కర్ణాటక లోకాయుక్త జస్టిస్ సంతోష్ హెగ్డె ముఖ్యమంత్రి యెడ్యూరప్ప కు కూడా అక్రమ మైనింగ్ కుంభకోణంలో పాత్ర ఉందని నిర్ధారిస్తూ తయారు చేసిన నివేదికను శుక్రవారం ప్రభుత్వానికి సమర్పించనున్న నేపధ్యంలో ఆయనపై మరో సమ్మెట దెబ్బ పడింది. యెడ్యూరప్పపై అవినీతి కేసులు నమోదు చేసి విచారించాలన్న క్రింది కోర్టు తీర్పుపై మార్చిలో విధించిన స్టేను హై కోర్టు గురువారం ఎత్తి వేసింది. స్తే ఎత్తి వేస్తూ ముఖ్యమంత్రిపై అవినీతి పాల్పడ్డాడన్న కేసు నమోదు చేసి విచారణ చేయడానికి అనుమతిని ఇచ్చింది. యెడ్యూరప్పతో పాటు ఆయన ఇద్దరు కుమారులను, అల్లుడినీ, ఇతరులను కూడా ప్రశ్నించి విచారించడానికి కోర్టు అనుమతినిచ్చింది.

యెడ్యూరప్పపైన కర్ణాటకకు చెందిన ఇద్దరు లాయర్లు సిర్జిన్ భాషా, కె.ఎన్.బాలరాజ్ గత జనవరిలో ఐదు అవినీతి కేసులను దాఖలు చేశారు. గవర్నరు హెచ్.ఎన్.భరద్వాజ ముఖ్యమంత్రిపై కేసులు దాఖలు చేయడానికి ఇరువురు లాయర్లకు అనుమతి ఇచ్చాక వారు సి.ఎం పైనా, ఆయన కుమారులు అల్లుడు పైనా, ఇతరులపైనా కేసులు దాఖలు చేశారు. యెడ్యూరప్పతో పాటు ఆరోపణలు ఎదుర్కొంటున్నవారు, ఆయన కుమారులు బి.వై.రాఘవేంద్ర, బి.వై.విజయేంద్ర, అల్లుడు సోహన్ కుమార్, ఇంకా ఇతరులు కాగా వారిలో రాఘవేంద్ర లోక్ సభ సభ్యుడు.

యెడ్యూరప్ప అల్లుడు సోహన్ కుమార్, లాయర్లు దాఖలు చేసిన ఐదు కేసులపై విచారణ చేయడానికి పోలీసులను కింది కోర్టు ఆదేశించడాన్ని సవాలు చేస్తూ పిటిషన్ దాఖలు చేయడంతో ట్రయల్స్ కోర్టు ఆదేశాలపై హైకోర్టు న్యాయ మూర్తి జస్టిస్ కె.ఎన్.కేశవ నారాయణ గత మార్చి నెలలో స్టే మంజూరు చేశాడు. గురువారం ఆయన తాను విధించిన స్టేను ఎత్తి వేస్తూ తీర్పు చెప్పాడు. యెడ్యూరప్ప, ఆయన కుమారులు, అల్లుడు, తదితరులపై విచారణ కొనసాగించవచ్చని తీర్పు చెప్పాడు. కొన్ని అవినీతి ఆరోపణలు, అక్రమ భూ పంపకాల కేసుల్లో ఆరోపణలు యెడ్యూరప్ప తదితరులపై లాయర్లు కేసులు దాఖలు చేశారు. ప్రస్తుతం యెడ్యూరప్ప విదేశీ పర్యటనలో ఉన్నాడు. ఆయన వస్తే కర్ణాటకలో రాజకీయా మార్పులు వేగం పుంజుకునే అవకాశం కనిపిస్తోంది. అయితే ఆ మార్పులు తాత్కాలిక సర్దుబాటు కోసమే ఉద్దేశిస్తాయి తప్ప, మిన్నేమీ విరిగి నేల బడేటంతటి పరిణామాలేవీ సంభవించవు. తాత్కాలిక సర్దుబాట్లనే శాశ్వత పరిష్కారాలుగా ప్రచారం చేయడానికి పత్రికలు, ఛానెళ్ళు ఎలాగూ ఉన్నాయి.