గత సంవత్సరం మధ్యధరా సముద్రంలో టర్కీనుండి గాజాకు వెళ్తున్న మావి మార్మారా అనే ఓడపైన ఇజ్రాయెల్ డిఫెన్స్ ఫోర్స్ (ఐ.డి.ఎఫ్) అమానుషంగా దాడి చేసింది. ప్రయాణీకులంతా వివిధ రంగాల్లో అంతర్జాతీయ స్ధాయిలో లబ్ద ప్రతిష్టులైనవారు. పైగా నిరాయుధులు. గాజా సముద్రజలాల్లోకి ప్రవేశించకుండానే, ఓడలు ఇంకా అంతర్జాతీయ జలాల్లోనే ఉన్నప్పటికీ ఐ.డిఎఫ్ సైనికులు హెలికాప్టర్లపై నుండి కాల్పులు జరిపారు. హెలికాప్టర్ నుండి కాల్పులు జరుపుతుండగానే సైనికులు తాళ్ళతో ఓడపైకి దిగి దగ్గర్నుండి మరికొంతమందిని కాల్పులు జరిపారు. సైనికులు ఆత్మ రక్షణ కోసమే కాల్చారనీ, ఓడలో ఉన్నవారు లాఠీలు, కత్తులతో తమపై దాడి చేశారని అందుకే తాము (పాయింట్ బ్లాంక్ రేంజ్‌లో) కాల్పులు జరిపామనీ వారు ప్రపంచాన్ని నమ్మించడానికి ప్రయత్నించారు.

సూడాన్ అధ్యక్షుడి పైనా, సెర్బియన్ల నాయకుడిపైనా, లిబియా అధ్యక్షుడి గడ్డాఫీపైనా పౌరుల్ని చంపారంటూ సాక్ష్యాలు లేకుండా కేసులు నమోదు చేసి అరెస్టు వారెంటు జారీ చేసే అంతర్జాతీయ న్యాయస్ధానం ఇజ్రాయెల్ దుర్మార్గంపై నోరు మెదపలేదు. ప్రపంచంలో లా అండ్ ఆర్డర్ కి బాధ్యత తీసుకునే అమెరికా కూడా ఇజ్రాయెల్ హత్యలపైన ఒక్క మాట కూడా మాట్లాడలేదు. టర్కీ అప్పుడే క్షమాపణ చెప్పాలని డిమాండ్ చేసినా ఇజ్రాయెల్ చెప్పలేదు. అయితే ఇన్నాళ్లూ ఎదురుచూసి ఇప్పుడు చర్య తీసుకోవడమే ఆశ్చర్యం కలిగిస్తోంది.

పోలీసులను చంపాక ఈజిప్టు ప్రజలు వేల మంది ఇజ్రాయెల్ రాయబార కార్యాలయం ముందు అప్పటికప్పుడు అర్ధరాత్రి గుమికూడి పెద్ద పెట్టున ఆందోళన నిర్వహించారు. ప్రదర్శకులలో కొందరు రాయబార కార్యాలయంపై ఉన్న ఇజ్రాయెల్ జెండాను తొలగించి ఈజిప్టు జెండాను ప్రతిష్టించడం అరబ్బు లోకానికి గొప్ప స్ఫూర్తిని ఇచ్చింది. ప్రజల ఒత్తిడితో ఈజిప్టు తాత్కాలిక సైనిక ప్రభుత్వం ఇజ్రాయెల్ పోలీసుల హత్యలపై విచారణ జరిపి దోషులను శిక్షించాలనీ, పోలీసుల హత్య ఇరుదేశాల మధ్య ఉన్న శాంతి ఒప్పందాన్ని ఉల్లంఘించడమేననీ గట్టిగా కోరింది. ఇజ్రాయెల్ నుండి తమ రాయబారిని వెనక్కి పిలిపిస్తామని కూడా హెచ్చరించింది. ఈజిప్టు ప్రజాస్వామిక ఉద్యమం ముందయితే ఈ పరిణామాలు బొత్తిగా ఊహించడానికి కూడా వీలులేనివి.