు.

గ్రీసు ఆర్ధిక సంక్షోభానికి కారకులు యూరప్ లో ఉన్న బడా బ్యాంకులు, ఇన్సూరెన్స్ సంస్ధలు కాగా, ఆ భారమంతా ఆ దేశ ప్రజలపై పొదుపు చర్యలరూపంలో మోపుతున్నారు. ఇంకా ఇంకా గ్రీసు ప్రజలను కష్టాల పాలు చేస్తున్నారు. గ్రీసు ప్రజలపైన బాదడానికి ఇ.యు, ఐ.ఎం.ఎఫ్ లతో గ్రీసు పాలకులు దుర్మార్గపు ఒప్పందాలు కుదుర్చుకుంటున్నారు. ఇప్పటికే వేతనాలు కత్తిరించి సదుపాయాలు రద్దు చేసినా ఇ.యు, ఐ.ఎం.ఎఫ్ లు శాంతించడం లేదు. ప్రభుత్వ రంగ కంపెనీలన్నింటినీ ప్రవేటీకరించి, అమ్మేసి ప్రవేటు గుత్త సంస్ధలకు వశం చేయడానికి ఇ.యు, ఐ.ఎం.ఎఫ్ లు ఈ దుర్మార్గానికి పాల్పడుతున్నాయి.

గ్రీసు రుణ సంక్షోభం తీవ్రం పేరుతో గ్రీసు కార్మికులు అనేక ఏళ్లపాటు కష్టించి సంపాదించిన ప్రభుత్వరంగ కంపెనీలను ఇపుడు ప్రవేటు గుత్త సంస్ధలతోడేళ్లకు వశపరుస్తున్నారు. అందుకు వీలుగా రుణ సంక్షోభాన్ని రహాదారిగా చేసుకుంటున్నారు. ఇప్పుడు తాజాగా ఇటలీ కార్మికవర్గం ఈ ఎత్తుగడలకు బలికానుంది. యూరోజోన్ లో మూడవ అతిపెద్ద ఆర్ధిక వ్యవస్ధ అయిన ఇటలీ అప్పు జిడిపిలో 120 శాతం పైగా ఉంది. ఈ అప్పంతా ఇటలీకి చెందిన బహుళజాతి కంపెనీలు, ఇతర యూరప్ కంపెనీలతో పాటు అమెరికా కంపెనీలకు దోచిపెట్టిన సొమ్ముకాగా అప్పు తీర్చవలసివచ్చేసరికి కార్మికులు, ఉద్యోగులను బలి చేస్తున్నారు.

మే నెలలోనే డౌన్ గ్రేడ్ చేస్తానని హెచ్చరించిన ఎస్&పి, ఇటలీ ప్రభుత్వం తగిన చర్యలు చేపట్టకపోవడం వలన తన హెచ్చరికను నిజం చేస్తున్నట్లు ప్రకటించింది. గత వారంలోనే ఇటలీ ప్రభుత్వం 59.8 బిలియన్ యూరోల మేరకు బడ్జెట్ ఖర్చులు తగ్గించే పధకం ప్రకటించినా అది ఎస్&పి కి సరిపోలేదు. 2013 నాటికి సమతూక బడ్జెట్ సమర్పిస్తానని ఇటలీ ప్రభుత్వం వాగ్దానం చేసింది. అంటే రెవిన్యూ వసూళ్ళు ఎంత ఉంటే ఖర్చుకూడా అంతే ఉంటుందని హామీ ఇవ్వడం అన్నమాట. బడ్జెట్ ఖర్చు పెట్టే సమయంలో కేవలం కంపెనీలు, ధనికులు మాత్రమే లెక్కలోకి వస్తారు. కాని బడ్జెట్ ఖర్చు తగ్గించడానికి వచ్చేసరికి ప్రభుత్వాలకు కార్మికులు, ఉద్యోగులు, వారికి ఇచ్చే వేతనాలు, సదుపాయాలు మాత్రమే గుర్తుకు రావడం యాదృచ్ఛికం కాదు.