శుక్రవారం విడుదల చేసిన ఉద్యోగాల రిపోర్టు ప్రకారం ఆగష్టు నెలలొ ఉద్యోగాల సృష్టి ఆవిరైపోయింది. దానితో అమెరికా మళ్లీ మాంద్యం (రిసెషన్) లోకి జారిపోనున్నదన్న భయాలు మళ్లి ఒక సారి రంగం మీదికి వచ్చాయి. కార్పొరేట్ మీడియాకి స్వల్ప కాలిక, మధ్య కాలిక, దీర్ఘకాలిక అవగాహనలు ఉంటాయని ఆశించడం తప్పు కాదు. ఇదేం రోగమో కాని ఈ రోజు ఉద్యోగాల రిపోర్టు చూసి అమెరికా మళ్లీ మాంద్యం లోకి వెళ్తుందేమో అని విశ్లేషణలు గుప్పిస్తాయి. రేపు మాన్యుఫాక్చరింగ్ రంగం కొద్దిగా రవ్వంత వృద్ధి నమోదు చేసిన రిసేషన్ భయాలను మాన్యుఫాక్చరింగ్ వృద్ధి చెల్లా చెదురు చేసేసిందని రాసేస్తున్నాయి. వీళ్ల విశ్లేషణలను చూసి స్టాక్ మార్కెట్లు ఏదో మేర ప్రభావితం అవుతున్నాయి.

ఆగస్ఠు పరిస్ధితి అలా ఉండగా జూన్, జులై నెలలకుగాను గతంలో ప్రకటించినట్లుగా కాకుండా వాస్తవంలో 58,000 ఉద్యోగాలు తక్కువగా ఇచ్చినట్లుగా తాజా గణాంకాలు తేల్చాయి. ప్రభుత్వ ఉద్యోగాలు ఆగష్టులో 17,000 తగ్గిపోయాయి. మిన్నెసోటాలో వేలమంది ఉద్యోగులు రాష్ట్ర ప్రభుత్వ మూసివేత ముగిసి ఉద్యోగాల్లో చేరినా ఈ పరిస్ధితి ఉండడం ఇంకా ఆందోళనకరం. దీర్ఘకాలిక నిరుద్యోగం పైన ఫెడరల్ రిజర్వు అధిపతి బెర్నాంక్ ఆందోళన వెలిబుచ్చాడు. వరుసగా రెండు సంవత్సరాల పాటు నిరుద్యోగులుగా ఉన్నవారి సంఖ్య స్ధిరంగా కొనసాగుతుండడం ఆయన ఆందోళనకు కారణం. దీర్ఘకాలిక నిరుద్యోగం ఆర్ధిక వ్యవస్ధపై తీవ్ర ప్రభావం చూపుతుందని ఆయన అంటున్నాడు. జనాభాలో 58.2 శాతమే ఉద్యోగులుగా ఉన్నారు. జులై సంఖ్య 58.1 శాతం కంటే ఒక పాయింటు ఎక్కువగా ఉండడం రెండు నిమిషాలపాటు సంతోషించడానికి సరిపోతుంది.

కాని అమెరికాలోని బహుళజాతి ప్రవేటు కంపెనీలు, మాంద్యానికి కారణ భూతమైన కంపెనీలు మాత్రం ప్రభుత్వం ఇచ్చిన బెయిలౌట్లు భోంచేసి బాగానే కోలుకున్నాయి. ప్రభుత్వం కోలుకోకపోవడంతో అది ఉద్యోగాలు ఇవ్వలేకపోతోంది. కోలుకున్న ప్రవేటు కంపెనీలు ఉద్యోగాలు ఇచ్చే పని పెట్టుకోవడం లేదు. ఇంకా ఊడబెరుకుతున్నారు తప్ప ఇచ్చే పని పెట్టుకోవడం లేదు. అమెరికా మరోసారి వరుసగా రెండు క్వార్టర్లు నెగిటివ్ వృద్ధి నమోదు చేస్తే టెక్నికల్‌గా మరోసారి మాంద్యంలోకి వెళ్ళినట్లు. ఇలా వరుసగా ఒక మాంద్యం నుండి పూర్తిగా కోలుకోక ముందే మళ్ళీ మాంద్యంలోకి వెళ్తే దాన్ని “డబుల్ డిప్” (అంటే రెండు సార్లు సంక్షోభ సముద్రంలో మునకవేయడం అన్నమాట) అంటున్నారు. అమెరికా ఇలా టెక్నికల్ గా కూడా డబుల్ డిప్ కి గురవడం ఖాయమని, నౌరుబి, జోసెఫ్ స్టిగ్లిట్జ్ లాంటి ప్రఖ్యాత పెట్టుబడిదారీ ఆర్ధిక వేత్తలు ఘంటాపధంగా రాస్తున్నారు.

అయినప్పటికీ వార్తా సంస్ధలు మంచి జాబ్స్ రిపోర్టు వస్తే ‘నో రిసెషన్’ అనీ, జాబ్స్ రాకపోతే ‘అయ్యో డబుల్ డిప్’ అనీ రాస్తూనే ఉన్నాయి. ఇన్‌వెస్టర్లను భయపెడుతూనే ఉన్నాయి. షేర్ మార్కెట్లు వీరి వార్తలకు స్పందించి ప్రభావితమవుతున్నాయా లేక షేర్ మార్కెట్లు చూసి వీరు వార్తలు రాస్తున్నారా అంటే చెప్పడం ఓకరకంగా కష్టంగా మారిపోయింది. రెండు ఒకదానిపై ఒకటి ఇంక్రిమెంటల్ గా ప్రభావం చూపించుకుంటున్నట్లు కనిపిస్తోంది. అయితే వార్తా సంస్ధలతో ప్రభావితమైన మార్కెట్ కదలికలు నిలవని సంగతిని మదుపుదారులు గ్రహించేలోపే మరొక పరిణామం సంభవిస్తోంది. దాన్ని నిలదొక్కుకునే లోపే ఇంకొక పరిణామం దానితో మదుపుదారులకు సరైన గైడెన్స్ ఇచ్చేవారు కరువైపోయారని అనుకోవలసి వస్తున్నది.

అమెరికా ఆర్ధిక వ్యవస్ధ అత్యంత పెద్దది. ఎంతంటే, దాని తర్వాత రెండవ స్ధానంలో ఉన్న చైనా జిడిపి కంటే అమెరికా జిడిపి మూడు రెట్లు ఎక్కువ. చైనా దాదాపు 5 ట్రిలియన్ల జిడిపి నమోదు చేస్తుండగా, అమెరికా దాదాపు 15 ట్రిలియన్ల జిడిపిని నమోదు చేస్తున్నది. ఈ కారణంగా అమెరికా ఆర్ధిక వ్యవస్ధపై అంత తేలికగా ప్రభావాలు పడడం సాధ్యం కాదు. అదీ కాక అనధికారికంగానే అయినా అంతర్జాతీయ కరెన్సీగా ఇంకా డాలరే కొనసాగుతోంది. అందువలన అమెరికా ఫెడరల్ రిజర్వు యధేచ్ఛగా డాలర్లు ముద్రించడానికి అనుమతి ఇస్తోంది. గత సంవత్సరం మధ్యలో 600 బిలియన్ డాలర్ల మేరకు అమెరికా ట్రెజరీ బాండ్లను తానే కొనుగొలు చేసి విడతలుగా సొమ్ముని మార్కెట్లోకి విడుదల చేసింది. దాని కాలం ముగిసిన మరుసటి నెలనుండే అది లేని పరిస్ధితి కనిపించడం మొదలయ్యింది.

దానితో అంతా మళ్ళీ ఫెడరల్ రిజర్వ్ చైర్మన్ బెర్నాంక్ వైపు మోరలెత్తి చూస్తున్నారు. మరొక క్వాంటిటేటివ్ ఈజింగ్ ప్రకటించకపోతాడా అని. అంటే ట్రెజరీ బాండ్లను కొనుగొలు చేయడం ద్వారా మరింత డబ్బుని మార్కేట్లోకి విరజిమ్మే ‘క్వాంటిటేటివ్ ఈజింగ్ – 3’ (క్యు.ఇ-3) ని ఇవ్వాలని ఎదురు చూస్తున్నారు. గత సంవత్సరం ‘క్యు.ఇ-2’ ని ఇచ్చినందుకే యూరప్, చైనాలు మండిపడ్డాయి. దానివలన తమ దేశాల్లో ద్రవ్యోల్బణం పెరుతుతుందని. అయినా ‘క్యు.ఇ-3’ ని ఇచ్చే పరిస్ధితిలోనే బెర్నాంక్ కనిపిస్తున్నాడు. అది ప్రకటిస్తే ఇండియా, చైనా లాంటి ఎమర్జింగ్ దేశాలతో పాటు, ఇ.యు దేశాల్లో కూడా ద్రవ్యోల్బణం జడలు విప్పడం ఖాయం. అది ఇండియాకి మరింతగా శరాఘాతంగా పరిమించడం ఇంకా ఖాయం. అయితే ఇండియా వృద్ధి రేటు తగ్గిపోతున్నందున క్యు.ఇ-3 సొమ్ము ఇటువైపు వస్తుందో లేదో చూడవలసి ఉంది.